Iri ku kɔ̃ 104 - Bibeli do fee

Ka cĩ Aɔ̃ Lafɛ̃ɛ woo takau

¹ Aɔ̃ Lafɛ̃ɛ, an cĩɛi. Aɔ̃ Lafɛ̃ɛm, kulaɛ í caa. Ì nɛ yiiko do bɛɛrɛ.

² Ì bii araɛi do inya kumá bɛi ibɔ nla, nɔ ì tɛ lele bɛi acɔ.

³ Ì ce bi kuwaɛi hee lelei Aɔ̃. Ì so kudũi ijĩ í jɛ sarɛtii igũɛ, nɔ ì ya maa nɛi do fufu.

⁴ Ì jɔ̀ fufu í jɛ amaabɛɛ, nɔ ì jɔ̀ kuŋɔi ijĩ í jɛ woo ce icɛɛ.

⁵ Ì jilɛ icui ilɛ í nɛ gbugbã, nɔ kaa yaga pai.

⁶ Ì biiɛ do inyi nla bɛi acɔ. Inyi ŋau à bɔ hee si antaii iri kuta ŋau.

⁷ Amma waati iyi ì waa kpã ŋa iju à waa sa. Waati iyi à gbɔ imuɛ bɛi kulai ijĩ à waa sa.

⁸ À gũ iri kuta ŋau nɔ à waa kita si lɔɔma ŋa tengi bii ì ce nŋa bi kuwau.

⁹ Ì nyaa inyi ŋa kɔɔ iyi a kù nɛ ku kua, ku ba a maà na a bii ilɛu má.

¹⁰ Í ya jɔ̀ inyii isɔ̃ ŋa à maa cãi si acãi inyi ŋa. À ya maa cãi si afei iri kuta ŋa.

¹¹ Tengi bɛi mɛɛmui sako ŋa fei à ya maa mɔ. Inyiui sɛnga ŋa à ya na a nyaò agbɛ nŋa.

¹² Kɔkɔɛ bɛi yɛi ŋa à ya koo a ce bi kuwa nŋa, nɔ a maa kpata si inɔ wua ŋau.

¹³ Hai lelei Aɔ̃ bi kuwaɛui ì ya maa fãsi iri kuta ŋa inyi wa. Nɔ ì ya jɔ̀ ilɛ ku kɔ̃i do mii jiidaɛ ŋa.

¹⁴ Awɔi ì ya jɔ̀ fɔfɔ ŋa a fita na mɛɛmu ŋa, nɔ ì ya jɔ̀ amaajɛ ŋa iyi amanɛ wa logooa ŋau mɔ a fita ku ba ku ba mii ku jɛ,

¹⁵ nɔ ku ba atɛ̃ vɛ̃ɛ iyi á jɔ̀ ku wɛɛò inɔ didɔ̃, do ikpo iyi á jɔ̀ wajuɛ ku maa daana, do sɔnda iyi á jɔ̀ ku ba gbugbã.

¹⁶ Jĩi ndii sɛɛdii Libãa ŋa iyi Aɔ̃ Lafɛ̃ɛ í lɔu à ya maa ba inyi iyi à nɛ bukaataɛ.

¹⁷ Si bɛi yɛi ŋa à ya ce bi kuwa nŋa. Si jĩi ndii sipɛrɛɛsi ŋai tilongo í ya ce bi kuwaɛ.

¹⁸ Iri kuta ŋa iyi à gboka ŋaui à jɛ bi kuwai iwo ido ŋa. Kuta ŋai à jɛ bi kuwai damaa ŋa.

¹⁹ Aɔ̃ Lafɛ̃ɛ í ce cukpai ku nyisiò kɔɔi waati ŋa, nɔ inunu í mà waati iyi nŋu á ya lɔ.

²⁰ Ì ya naaò ilu kuku wai nɔ idũ ku dũ. Waati bɛɛbɛi mɛɛmui sako ŋa à ya maa dabii.

²¹ Ama muusu nla ŋa à ya maa dɔ̃ anui a maa dɛdɛ iŋa iyi aa ŋɔ. À ya maa tɔɔ Ilaaɔ̃ sɔnda nŋai.

²² Waati iyi inunu í fita, à ya fa ara nŋai nɔ a koo a sũ kolo nŋa ŋa.

²³ Amanɛ í ya fitai ku nɛ̀ bi icɛɛ. Nɔ si icɛɛui í ya wa hee alɛ koo lɛò.

²⁴ Aɔ̃ Lafɛ̃ɛ, icɛɛ ŋa a kù nɛ jia, ì ce fei ndɛɛi do laakai. Ilɛ í kɔ̃i do mii ŋa iyi ì taka.

²⁵ Tenku wee í la nɔ í cĩ. Bɛi mɛɛmu ŋa à ya wa hai nɛ jia, keekeò nla.

²⁶ Si inɔ tenkuu bɛi akɔi inyi ŋa à ya maa nɛ̀, nɔ bɛi mɛɛmui inɔ inyi gɔ iyi í yɛ bɛi njo í ya maa cɛi.

²⁷ Siɛi kpãa ku cɔi mɛɛmu ŋau fei í ya wa, ku ba ì ya na ŋa sɔnda si waati iyi í jɔ.

²⁸ Bii ì mu nŋa sɔnda, aa gbai. Bii ì fũ awɔɛ, aa ba mii iyi í jɔ feii.

²⁹ Amma bii ì kɔ̀, zigi nŋa á dai. Bii ì nya hunde nŋa, aa kui nɔ a sinda a nyi si sãa.

³⁰ Bii ì taka ŋa ì da nŋa si hunde, mii fei á mɔsii ku maa koo si ilɛ.

³¹ Aɔ̃ Lafɛ̃ɛ, jɔ̀ amboeɛ ku wɛɛ do ajɔ fei nɔ inɔ didɔ̃ ku jɛ tɛɛ na icɛɛ ŋa iyi ì ce.

³² Ì cɔ ilɛ, nɔ wa yaya. Ì lu iri kuta ŋa, nɔ à waa ce cua.

³³ An maa n kɔ̃a Aɔ̃ Lafɛ̃ɛ irii waati iyi ǹ wɛɛ fei. An kɔ̃ iri n maa n cĩ Aɔ̃ Lafɛ̃ɛm nii waati iyi ǹ wɛɛ fei.

³⁴ Jɔ̀ kutɔɔm nɔu ku dɔ̃ɛ si. Amu, an maa n wɛɛò inɔ didɔ̃i na Aɔ̃ Lafɛ̃ɛ.

³⁵ Aɔ̃ Lafɛ̃ɛ, jɔ̀ ilu dulum ŋa a kpa iri si ilɛ. Maà jɔ̀ ilu inɔ kukã ŋa a maa wɛɛ. Aɔ̃ Lafɛ̃ɛ an maa n cĩɛi. I saabu Aɔ̃ Lafɛ̃ɛ ŋa.