Iri ku kɔ̃ 10 - Bibeli do fee

¹ Aɔ̃ Lafɛ̃ɛ, na mii í jɔ̀ ì jĩim. Na mii í jɔ̀ ì sa ì manji waati iyi ǹ wa si wahala.

² Ilu inɔ kukã ŋa si faau nŋa à waa taa ilu are ŋa gbugbã. Ilu are ŋau à dasi cɛkũm dii inɛ laalɔ ŋau.

³ Ilu inɔ kukã í ya maa tɔɔ fufui si laalɔ iyi í bi ku ce. Bii í ba í coo í ya bu Aɔ̃ Lafɛ̃ɛi nɔ ku maa yaakoɛ.

⁴ Ilu inɔ kukã í ya fɔi do yaako si idɔɛ ku maa ni, Ilaaɔ̃ ci ya kpã inɛ iju si nkãma. Ilaaɔ̃ kù wɛɛ.

⁵ Mii iyi í dasi idɔ ku ce fei í ya cei, baaɛ ci ya wa si do kiitii Ilaaɔ̃. Í ya fufu mbɛɛɛ ŋai do gɛlɛɛ ku lele ŋa.

⁶ Í ya maa nii, n kaa n cuku pai. laalɔ kaa bam ajɔ kãma.

⁷ Ikpe, do ibo, do gbugbã ku taa inɛi í ya maa kɔ̃ si gɛlɛɛ. Ide laalɔ do idei inɔ kukãi í ya wa si gɛlɛɛ.

⁸ Í ya koo maa manji anyii ilu ŋai, ku maa kpa hai nɛ taale ŋa, nɔ ijuɛ si hai nɛ gbugbã ŋai í ya maa kãsi.

⁹ Í ya koo maa manjii bɛi muusu nla iyi í wa si koloɛ, nɔ ku zamba hai nɛ gbugbã ŋa ku mu ŋa do cɛkũm dɛɛ.

¹⁰ Í ya bate ku kɔmbai, nɔ hai nɛ gbugbã ŋa a na a cuku si awɔɛ.

¹¹ Si idɔɛ í ya fɔi ku maa ni baai Ilaaɔ̃ kù wa si do kucei nŋu. Ci ya cɔ hee ku yɛ ngɔgɔ iyi nŋu wa ce.

¹² Aɔ̃ Lafɛ̃ɛ, dede, wu awɔɛ lele, maà gbɛjɛ inɛ ŋa iyi à wa si wahala.

¹³ Na mii í ce aa jɔ̀ inɛ laalɔ ku maa yaako awɔ Ilaaɔ̃ ku maa ni i kaa kpã nŋu iju.

¹⁴ Awɔ Aɔ̃ Lafɛ̃ɛ, ì waa yɛ mii fei, bitandii ilu are do wahalaɛ fei ì waa yɔɔ. Mii iyi í ba hai nɛ gbugbã fei awɔi í ya jɔ̀a, nɔ awɔi ì ya naa i sobi kɔyɔ ŋa.

¹⁵ Kɛkɛ gbugbãi ilu inɔ kukã, nŋu iyi wa ce laalɔ. Kpãa iju si inɔ kukãɛu nɔ ku maà wa si wajuɛ má.

¹⁶ Aɔ̃ Lafɛ̃ɛ í jɛ ilaalu hee do ajɔ fei. Dimi mmu ŋa aa kpa iri si ilɛu.

¹⁷ Aɔ̃ Lafɛ̃ɛ, awɔi ì ya gbɔ kutɔɔi inɛ ŋa iyi à wa si wahala. Awɔi ì ya mu nŋa gbugbã nɔ ì ya desi ŋa itĩ,

¹⁸ ku ba i nyaa kɔyɔ do inɛ iyi à waa taa gbugbã asaiya. Do yaase bɛɛbɛ, inɛ kãma si ilɛu ihɛ̃ kaa maa mɔsi do inɛ ŋa ku taa gbugbã.