Mɔnda ŋa 9 - Bibeli do fee

Laakai wa kpe inɛ ŋa

¹ Laakai í gbe sɔbe mɛɛje, nɔ í ma si ileɛ.

² Ŋɔi í saka mɛɛmu ŋa, nɔ í ce atɛ̃ vɛ̃ɛ, í ce sɔɔlui taabu bi ku jɛ jingau.

³ Nɔ í bɛ inaabo woo ce icɛɛ ŋa í ni a bɔ si geete ŋa iyi à gboka à re si inɔ iluu a kpe inɛ ŋa wa,

⁴ a ni, iŋɛ iyi i kù nɛ bisi ŋa, i sinda wa do ikpa ihɛ̃, inɛ ŋa mɔ iyi a kù nɛ yaase, laakai wa sɔ̃ ŋa wa ni,

⁵ i naa i jɛ ŋa, nɔ i mɔ vɛ̃ɛ iyi ǹ ce sɔɔluɛu.

⁶ I jɔ̀ icɛi nnyɛi ku ce nɔ i ba kuwɛɛ ŋa. I mu kpãai bisi ŋa.

Ilu laakai do woo yaako inɛ

⁷ Inɛ iyi wa fɔ si woo yaako inɛ ide wa faa araɛ anyɔ wai. Nɔ inɛ mɔ iyi wa yɛ taalei inɛ laalɔ á ba arabu.

⁸ Bii ì waa fɔ si woo yaako inɛ ide, á céɛ. Amma bii ì waa fɔ si ilu laakai ide, á biɛ.

⁹ Bii ì na ilu laakai ikɔ, laakaiɛ á kɔ̃ɔsi. Bii ì waa kɔ inɛ dee dee si cio, kumà iyi í nɛu á kɔ̃ɔsi.

¹⁰ Bii ì bi i nɛ laakai, jɔ̀ i mà bɛɛrɛi Aɔ̃ Lafɛ̃ɛ titã. Bii ì bi i nɛ bisi, jɔ̀ i mà Aɔ̃ Lafɛ̃ɛ, nŋu iyi í má.

¹¹ Amu laakai, an jɔ̀ kukpɔi ajɔɛ ku kɔ̃ɔsi, nɔ hundeɛ ku sɔ.

¹² Bii ì jɛ ilu bisi, awɔi aa jɛ ribaɛ. Bii ì nɔ ì jɛ woo yaako inɛ, awɔ akãi aa ba ijuukpãɛ.

Nnyɛi wa kpe inɛ ŋa

¹³ Nnyɛi í yɛ bɛi abo ilu gɛlɛ kuku. Ci ya nɛ yaase nɔ ci ya mà nkãma.

¹⁴ Í ya bubai si anu koofai kpasɛ̃ɛ si geete iyi í gboka í re si inɔ ilu,

¹⁵ ku maa sɛ̃ɛ woo lɔ ŋa iyi à mu kpãa nŋa suusuu à waa nɛ ku maa ni,

¹⁶ iŋɛ iyi i kù nɛ bisi ŋa, i sinda wa do ikpa ihɛ̃. Inɛ ŋa mɔ iyi a kù nɛ yaase, nnyɛi wa sɔ̃ ŋa wa ni,

¹⁷ inyi iyi à ce ile í ya dɔ̃ ku mɔi, nɔ sɔnda iyi à waa jɛ si asii í ya dɔ̃ ku jɛi.

¹⁸ Amma inɛ ŋau a ci ya mà iyi iku ŋai à wa bɛ, nɔ inɛ ŋa iyi wa kpeu fei à ya bɔi bi kuwai iku ŋa.