Iri ku kɔ̃ 103 - Bibeli do fee

Aɔ̃ Lafɛ̃ɛ an cĩɛi

1 Iriu ihɛ̃ ti Davidii.

¹ Iriu ihɛ̃ ti Davidii. Aɔ̃ Lafɛ̃ɛ, an cĩɛi. Ǹ bi n cũui do idɔm fei, nŋu iyi í má.

² Ntɔ ntɔ, ǹ bi n saabu Aɔ̃ Lafɛ̃ɛi, nɔ n maà n gbɛjɛ jiida ŋa iyi í ce baa akã.

³ Nŋui í ya ceem suurui kuraram ŋa fei. Nŋui í ya jɔ̀ n ba iri si bɔ̃ɔm ŋa fei.

⁴ Nŋui í nyam wa hai si anui iku. Nŋui í biim do jiida ku jɛ do araare.

⁵ Nŋui í jɔ̀ ǹ nɛ amani nkpɔ nkpɔ si agbom nɔ í jɔ̀ hundem í sɔ bɛi ti kungbã.

⁶ Aɔ̃ Lafɛ̃ɛi í ya ce kiiti dee dee. Í ya jɔ̀ inɛ ŋa iyi à waa taa gbugbã fei a ba ntɔ.

⁷ Í jɔ̀ Moizi í mà mii ŋa iyi í dasi idɔ ku ce nɔ í nyisi inɛi Izirɛli ŋa icɛ maamaakeɛ ŋa.

⁸ Aɔ̃ Lafɛ̃ɛ í jɛ ilu araare, nɔ í jɛ jiida. Í nɛ temua, nɔ jiida ku jɛɛ í la.

⁹ Ci ya maa yɛ taalei inɛ do ajɔ fei. Ci ya maa mu inɛ do mbɛɛtɛ do ajɔ fei.

¹⁰ Ci ya kpã wa iju bɛi dulum du wa ŋa í to. Ci ya nɔ ku sã nwa gbesei kurara nwa ŋau bɛi í nɛ ku to.

¹¹ Bɛi lele do ilɛ à jĩò njɛ, bɛɛbɛi jiida ku jɛi Aɔ̃ Lafɛ̃ɛ í la si gãmɛi inɛ ŋa iyi à mà bɛɛrɛɛ.

¹² Bɛi nunui daakɔ í jĩò nunui alɛ, bɛɛbɛi í ya jɔ̀ kurara nwa ŋa a jĩò wa.

¹³ Bɛi baa í ya nɛ araarei amaɛ ŋa, bɛɛbɛi Aɔ̃ Lafɛ̃ɛ í ya nɛ araarei inɛ ŋa iyi à mà bɛɛrɛɛ.

¹⁴ Í mà mii iyi í ce wa do. Wa ye gigi iyi do sãai í ce wa.

¹⁵ Amanɛ, kuwɛɛɛ í yɛi bɛi fɔfɔ. Í yɛi bɛi fɔfɔ iyi í da koko si inɔ sako.

¹⁶ Waati iyi fufu í naa siɛ, ci ya wɛɛ má. Nɔ tengi bii í tako í wau, a ci ya mà agbɛu má.

¹⁷ Amma jiida ku jɛi Aɔ̃ Lafɛ̃ɛ, í ya maa wɛɛi do inɛ ŋa iyi à waa jirimaɛ do ajɔ fei, nɔ dee dee ku jɛɛ mɔ í ya wai si tɔku nŋa ŋa,

¹⁸ bii à waa jirima akabuuɛ, nɔ à waa ye gigii ideɛ ŋa à waa ceò ŋa icɛ.

¹⁹ Aɔ̃ Lafɛ̃ɛ í jilɛ kitãi bommaɛi lelei Aɔ̃, nɔ bommaɛui í wa antaii mii fei.

²⁰ I cĩ Aɔ̃ Lafɛ̃ɛ ŋa, iŋɛ amaleka ilu gbugbãɛ ŋa. Iŋɛi ì ya gbɔ ideɛ nɔ i ya ceò icɛ ŋa.

²¹ I cĩ Aɔ̃ Lafɛ̃ɛ ŋa, iŋɛ sooge woo ce icɛɛ ŋau iyi ì waa ce idɔɔbiɛ ŋa.

²² Iŋɛ iyi Aɔ̃ Lafɛ̃ɛ í taka fei, i cũu ŋa tengi bii wa jɛ inɛ ngbo fei. Aɔ̃ Lafɛ̃ɛ, an cĩɛi.