Iri ku kɔ̃ 118 - Bibeli do fee

Ka wɛɛ ku ba ka sisi mii iyi Aɔ̃ Lafɛ̃ɛ í ce

¹ I saabu Aɔ̃ Lafɛ̃ɛ ŋa, domi í jɛ jiida, nɔ kubiɛ í ya maa wɛɛi hee do ajɔ fei.

² Iŋɛ inɛi Izirɛli ŋa, i fɔ i sisi i ni ŋa, kubiɛ í ya maa wɛɛi hee do ajɔ fei.

³ Iŋɛ dimii Arɔ̃ɔ ŋa, i fɔ i sisi i ni ŋa, kubiɛ í ya maa wɛɛi hee do ajɔ fei.

⁴ Iŋɛ iyi ì mà bɛɛrɛi Aɔ̃ Lafɛ̃ɛ, i fɔ i sisi i ni ŋa, kubiɛ í ya maa wɛɛi hee do ajɔ fei.

⁵ Hai si wahala, ǹ kpe Aɔ̃ Lafɛ̃ɛ, nɔ í jɛɛm, í jɔ̀ ǹ nɛ aram.

⁶ Aɔ̃ Lafɛ̃ɛ í wɛɛ do amu, n kù nɛ zigiidai nkãma. Mii amanɛ ŋa aa yɔkɔ a ceem.

⁷ Aɔ̃ Lafɛ̃ɛi í jɛ woo faabam, nɔ ǹ wa n yɛ kucukui mbɛɛm ŋa.

⁸ Í sĩa i manji bi Aɔ̃ Lafɛ̃ɛ do iyi aa maa kaaba amanɛ.

⁹ Í sĩa i manji bi Aɔ̃ Lafɛ̃ɛ do iyi aa maa kaaba inɛ nla gɔ.

¹⁰ Dimi mmu ŋa à kaakom. Do saabui Aɔ̃ Lafɛ̃ɛ ǹ lele ŋa.

¹¹ À kaakom nii bii fei, nɔ do saabui Aɔ̃ Lafɛ̃ɛ ǹ lele ŋa.

¹² À kaakom nii bɛi nyikɔ̃ ŋa, amma à kui bɛi inai fɔfɔ. Do saabui Aɔ̃ Lafɛ̃ɛ, ǹ lele ŋa.

¹³ À talem ku ba n cuku. Amma Aɔ̃ Lafɛ̃ɛ í sobim.

¹⁴ Aɔ̃ Lafɛ̃ɛi í jɛ gbugbãm. Nŋui í faabam, an kɔ̃a irii.

¹⁵ Inɛ dee dee ŋa à waa dɔ̃ anui inɔ didɔ̃ do ti igũ ku jɛ si ilei acɔ nŋa. Aɔ̃ Lafɛ̃ɛ í nyisi gbugbãɛ.

¹⁶ Awɔ njɛi Aɔ̃ Lafɛ̃ɛi í wa antaii mii fei. Aɔ̃ Lafɛ̃ɛ í ya nyisi gbugbãɛ.

¹⁷ N kaa n ku, an maa n wɛɛi nɔ n maa n sisi mii ŋa iyi Aɔ̃ Lafɛ̃ɛ í ce.

¹⁸ Ntɔ ntɔ, Aɔ̃ Lafɛ̃ɛ í kpãm iju, amma kù kpam.

¹⁹ I cĩim gamboi inɛ dee dee ŋau ŋa, do bɛi an lɔò nɔ n cĩ Aɔ̃ Lafɛ̃ɛ.

²⁰ Anu koofai Aɔ̃ Lafɛ̃ɛu wee. Hai do bɛi inɛ dee dee ŋa aa lɔò.

²¹ An maa n saabuɛi si na iyi í jɔ̀ ì jɛɛm nɔ ì faabam.

²² Kuta iyi woo ma ŋau à kɔ̀siu, nŋui í baa í jɛ kuta ku nɛ gbugbãi gontai icui ileu.

²³ Hai bi Aɔ̃ Lafɛ̃ɛi iyi bɛ wa naa, nɔ wa mu wa biti.

²⁴ I cɔ ajɔ iyi Aɔ̃ Lafɛ̃ɛ í ce ŋa. Ka dɔ̃ anu ka wɛɛ do inɔ didɔ̃.

²⁵ Aɔ̃ Lafɛ̃ɛ, faaba wa. Jɔ̀ ka jɛ igũ.

²⁶ Kuwee ku jɛ ti inɛ iyi wa naa do irii Aɔ̃ Lafɛ̃ɛ. Awa, aa ka maa wee nŋɛ wa hai kpasɛ̃i Aɔ̃ Lafɛ̃ɛ.

²⁷ Aɔ̃ Lafɛ̃ɛi í jɛ Ilaaɔ̃. Nŋui í ya maa má nwa inya. I dĩ amaawɔi jĩi ŋa i kaakoò bi kuweeu hee do ngo ŋa iyi à wa si bi kuweeu fei si waatii jingau ŋa.

²⁸ Awɔi ì jɛ Ilaaɔ̃ Lafɛ̃ɛm, an maa n cĩɛi. Ilaaɔ̃ Lafɛ̃ɛm, an fɔ n maa n sisi kulaɛ.

²⁹ I saabu Aɔ̃ Lafɛ̃ɛ ŋa domi í jɛ jiida, nɔ kubiɛ í ya maa wɛɛi hee do ajɔ fei.