Iri ku kɔ̃ 11 - Bibeli do fee

Waati iyi í jɔ bɛi mii fei í nyɔ

1 Iriu ihɛ̃ ti inɛ ngboi woo kɔ̃ iri ŋai do Davidi.

¹ Iriu ihɛ̃ ti inɛ ngboi woo kɔ̃ iri ŋai do Davidi. Aɔ̃ Lafɛ̃ɛi í jɛ bi ku manjim. Na nŋu, i maà sɔ̃m i ni ŋa n sa bɛi yɛi n koo n manji si iri kuta ŋau.

² Cɔ, ilu inɔ kukã ŋa à so bioo nŋa à dasi afa nŋa à waa wã inɛ dee dee ŋa si ilu kuku ku ba a ta ŋa.

³ Waati iyi woodai ilɛ ŋa a kù waa ce icɛ, bɛirei inɛ dee dee ŋa aa ce.

⁴ Aɔ̃ Lafɛ̃ɛ í wa si kpasɛ̃ kumáɛ wa buba lelei Aɔ̃ si kitãi bommaɛ. Wa cɔ amanɛ ŋa, nɔ wa yɛ ŋa.

⁵ Aɔ̃ Lafɛ̃ɛ wa cɔ inɛ dee dee ŋa do ilu inɔ kukã ŋa. Í cé woo taa inɛ ŋa gbugbã.

⁶ Mii iyi á cuku si ilu inɔ kukã ŋa wai í jɛ ina nyɛnyɛ do fainwita do fufu ku nɛ inya gbãa gɔ. Mii ŋau bɛi aa jɛ ikpɛ̃ iyi aa ba.

⁷ Ntɔ ntɔ, Aɔ̃ Lafɛ̃ɛ í bi inɛ dee dee ŋa domi nŋu takaɛ í jɛ dee dee. Inɛ ŋa iyi à waa ce iyi í jɛ dee dee aa yɔɔ ijuò iju.