Iri ku kɔ̃ 106 - Bibeli do fee

Dee dee hai jɛi Izirɛli, dee dee ku jɛi Ilaaɔ̃

¹ I saabu Aɔ̃ Lafɛ̃ɛ ŋa. I saabu Aɔ̃ Lafɛ̃ɛ ŋa, domi í jɛ jiida, nɔ araareɛ í ya maa wɛɛi hee do ajɔ fei.

² Inɛ kãma kaa yɔkɔ ku fɔ mii nla ŋa iyi Aɔ̃ Lafɛ̃ɛ í ce. Inɛ kãma kaa yɔkɔ ku cũu ku to zaka bɛi kulaɛ í to.

³ Ilu inɔ didɔ̃ ŋai inɛ ŋa iyi à waa nɛ si ntɔ, nɔ à waa ce mii iyi í jɛ dee dee waati kãma fei.

⁴ Aɔ̃ Lafɛ̃ɛ, ye gigim awɔ iyi ì jɛ jiida bi awa inɛɛ ŋa. Awɔ woo faaba nwa, naa i sobim.

⁵ Do yaase bɛɛbɛ an yɔkɔ n yɛ didɔ̃ iyi ì jilɛa inɛɛ ŋa iyi ì cicau. An maa n nyaanyii na inɔ didɔ̃i inɛɛ ŋau. An maa n tɔɔ fufui na inɛ ŋa iyi à jɛ tɛɛ ŋau.

⁶ Awa à ce dulum nii bɛi bala nwa ŋa. À ce kurara ŋa, nɔ à cei bɛi ilu inɔ kukã ŋa.

⁷ Bala nwa ŋau a kù gbɔ yaasei mii nla ŋa iyi Ilaaɔ̃ í ce waati iyi à wa Ezibiti, a kù ye baa gigii jiida ŋa iyi í ce. À dedeò ide ku kɔ̀i kɔkɔi Tenkui Njeeu.

⁸ Amma í faaba ŋai na bɛɛrɛi nŋu takaɛ, ku ba ku nyisiò gbugbãɛ.

⁹ Í jɔ̀ Tenkui Njeeu í kpɛ̃, inyiu í gbɛ. Í jɔ̀ à nɛ si inɔɛ bɛi si gbaa.

¹⁰ Í faaba ŋa hai si awɔi inɛ iyi í cé ŋa. Í yá ŋai hai si awɔi mbɛɛ ŋau.

¹¹ Inyi í jɛ mbɛɛ nŋa ŋau, baa inɛ akã kù gbe.

¹² À dasi ideɛ ŋa naanɛ, nɔ à kɔ̃ iri à waa cũu.

¹³ Amma à saasa à gbɛjɛ icɛɛ ŋa. A kù degbe iri ku kpaɛ má.

¹⁴ Si gbaau, à ce binɛi mii iyi a kù nɛ, nɔ si inya ngbɛu à dede idɔɔkɔ̃i Ilaaɔ̃.

¹⁵ Ŋɔi Ilaaɔ̃ í mu nŋa ijɛ iyi à tɔɔɛu, í mu nŋa à jɛ hee í cé ŋa.

¹⁶ Si asɔ nŋau, à ce igu si gãmɛi Moizi do Arɔ̃ɔ nŋu iyi Aɔ̃ Lafɛ̃ɛ í nya ikã í jɛ woo weeu.

¹⁷ Ŋɔi ilɛ í la í mi Datãa, nɔ í bii inɛi Abiramu ŋa.

¹⁸ Ina í jo inɛ nŋa ŋau, nɔ amɛi inau í jo ilu inɔ kukã ŋau.

¹⁹ À ce ama kɛtɛ gɔ si iri kutai Ɔrɛbu, nɔ à gulɛ à waa tɔɔ iwɛ̃ iyi à ce do isɔ iyi à yɔu.

²⁰ À kpaasi Ilaaɔ̃ ilu amboe nŋa do mii iyi í jɔ kɛtɛ iyi í jɛ mɛɛmu ku jɛ fɔfɔ.

²¹ À gbɛjɛ Ilaaɔ̃ woo faaba nŋa, nŋu iyi í ce mii nla ŋa Ezibiti,

²² nɔ í ce mii ŋa iyi à to biti si ilɛi Kamu. Í ce maamaake ŋa si inɔ Tenkui Njeeu.

²³ Ŋɔi í ni nŋu á ce nfe nŋai mam mam. Amma Moizi nŋu iyi í cicau í tɔɔɛ í ni ku maà ce nfe nŋa si idɔɔkɔ̃ɛu.

²⁴ Inɛ ŋau a kù saalu ilɛ jiidau, nɔ a kù dasi idei kuwã iyi Aɔ̃ Lafɛ̃ɛ í ce nŋau naanɛ.

²⁵ À wasi ku gbagba si inɔ ilei acɔ nŋa ŋa, a kù jirima ide ku fɔi Aɔ̃ Lafɛ̃ɛu.

²⁶ Ŋɔi Aɔ̃ Lafɛ̃ɛ í wu si ŋa awɔ nɔ í fɔ do kugbasi í ni nŋu á jɔ̀ a kui si gbaau.

²⁷ Nɔ í fɔ má do kugbasi í ni nŋu á jɔ̀ tɔku nŋa ŋa a fangaa si inɔi dimi mmu ŋa, nɔ ku jɔ̀ a ku si aninii dimi ŋa iyi a kù mà nŋu Aɔ̃ Lafɛ̃ɛu.

²⁸ Inɛ ŋau à lɔsi iwɛ̃ iyi à ya kpe Baali-Peɔɔ ku tɔɔ, nɔ à waa jɛ sɔndai kuwee iyi à cea iku ŋa.

²⁹ À kɔ̃ idɔi Aɔ̃ Lafɛ̃ɛ do kuce nŋa ŋa. Ŋɔi í jɔ̀ wahala í cuku si ŋa.

³⁰ Ŋɔi Fineɛzi í teese ideu, nɔ wahalau í leekĩ.

³¹ Iyi bɛi í jɔ̀ Aɔ̃ Lafɛ̃ɛ í kàa si inɛ dee dee, hee ku koo si tɔku do tɔku ŋa hee do ajɔ fei.

³² À dede idɔɔkɔ̃i Aɔ̃ Lafɛ̃ɛ kɔkɔi isɔ̃i Meriba. Kuce nŋau bɛi í jɔ̀ Moizi í ba ijuukpã.

³³ À dede laakaiɛ nɔ í fɔ ide iyi kù jɔ.

³⁴ A kù kpa inɛi Kanaã ŋa iyi Aɔ̃ Lafɛ̃ɛ í nyisi ŋau.

³⁵ À tɔtɔɔi do dimi ŋa iyi a kù mà Ilaaɔ̃, nɔ à waa too si kuce nŋa ŋau.

³⁶ À koo à tɔɔ iwɛ̃ nŋa ŋau, nɔ iwɛ̃ ŋaui à jɛ nŋa bɛi cɛkũm.

³⁷ À cea iwɛ̃ nŋa ŋau kuweei ama inɛmɔkɔ do ama inaabo nŋa ŋa.

³⁸ À dikã njɛi ama inɛmɔkɔ do ti ama inaabo nŋa ŋa iyi a kù ce taale kãma. Ama nŋa ŋaui à ceaò iwɛ̃i Kanaã ŋau kuwee, nɔ ilɛu í so riisi na njɛi amu ŋa iyi à dikãu.

³⁹ Iwɛ̃ ŋa ku tɔɔ nŋau í yɛi bɛi sakara ku ce bi Aɔ̃ Lafɛ̃ɛ.

⁴⁰ Ŋɔi idɔɔkɔ̃i Aɔ̃ Lafɛ̃ɛ í dede si inɛɛ ŋau. Si idɔɔkɔ̃ɛu, í cé inɛ ŋa iyi à jɛ tɛɛ ŋau.

⁴¹ Í so ŋa í daa dimi mmu ŋa si awɔ, nɔ inɛ ŋau à cé ŋa à waa ta nŋa gbugbã.

⁴² Mbɛɛ nŋa ŋa à kãmia ŋa nɔ à baa à wa si awɔ gbugbã nŋa.

⁴³ Tuuba nkpɔ nkpɔi í faaba ŋa. Amma si kuce nŋa, à dedeò ide ku kɔ̀ nɔ à teese à mile si kurara nŋa.

⁴⁴ Ŋɔi Aɔ̃ Lafɛ̃ɛ í gbɔ anu ku dɔ̃ nŋa, nɔ í yɛ wahala nŋa.

⁴⁵ Í ye gigii akabuu iyi í dĩ do aŋa. Í ce araare nŋa si jiida ku jɛɛ.

⁴⁶ Í jɔ̀ inɛ ŋa iyi à waa mu ŋa aru ŋau fei à ce araare nŋa.

⁴⁷ Aɔ̃ Lafɛ̃ɛ nwa, faaba wa. Nya wa ikã hai si inɔi dimi mmu ŋa i tɔtɔɔ wa ku ba ka saabuɛ, awɔ iyi ì má. Nɔ ka wɛɛò inɔ didɔ̃ ka maa cĩɛ.

⁴⁸ Saabu ku jɛ ti Aɔ̃ Lafɛ̃ɛi inɛi Izirɛli ŋa hee do ajɔ fei. Nɔ zamaau fei ku jɛ ku ni, ami, i saabu Aɔ̃ Lafɛ̃ɛ ŋa.