Iri ku kɔ̃ 108 - Bibeli do fee

Ǹ bi n jĩi hai amɛɛjuumá

¹ Iriu ihɛ̃ ti Davidii.

² Ilaaɔ̃, naanɛm í wa siɛi ntɔ ntɔ. An kɔ̃ iri n maa n cĩɛi do idɔm fei.

³ Kitigbom, mɔɔlɔm, i jĩ ŋa, domi ǹ nɛ n jĩ amɛɛjuumái.

⁴ Aɔ̃ Lafɛ̃ɛ, an maa n cĩɛi si inɔi inɛi ilɛ ŋa nɔ n kɔ̃ iri n maa n saabuɛ si inɔi inɛi andunya ŋa,

⁵ domi jiida ku jɛɛ í wai hee lele nɔ bɛɛbɛ mɔi à waa yɛ ntɔ ku jɛɛ si kudũi ijĩ ŋa.

⁶ Ilaaɔ̃, nyisi kulaɛ iyi í re lelei Aɔ̃, nɔ i jɔ̀ amboeɛ ku wa si ilɛu fei sãa sãa,

⁷ ku ba baakɔɔɛ ŋa a ba faaba. Jɛɛm nɔ i faaba ŋa do gbugbãɛ.

⁸ Ilaaɔ̃ í fɔ si kpasɛ̃ kumáɛ í ni, amui an jɛ igũ. An kpɛ̃ ilu nlai Sikɛmu, nɔ n wã lɔɔmai Sukɔtuu.

⁹ Amui ǹ nɛ Galaadi, amui ǹ nɛ Manasee. Efaraimui í jɛ fulai isɔ si irim, nɔ Zudaai í jɛ akpai bommam.

¹⁰ Moabui í jɛ bi ku wɛm, Si Edɔmui ǹ nyɔ baatam, nɔ ǹ dɔ̃ anui igũ si ilɛi inɛi Filisi ŋa.

¹¹ Yooi á bɔòm si ilu ku nɛ gbugbãu, yooi á gbãm ku bɔòm hee Edɔmu.

¹² Ilaaɔ̃, kù jɛ awɔi ì kɔ̀si wa? Awɔi i kù sì sooge nwa ŋau.

¹³ Naa i sobi wa si gãmɛi mbɛɛ, domi faabai amanɛ ngbɛi.

¹⁴ Do Ilaaɔ̃, aa ka jɛ igũ. Nŋui á tɛɛsɛ mbɛɛ nwa ŋa.