Iri ku kɔ̃ 109 - Bibeli do fee

Inɛ iyi à waa yɛ taaleɛ wa tɔɔ sobii Ilaaɔ̃

1 Iriu ihɛ̃ ti inɛ ngboi woo kɔ̃ iri ŋai do Davidi.

¹ Iriu ihɛ̃ ti inɛ ngboi woo kɔ̃ iri ŋai do Davidi. Ilaaɔ̃, awɔi ǹ wa n cĩ, maà ti i maa coko.

² Ntɔ ntɔ, ilu inɔ kukã ŋa do woo sɔ ibo ŋa à waa yɛ taalem. Bii à waa bam ide ku fɔ, à ya maa sɔ iboi.

³ À kaakom nii bii fei do idei inɛ ku cé. Nɔ à waa ce ija do amu ngbɛ ngbɛ.

⁴ Baa do iyi ǹ nɛ kubi nŋa fei, à waa yɛ taalem. Amma amu ǹ wa n ce nŋa kutɔɔ.

⁵ Laalɔi à ya sãam si jiida iyi ǹ ce nŋa. Nɔ à cém baa do iyi ǹ nɛ kubi nŋa fei.

⁶ À ya fɔ si gãmɛm nii a maa ni, ka jɔ̀ inɛ gɔ ku yɛ taaleɛ nɔ lafɛ̃ɛ ku maa leekĩ do awɔ njɛɛ.

⁷ Waati iyi aa na a kiitiɛ, jɔ̀ a yɛ taaleɛ. Jɔ̀ kutɔɔɛ ku jɛ mii laalɔ.

⁸ Maà jɔ̀ kuwɛɛɛ ku maa mɔsi má. Jɔ̀ inɛ mmu gɔ ku gba agbɛɛ si icɛɛ.

⁹ Jɔ̀ amaɛ ŋa a baa a jɛ kɔyɔ ŋa nɔ aboɛ mɔ ku jɛ jaaɔ̃.

¹⁰ Jɔ̀ ama inɛmɔkɔɛ ŋa a dabii a maa bara. Jɔ̀ a fita a jĩò kpasɛ̃ kumbulu nŋau a koo a maa bara.

¹¹ Inɛ iyi í wɛ̃a fia, lafɛ̃ɛ ku gba mii iyi í nɛ fei. Inɛ njoo ŋa a ko mii iyi í nɛ fei.

¹² Inɛ gɔ ku maà cea jiida, nɔ inɛ gɔ ku maà ce araarei kɔyɔɛ ŋa.

¹³ Jɔ̀ a kpa irii dimiɛ ŋa, nɔ a maà ye gigii nŋu do dimiɛ ŋau má si tɔku ŋa iyi aa na a dede.

¹⁴ Jɔ̀ a ye Aɔ̃ Lafɛ̃ɛ gigii kurarai baaɛ do ti balaɛ ŋa. Maà jɔ̀ nkãma ku kpa dulum dii iyeɛ.

¹⁵ Aɔ̃ Lafɛ̃ɛ ku ya maa ye gigii kurara nŋa ŋau waati kãma fei. Nɔ ku kpa iri nŋa si ilɛ mam mam.

¹⁶ Ntɔ ntɔ inɛɛu kù nɛ idɔi jiida kãma ku ce. Í wahala ilu are do hai nɛ gbugbã do ilu inɔ kufɔ hee í jɔ̀ à ku.

¹⁷ Í bi ikpe ntɔ ntɔ. Ikpeu ku naa siɛ. Kù bi kuwee. Kuweeu ku jĩòɛ.

¹⁸ Ikpe ku naa ku biiɛ bɛi ibɔ, ku lɔ siɛ bɛi inyi, ku lɔ siɛ bɛi ikpo si kũkũɛ ŋa.

¹⁹ Ikpeu ku jɛa bɛi jĩnɛ ku dasi, do bɛi kungbã iyi wa dĩ waati kãma fei.

²⁰ Mii iyi Aɔ̃ Lafɛ̃ɛ á sãa woo yɛ taalem do woo fɔ laalɔm ŋa mbɛ.

²¹ Awɔ Aɔ̃ Lafɛ̃ɛm, ceem didɔ̃ na iriɛ. Faabam, domi jiida ku jɛɛ í la.

²² Ilu are do hai nɛ gbugbãi ǹ jɛ, nɔ ǹ ba kumɛɛ hee si lɛlɛi idɔm.

²³ Ǹ wa n nɛ bɛi jĩjĩ iyi wa sɛkɛɛ. À waa lelem nii bɛi kɛtɛngbo.

²⁴ Anu ku dĩ í jɔ̀ ǹ kua gbugbã. Nɔ ari í jɔ̀ ǹ gbɛ.

²⁵ Amui ǹ jɛ mii ku yaako nŋa. À ya cɔm nii nɔ à gbugbã iri.

²⁶ Aɔ̃ Lafɛ̃ɛm, naa i sobim. Faabam si jiida ku jɛɛ.

²⁷ Jɔ̀ inɛ ŋau a mà iyi awɔ Aɔ̃ Lafɛ̃ɛ, awɔi ì faabam.

²⁸ Aŋa, à ya ceekpei, amma awɔ, ì ya weei. Bii à dede sim, anyɔ á mu ŋai. Jɔ̀ amu woo ce icɛɛ n nɛ inɔ didɔ̃.

²⁹ Jɔ̀ woo yɛ taalem ŋau a dasi biti, jɔ̀ anyɔ ku bii ŋa bɛi ibɔ kumboo.

³⁰ An maa n saabu Aɔ̃ Lafɛ̃ɛi hee lele. An maa n cũui si aninii zamaa nla nla,

³¹ domi í ya maa leekĩi do awɔ njɛi ilu are, na ku faabaɛ hai si awɔi inɛ ŋa iyi à waa yɛ taaleɛ ŋa.