Iri ku kɔ̃ 112 - Bibeli do fee

Ilu inɔ didɔ̃i inɛ iyi wa jirima Ilaaɔ̃

¹ I saabu Aɔ̃ Lafɛ̃ɛ ŋa. Ilu inɔ didɔ̃i inɛ iyi í mà bɛɛrɛi Aɔ̃ Lafɛ̃ɛ, nɔ í bi woodaɛ ŋa.

² Tɔkuɛ ŋa aa jɛ ilu gbugbã ŋa si ilɛu. Ilaaɔ̃ á weea nyaanzei inɛ dee dee ŋau.

³ Amani do kuwɛɛ didɔ̃i í ya wa si kpasɛ̃ɛ, nɔ Ilaaɔ̃ í ya jɔ̀ ntɔ ku maa wɛɛai hee do ajɔ fei.

⁴ Idũ inya í ya maa máa inɛ dee dee ŋai. Inɛ dee dee í ya cea inɛ didɔ̃ nɔ í ya nɛ araare.

⁵ Inɛ jiida í ya wɛ̃a inɛi do inɔ akã. Í ya maa ce wũaɛ ŋai ku maa jirimaò wooda.

⁶ Inɛ iyi wa jirima Ilaaɔ̃ kaa koosɛ pai. Aa maa ye gigiɛi waati kãma fei.

⁷ Laabaau laalɔ ci ya da zigiɛ. Idɔɛ í ya maa bubai. Nɔ naanɛɛ fei si Aɔ̃ Lafɛ̃ɛi í ya wa.

⁸ Idɔɛ ci ya dede, nɔ zigiɛ ci ya da. Nɔ í ya yɔɔ iyi nŋu á kãmia mbɛɛi nŋu ŋai.

⁹ Í ya cea ilu are ŋa amua do inɔ akã, nɔ Ilaaɔ̃ í ya jɔ̀ ntɔ ku maa wɛɛai hee do ajɔ fei. Gbugbãɛ do bɛɛrɛɛ í ya maa kɔ̃ɔsii.

¹⁰ Ilu inɔ kukã ŋa à ya yɔɔi nɔ idɔ nŋa ku kɔ̃. À ya maa ŋɔ inyíi nɔ inɔ nŋa ku maa fɔ. Kpãa ku cɔ nŋa fei í ya leekĩi.