Iri ku kɔ̃ 101 - Bibeli do fee

Ilaalu í na araɛ ku jirima ntɔ si wajui Ilaaɔ̃

1 Iriu ihɛ̃ ti Davidii.

¹ Iriu ihɛ̃ ti Davidii. Aɔ̃ Lafɛ̃ɛ, an kɔ̃ iri si gãmɛi dee dee ku jɛ do si gãmɛi ntɔ. Awɔi an cĩ si iri ku kɔ̃m ŋau.

² Ǹ bi n gbɔ yaasei kpãa iyi í jɛ dee dee, nɔ n tooɛ. Waati yoomai aa naa bi tom. An maa n nɛi do idɔ iyi í má si aninii inɛi kpasɛ̃m ŋa.

³ N kaa n jɔ̀ ijum ku maa wa si mii laalɔ kãma, ǹ cé kucei inɛ ŋa iyi a kù jɛ dee dee bi Ilaaɔ̃, nɔ n kaa n jɔ̀ awaò ŋa ka nɛ anu akã.

⁴ N kù bi n nɛ idɔ iyi kù má. An fa aram n jĩò woo ce laalɔ ŋai.

⁵ Inɛ iyi wa sɔ irii kpaasiɛ si asii, an jɔ̀ ku cokoi. N kaa n wɛɛ do inɛ iyi í donda kpaasiɛ, nɔ í jɛ ilu faau.

⁶ Ijum á maa wai si inɛ ŋa iyi à jɛ ilu naanɛ ŋa si ilɛu, ku ba a maa wa kɔkɔm. Inɛ iyi wa nɛ si dee dee ku jɛ, lafɛ̃ɛi á jɛ woo ce icɛm.

⁷ Inɛ iyi wa ce zamba, kaa wa si kpasɛ̃m. Inɛ iyi wa sɔ ibo, kaa wa si wajum.

⁸ Daakɔ fei, an jɔ̀ a ya kpa inɛ laalɔ ŋa feii si ilɛu. Nɔ n nya woo ce laalɔ ŋau fei hai si ilui Aɔ̃ Lafɛ̃ɛu.