Iri ku kɔ̃ 115 - Bibeli do fee

Amboe ku jɛ ti Ilaaɔ̃ nŋu akã

¹ Aɔ̃ Lafɛ̃ɛ, kù jɛ awai à nɛ ka nɛ bɛɛrɛ, aawo kù jɛ awa. Awɔi ì nɛ i nɛ bɛɛrɛ na dee dee ku jɛɛ do na jiida ku jɛɛ.

² Na mii í jɔ̀ inɛi ilɛ ŋa à ya maa ni, iwoi Ilaaɔ̃ Lafɛ̃ɛ nŋau í wa.

³ Ilaaɔ̃ Lafɛ̃ɛ nwa lelei í wa. Nɔ mii iyi í bi feii í ya ce.

⁴ Iwɛ̃ nŋa ŋa iyi à ce do isɔ fũfũ do iyi à ce do wura, icɛi awɔi amanɛ ŋai.

⁵ À nɛ gɛlɛ, amma a ci ya fɔ ide. À nɛ iju, amma a ci ya yɛ ilu.

⁶ À nɛ itĩ, amma a kù waa gbɔ ide. À nɛ imɔ, amma a ci ya gbɔ inunu.

⁷ À nɛ awɔ, amma a kaa yɔkɔ a lu ngɔgɔ. À nɛ kutɛ ŋa, amma a kaa yɔkɔ a nɛ. Iba kãma ci ya fita hai si gɛlɛ nŋa.

⁸ Inɛ ŋa iyi à ce iwɛ̃ ŋau à jɔ ŋa nɔ inɛ ŋa iyi à waa naanɛ ŋa ŋau fei à jɔ ŋa.

⁹ Iŋɛ inɛi Izirɛli ŋa, i dasi Aɔ̃ Lafɛ̃ɛ naanɛ ŋa. Nŋui í jɛ woo faaba nwa nɔ í jɛ bɛi tɛli nwa.

¹⁰ Iŋɛ dimii Arɔ̃ɔ ŋa, i dasi Aɔ̃ Lafɛ̃ɛ naanɛ ŋa. Nŋui í jɛ woo faaba nwa nɔ í jɛ bɛi tɛli nwa.

¹¹ Iŋɛ iyi ì mà bɛɛrɛi Aɔ̃ Lafɛ̃ɛ, i dasiɛ naanɛ ŋa. Nŋui í jɛ woo faaba nwa nɔ í jɛ bɛi tɛli nwa.

¹² Aɔ̃ Lafɛ̃ɛ wa ye gigi nwa, á wee nwa. Á weea inɛi Izirɛli ŋa, á weea dimii Arɔ̃ɔ ŋa.

¹³ Aɔ̃ Lafɛ̃ɛ á weea inɛ ŋa iyi à mà bɛɛrɛɛ ŋa fei, hai ilu fia do ilu are fei.

¹⁴ Aɔ̃ Lafɛ̃ɛ á kɔ̃ɔsi akpɔ nŋɛ, iŋɛ do ama nŋɛ ŋa fei.

¹⁵ Aɔ̃ Lafɛ̃ɛ ku wee nŋɛ, nŋu iyi í ce lele do ilɛ.

¹⁶ Lelei Aɔ̃ ti Aɔ̃ Lafɛ̃ɛi. Amma í so ilɛ í na amanɛ ŋa.

¹⁷ Kù jɛ iku ŋai aa kɔ̃ iri a maa cĩ Aɔ̃ Lafɛ̃ɛ, kù nɔ kù jɛ inɛ ŋa iyi à nɛ bi kuwai iku ŋai aa maa saabuɛ.

¹⁸ Amma awa, aa ka maa cĩ Aɔ̃ Lafɛ̃ɛi hai nsɛi hee do ajɔ fei. I saabu Aɔ̃ Lafɛ̃ɛ ŋa.