Iri ku kɔ̃ 114 - Bibeli do fee

Waati iyi inɛi Izirɛli ŋa à fita wa hai ilɛi Ezibiti

¹ Waati iyi inɛi Izirɛli dimii Zakɔbu ŋa à fita wa hai ilɛi Ezibiti hai si aninii dimi iyi wa fɔ fee iyi a kù waa gbɔ,

² ilɛi Zudaai í na í jɛ kpasɛ̃i Aɔ̃ Lafɛ̃ɛ, nɔ ilɛi Izirɛli mɔi í jɛ bi kuwaɛ.

³ Ŋɔi tenku í yɔɔ nɔ í sa. Idoi Zuudɛ̃ɛ mɔ í nyi do anyi.

⁴ Iri kuta ŋa à fo à waa dingaa bɛi angudã kombo. Geete ŋa mɔ à fo à waa dingaa bɛi iwo kombo ŋa.

⁵ Tenku, mii í ce ì waa sa. Idoi Zuudɛ̃ɛ, mii í jɔ̀ ì waa nyi do anyi.

⁶ Iŋɛ iri kuta ŋa, mii í ba ŋɛ í jɔ̀ ì fo ì waa dingaa bɛi angudã kombo ŋa. Iŋɛ geete ŋa mɔ, mii í ba ŋɛ í jɔ̀ ì fo ì waa dingaa bɛi iwo kombo ŋa.

⁷ Ilɛ, yaya si wajui Lafɛ̃ɛ, si wajui Aɔ̃ Lafɛ̃ɛi Zakɔbu.

⁸ Nŋui í ya jɔ̀ kuta ku kpɔò acãi inyi nla. Nŋui í ya jɔ̀ inyi ku maa fita hai si kuta.