Iri ku kɔ̃ 102 - Bibeli do fee

Inɔ kufɔ do kpãa ku cɔ

¹ Kutɔɔi ilu inɔ kufɔ gɔ iyi í kua gbugbã nɔ í koo wa weewea bi Aɔ̃ Lafɛ̃ɛ.

² Aɔ̃ Lafɛ̃ɛ, gbɔ kutɔɔm waati iyi ǹ dɔ̃ anu ǹ wa n tɔɔɛ faaba.

³ Maà fa wajuɛ hai bi tom si ajɔi wahala. Waati iyi ǹ wa n dɔ̃ siɛ anu, sotĩ i gbɔ nɔ i jɛɛm gbãa gbãa,

⁴ domi kuwɛɛm wa nɛi bɛi cua, nɔ kũkũm ŋa à waa jo bɛi jĩi iyi í mu ina.

⁵ Idɔm wa jojo, nɔ í gbɛ bɛi fɔfɔ hee ǹ gbɛjɛ sɔndam ku jɛ.

⁶ Weeweam í la hee í caa nɔ í jɔ̀ ǹ gbɛ hee kũkũi aram í fita gbugbãa.

⁷ Ǹ jɔ yɛi ku wa gbaa gɔ. Ǹ yɛi bɛi gbĩgbĩ iyi í wa si kpasɛ̃ kumbulu ŋa.

⁸ Ǹ wɔ̀ njooi bɛi yɛi iyi í wa antaii ile nŋu akã.

⁹ Ajɔ fei, mbɛɛm ŋa à ya maa bum nii. À ya wɛɛò idɔɔkɔ̃i na irim nɔ a maa ceekpem.

¹⁰ Ilúlui í jɛ sɔnda iyi ǹ ya n maa n jɛ nɔ mii iyi ǹ wa n mɔ fei, í ya yɔgɛɛi do cikãajum.

¹¹ Aɔ̃ Lafɛ̃ɛ, idɔɛ í kɔ̃ sim ntɔ ntɔ. Si idɔɔkɔ̃ɛu, ì wum nɔ ì nyɔm hee jĩijĩ.

¹² Kuwɛɛm í yɛi bɛi jĩjĩ iyi wa sɛkɛɛ, nɔ ǹ yɛi bɛi fɔfɔ iyi wa gbɛ.

¹³ Amma Aɔ̃ Lafɛ̃ɛ, awɔi ì jɛ ilaalu do ajɔ fei, nɔ inɛ ŋa aa maa ye gigiɛi hee ku koo si tɔku do tɔku ŋa.

¹⁴ Aa dede i ce araarei Siɔ̃ɔi, domi awaati iyi ì jilɛ i cea didɔ̃u, awaatiui í to wa bɛ.

¹⁵ Awa woo ce icɛɛ ŋa, à nɛ kubii kutai Siɔ̃ɔ ŋau nɔ araare wa mu wa na ilùlùɛ ŋau.

¹⁶ Si bɛɛbɛi dimi ŋa aa jirima Aɔ̃ Lafɛ̃ɛ, nɔ ilaalui andunya ŋa fei, aa mà bɛɛrɛɛ.

¹⁷ Ntɔ ntɔ, Aɔ̃ Lafɛ̃ɛ á teese ku ma Siɔ̃ɔ, nɔ aa yɔɔi si amboeɛ.

¹⁸ Á gbɔ kutɔɔi hai nɛ gbugbã ŋa. Kaa ce si atafii.

¹⁹ Aa kɔ ideu ihɛ̃i na tɔku ŋa iyi aa na a naa, nɔ aŋa iyi aa jɛ zamaa iyi á na ku naau aa maa saabu Aɔ̃ Lafɛ̃ɛi.

²⁰ Aɔ̃ Lafɛ̃ɛ í kɔmba hai lelei Aɔ̃, hai si kpasɛ̃ kumáɛu wa cɔ ilɛ wa,

²¹ ku ba ku gbɔ weeweai inɛi piisɔ̃ɔ, nɔ ku nya inɛ ŋa iyi à wa si anui iku.

²² Si bɛɛbɛ, aa maa sisi idei Aɔ̃ Lafɛ̃ɛ Siɔ̃ɔ, nɔ a maa cũu si ilui Zeruzalɛmu.

²³ Tengi bɛi dimi ŋa do bomma ŋa aa tɔtɔɔ ajɔ, ku ba a maa tɔɔ Aɔ̃ Lafɛ̃ɛ.

²⁴ Si kuwɛɛm, í jɔ̀ ǹ kua gbugbã, nɔ í kaye kukpɔi ajɔm ŋa.

²⁵ Ǹ ni, Aɔ̃ Lafɛ̃ɛm, maà kpam si waati iyi kuwɛɛm í to anini, awɔ iyi ì wɛɛ do ajɔ fei.

²⁶ Awɔi ì ce ilɛ hai ku kpɛ, nɔ lelei Aɔ̃ í jɛ icɛi awɔɛ ŋa.

²⁷ Aŋa fei aa kpa irii, amma awɔ, aa maa wɛɛi. Aa gboi bɛi jaaɛ, nɔ aa kpaasi ŋai bɛi ibɔ nɔ a kaa wɛɛ má.

²⁸ Amma awɔ, aa maa wɛɛi, nɔ kuwɛɛɛ kaa nɛ kɔɔ.

²⁹ Amai woo ce icɛɛ ŋai aa ba bi kuwa. Nɔ tɔku nŋa ŋau aa maa leekĩi dim dim si wajuɛ.