Iri ku kɔ̃ 116 - Bibeli do fee

Kutɔɔi inɛ gɔ iyi à yá hai si iku

¹ Ǹ bi Aɔ̃ Lafɛ̃ɛ, domi í ya gbɔ imum waati iyi ǹ kpoo.

² Wa de sim itĩ, nɔ si kuwɛɛm fei, an maa n kpooi.

³ Iku í dĩm do seseeɛ ŋa. Inɔ kufɔi bi kuwai iku ŋa í to sim. Ǹ nɛ zigiida do inɔ kufɔ ntɔ ntɔ.

⁴ Amma ǹ kpe Aɔ̃ Lafɛ̃ɛ ǹ ni, Aɔ̃ Lafɛ̃ɛ, ǹ wa n tɔɔɛi, faaba hundem.

⁵ Aɔ̃ Lafɛ̃ɛ í ya cea inɛ didɔ̃ nɔ í jɛ dee dee. Aɔ̃ Lafɛ̃ɛ nwa í nɛ araare.

⁶ Aɔ̃ Lafɛ̃ɛi wa mu inɛ kurɔ ŋa. Waati iyi ǹ kua gbugbã, í faabam.

⁷ An nyi si bi kusĩmim nii, domi Aɔ̃ Lafɛ̃ɛ í ceem jiida.

⁸ Ntɔ ntɔ, Aɔ̃ Lafɛ̃ɛ awɔi ì yá hundem hai si iku, ì gbãam cikãajum ŋa nɔ ì jɔ̀ n kù koosɛ.

⁹ Si andunyau ihɛ̃, an maa n nɛi si wajui Aɔ̃ Lafɛ̃ɛ.

¹⁰ Ǹ dasi naanɛi baa si waati iyi ǹ fɔ ǹ ni, ǹ wa si wahala ntɔ ntɔ.

¹¹ Si bitim, ǹ fɔ ǹ ni, amanɛ fei ilu iboi.

¹² Bɛirei an ce n sãa Aɔ̃ Lafɛ̃ɛ jiida ŋa iyi í ceem fei.

¹³ An wu kɔɔfui faabau lelei, n maa n kpeò irii Aɔ̃ Lafɛ̃ɛ.

¹⁴ An kɔ̃ kuwãm ŋa iyi ǹ cea Aɔ̃ Lafɛ̃ɛi si wajui zamaaɛu fei.

¹⁵ Aɔ̃ Lafɛ̃ɛ í ya nɛ ara kuro bii í yɛ inɛɛ ŋa à waa ku.

¹⁶ Aɔ̃ Lafɛ̃ɛ, amu woo ce icɛɛi. Amu ama inɛmɔkɔi inaabo woo ce icɛɛi. Awɔi ì fũ ikũ ŋa iyi wa dĩm ŋau.

¹⁷ An ceɛ kuweei n saabuɛò nɔ n maa n kpe iriɛ.

¹⁸ An kɔ̃ kuwãm ŋa iyi ǹ cea Aɔ̃ Lafɛ̃ɛi si wajui zamaaɛu fei

¹⁹ si inɔ bantumai kpasɛ̃ɛ Zeruzalɛmu. I saabu Aɔ̃ Lafɛ̃ɛ ŋa.