Iri ku kɔ̃ 1 - Bibeli do fee

IKƆ̃ SINTEI TIAU ( Iri ku kɔ̃ 1-41 ) Inɔ didɔ̃ ntɔ

¹ Ilu inɔ didɔ̃i inɛ iyi kù waa too si idei ilu inɔ kukã ŋa, inɛ iyi kù waa too si kpãai ilu dulum ŋa, inɛ iyi kù waa buba do woo yaako inɛ ŋa.

² Í ya ba didɔ̃ɛ feii si idei Aɔ̃ Lafɛ̃ɛ, nɔ dasã do idũ í ya maa lasabu si ideui.

³ Í yɛi bɛi jĩi iyi à lɛ si itĩi ido iyi í ya so iso bii waatiɛ í to, nɔ waati kãma fei wuaɛ í ya maa tũi, mii iyi wa ce fei í ya cei.

⁴ Amma ti ilu inɔ kukã ŋa kù jɛ bɛɛbɛ. À yɛ bɛi fɔfɔ iyi fufu wa fangaa.

⁵ Na ŋɔi í ce ilu inɔ kukã ŋa a kaa ba a fita si ajɔi kiitiu. Nɔ ilu dulum ŋa mɔ a kaa yɔkɔ a wa si igbɛi inɛ dee dee ŋa.

⁶ Ntɔi Aɔ̃ Lafɛ̃ɛ í mà kpãai inɛ dee dee ŋa, amma kpãai ilu inɔ kukã ŋa wa bɔò ŋai si iku.