Iri ku kɔ̃ 111 - Bibeli do fee

Gigi ku yei jiida ŋa iyi Aɔ̃ Lafɛ̃ɛ í ce

¹ I saabu Aɔ̃ Lafɛ̃ɛ ŋa. An maa n cĩ Aɔ̃ Lafɛ̃ɛi do idɔm fei tengi bii inɛ dee dee ŋa à tɔtɔɔ.

² Icɛ ŋa iyi Aɔ̃ Lafɛ̃ɛ í ce à la. Inɛ ŋa iyi à ya nɛ si inɔ didɔ̃ fei à ya maa lasabu sii.

³ Icɛɛ í mái nɔ í nɛ amboe. Dee dee ku jɛɛ í ya maa wɛɛi do ajɔ fei.

⁴ Í bi a ya maa ye gigii maamaake ŋa iyi í ce. Aɔ̃ Lafɛ̃ɛ í ya cea inɛ didɔ̃ nɔ í nɛ araare.

⁵ Í ya na inɛ ŋa iyi à mà bɛɛrɛɛ ŋa mii ku jɛ. Í ya maa ye gigii akabuuɛi waati kãma fei.

⁶ Í nyisi inɛɛ ŋa gbugbãi icɛɛ ŋa. Í na ŋa ilɛi inɛ mmu ŋa í jɛ tubu nŋa.

⁷ Icɛi awɔɛ ŋau à jɛ ntɔ nɔ à jɛ dee dee. Nɔ woodaɛ ŋa fei naanɛ í wa sii ntɔ ntɔ.

⁸ Woodaɛ ŋau aa maa wɛɛi do ajɔ fei. Aɔ̃ Lafɛ̃ɛ í jilɛ ŋai si yaase bɛi nŋu takaɛ í jɛ dee dee nɔ í jɛ ntɔ.

⁹ Í nya inɛɛ ŋa wa, nɔ í dĩ akabuu do aŋa hee do ajɔ fei. Iriɛ í má nɔ í nɛ njo.

¹⁰ Bii ì bi i nɛ laakai, jɔ̀ i mà bɛɛrɛi Aɔ̃ Lafɛ̃ɛ titã. Inɛ ŋa iyi à waa jirimaɛ fei, à ya nɛ laakai jiidai. Bɛɛrɛi Aɔ̃ Lafɛ̃ɛ á maa wɛɛi hee do ajɔ fei.