Iri ku kɔ̃ 105 - Bibeli do fee

Idei dee dee ku jɛi Aɔ̃ Lafɛ̃ɛ

¹ I saabu Aɔ̃ Lafɛ̃ɛ nɔ i cũu ŋa. I sisia dimi mmu ŋa mii nla ŋa iyi í ce ŋa.

² I kɔ̃a iri do jĩnɛi iri ku kɔ̃ ŋa. I sisi maamaake ŋa iyi í ce fei ŋa.

³ I tɔɔ fufu na iriɛ ŋa. Nŋui í jɛ Aɔ̃ Lafɛ̃ɛ. Inɛ ŋa iyi à waa dɛdɛɛ ŋa fei, a wɛɛò inɔ didɔ̃.

⁴ I dɛdɛ Aɔ̃ Lafɛ̃ɛ ilu gbugbãu fei ŋa. I ya maa dɛdɛɛ waati kãma fei ŋa.

⁵ I ya ye gigii mii nla nla ŋa iyi í ce do maamaakeɛ ŋa do kiitiɛ ŋa,

⁶ iŋɛ tɔkui Aburahamu woo ce icɛɛ ŋa, iŋɛ iyi ì jɛ tɔkui Zakɔbu iyi í cicau ŋa.

⁷ Aɔ̃ Lafɛ̃ɛi í jɛ Ilaaɔ̃ Lafɛ̃ɛ nwa. Nŋui wa kiiti inɛi andunya fei.

⁸ I ya maa ye gigii akabuuɛi do ide iyi í fɔ í jilɛ hee si tɔku dubusia.

⁹ Akabuuui í dĩ do Aburahamu, nɔ í cea Izaaki kuwã do kugbasi.

¹⁰ Í jilɔɔi bɛi wooda ti Zakɔbu nɔ kaa nɛ kɔɔ bi inɛi Izirɛli ŋa.

¹¹ Si akabuuu í fɔ í ni, amu Aɔ̃ Lafɛ̃ɛ an na ŋɛ ilɛi Kanaã ku jɛ tubu nŋɛ.

¹² Waati bɛɛbɛ, inɛ ŋau a kù kpɔ. Akpɔ nŋau í kere í caa. Isɛ mmu ŋai à waa jɛ si ilɛu.

¹³ À ya maa nɛ̀i si ilɛ do ilɛ, do si dimi do dimi.

¹⁴ Amma Aɔ̃ Lafɛ̃ɛ ci ya jɔ̀ inɛ kãma ku wahala ŋa. Na iri nŋa í kpã ilaalu ŋa iju.

¹⁵ Í ni, i maà lu inɛ ŋa iyi ǹ cicau, nɔ i maà cea waliim ŋa laalɔ ŋa.

¹⁶ Í jɔ̀ ari í naa si ilɛi Kanaã nɔ sɔnda kù wɛɛ iyi aa jɛ.

¹⁷ Amma í jɔ̀ inɛ gɔ í cua nŋa wa si ilɛi Ezibiti, nŋui í jɛ Zozɛfu iyi à ta bɛi aruu.

¹⁸ Ŋɔi à daa si sesee si kutɛɛ ŋa nɔ à daa si isɔ si kɔ̃ɔ,

¹⁹ hee í koo í to waati iyi ide iyi Aɔ̃ Lafɛ̃ɛ í sɔ̃ɔu í kɔ̃. Waati bɛɛbɛi í jɔ̀ í fita si laakai ku cɔu.

²⁰ Ilaalu í na wooda í ni a jɔ̀ Zozɛfu. Nŋu, inɛ ngboi ilɛu í ni a fũu.

²¹ Nɔ í jɔ̀ Zozɛfu í jɛ inɛ ngbo si inɔ kpasɛ̃ɛ, nɔ í jɛ inɛ ngboi mii iyi í nɛ fei,

²² ku ba ku kɔ akawei ilaalu ŋau nɔ ku muaa inɛ ngbo woo kɔɛ ŋau bisi.

²³ Do yaase bɛɛbɛi inɛi Izirɛli ŋau à naaò wa Ezibiti. Nɔ Zakɔbu wa jɛ bɛi inɛ njoo si ilɛi Kamu.

²⁴ Nɔ Ilaaɔ̃ í jɔ̀ inɛɛ ŋau à bí nkpɔ nkpɔ, nɔ à ba gbugbã à re mbɛɛ nŋa ŋau.

²⁵ Ŋɔi í kpaasi idɔi inɛi Ezibiti ŋau í jɔ̀ à cé zamaaɛu nɔ à waa cea woo ce icɛɛ ŋau laalɔ.

²⁶ Aɔ̃ Lafɛ̃ɛ í bɛ Moizi woo ce icɛɛu wa do Arɔ̃ɔ iyi í cicau.

²⁷ Ŋɔi Aɔ̃ Lafɛ̃ɛ í jɔ̀ à ce mii nla nla ŋa bi inɛi Ezibiti ŋau. À ce maamaake ŋa si ilɛi Kamu.

²⁸ Í jɔ̀ ilu kuku í naa nɔ inyau fei í dũ, nɔ inɛ kãma kù jɛ kù kɔ̀ ide.

²⁹ Í jɔ̀ inyi nŋa ŋau í kpɔò njɛ, nɔ í kpa cɛ̃ɛ nŋa ŋau.

³⁰ Ilɛ nŋau í kɔ̃ do kpɔlɔ kelem ŋa hee do si inɔ ile ŋa si inɔ kpasɛ̃i ilaalu nŋau fei.

³¹ Ilaaɔ̃ í na wooda, nɔ leka do nyɛnyɛm ŋa à naa si ilɛu fei.

³² Í jɔ̀ kutai ijĩ ŋa à cuku wa bɛi ijĩ si ilɛu, nɔ dagba lele í jɔ̀ ilɛu í mu ina.

³³ Í ce nfei jĩi ndii rezɛ̃ɛ nŋa ŋa do ti figi nŋa ŋau, nɔ í cɛ jĩi ndii ilɛ nŋa ŋau.

³⁴ Ilaaɔ̃ í na wooda má, nɔ kɛtɛngbo ŋa à naa si ilɛu bãm bãm.

³⁵ Aŋai à ŋɔ fɔfɔi ilɛu do amaajɛi ilɛu fei.

³⁶ Ilaaɔ̃ í jɔ̀ à kpa ama yemma nŋa ŋa fei si ilɛu, amu ŋa iyi à bí si waatii awaasũ nŋa ŋau.

³⁷ Nɔ í jɔ̀ inɛɛ ŋa à fita do isɔ fũfũ do wura. Si dimi ŋau inɛ gɔ kù koosɛ.

³⁸ Inɛi Ezibiti ŋa à nɛ inɔ didɔ̃ si kufita nŋau, domi njo nla nlai í mu ŋa.

³⁹ Í jɔ̀ kudũi ijĩ í bii ŋa, nɔ idũ inai í ya jɔ̀ ku má nŋa inya.

⁴⁰ Si kutɔɔ nŋa, à tɔɔɛ sɔnda, nɔ í jɔ̀ wete ŋa à naa, nɔ í jɔ̀ à ba pɛ̃ɛ wa hai lelei Aɔ̃ à jɛ à yo.

⁴¹ Í jɔ̀ kuta í la, nɔ inyi wa cã wa. Inyiu wa cãi bɛi inyii ido nla si gbaa,

⁴² domi wa ye gigii kuwãɛ iyi í cea Aburahamu woo ce icɛɛu.

⁴³ Í jɔ̀ inɛɛ ŋau à fita wai do inɔ didɔ̃. Inɛɛ ŋa iyi í cicau, à fita wai do anu ku dɔ̃ do inɔ didɔ̃ nla nla.

⁴⁴ Í na ŋa ilɛi inɛ mmu ŋa. Nɔ aŋai à jɛ ribai icɛi inɛ ŋau fei,

⁴⁵ ku ba a jirima ikɔɛ ŋa nɔ a jirima woodaɛ ŋa. I saabu Aɔ̃ Lafɛ̃ɛ ŋa.