Mɔnda ŋa 8 - Bibeli do fee

Laakai wa kpe amanɛ

¹ Laakai wa dɔ̃ anu hee lele, wa kpe inɛ ŋa.

² Í ya koo ku maa leekĩi si geete ŋa do kɔkɔi kpãa koko ŋa.

³ Wa leekĩ kɔkɔi anu koofai iluu, tengi bii inɛ ŋa à ya maa lɔ, wa ni,

⁴ iŋɛ amanɛ ŋa, iŋɛi ǹ wa n fãa, iŋɛ feii ǹ wa n kpe.

⁵ Iŋɛ hai nɛ bisi ŋa, i jɔ̀ i nɛ bisi ŋa. Iŋɛ nnyɛi ŋa mɔ, i jɔ̀ i dɛ laakai ŋa.

⁶ I sotĩ i gbɔ ŋa, domi ǹ nɛ ide jiida iyi an sɔ̃ ŋɛ, nɔ bii ǹ cĩ gɛlɛ, ide iyi í tɛi an fɔ.

⁷ Ntɔi gɛlɛm í ya fɔ, nɔ gɛlɛm nɔu kù bi ide laalɔ.

⁸ Idei gɛlɛm ŋa fei dee deei. Inɛ ku takii do ibo kù wa si.

⁹ Fei ndɛɛ í mái bi inɛ iyi í nɛ bisi, nɔ í tɛ bi inɛ ŋa iyi à nɛ kumà.

¹⁰ I jɔ̀ i gba ikɔm ŋa ku re isɔ fũfũ, nɔ i jɔ̀ i dɛ kumà ŋa ku re wura alala,

¹¹ domi laakai í re lɛgɛ ku nɛ fia ŋa. Mii jiida kãma kù too do bɛɛrɛ.

Laakai wa tusɛ araɛ

¹² Amu laakai, bi kuwam nii í jɛ kusaku, nɔ ǹ ya n ba kumà wai hai si lasabu.

¹³ Inɛ iyi í mà bɛɛrɛi Aɔ̃ Lafɛ̃ɛ, í ya cé laalɔi. Amu laakai, ǹ cé ara ku so lele do faau do kuce laalɔ do ibo.

¹⁴ Bi tom nii inɛ á ba ikɔ jiida do kumà. Amui ǹ jɛ bisi, nɔ amui ǹ nɛ gbugbã.

¹⁵ Do saabum nii ilaalu ŋa à jɛ bomma, nɔ amanlu ŋa à waa jilɛa inɛ ŋa wooda ŋa iyi à jɛ dee dee.

¹⁶ Do saabum nii inɛ ngbo ŋa do ilu jirima ŋa do woo kiiti ilɛ ŋa fei à waa muò ilɛu.

¹⁷ Amu ǹ bi inɛ ŋa iyi à bim, nɔ inɛ ŋa iyi à waa dɛdɛm à ya bam nii.

¹⁸ Bi tom nii inɛ á ba amani do amboe, do mii jiida ŋa iyi aa kpɛ do riba iyi í jɛ dee dee fei.

¹⁹ Ribam í nɛ bɛɛrɛ í re wura alala, nɔ aranfãaniɛ í re isɔ fũfũ.

²⁰ Ǹ wai si kpãai dee dee ku jɛ, do si kpãai ntɔ

²¹ ku ba n jɔ̀a inɛ ŋa iyi à bim tubu, nɔ amani nŋa ku kɔ̃.

²² Aɔ̃ Lafɛ̃ɛ í bím hai sinte. Ǹ jɛ inɛ sinte iyi í taka, hai kù taka nkãma,

²³ nɔ í jilɛm ikã hai tako. Ǹ wɛɛ hee ku maa taka andunya.

²⁴ Í bím nii hai waati iyi tenku kãma kù wɛɛ, nɔ isɔ̃ kãma kù wɛɛ.

²⁵ Í bím hai iri kuta gɔ kù wɛɛ hee má jɛ geete gɔ.

²⁶ Waati bɛɛbɛ, Aɔ̃ Lafɛ̃ɛ kù taka ilɛ do sako ŋa. Kù ce baa ilùlù.

²⁷ Ǹ wa bɛ waati iyi í tɛ lele, do waati iyi í fɛɛfɛ inyi iyi í wa lele do iyi í wa ilɛ.

²⁸ Waati iyi wa jilɛ kudũi ijĩ lele, nɔ í jɔ̀ inyi wa sɔ̃ wa hai ilɛ do gbugbã,

²⁹ waati iyi í nyaa tenku kɔɔ, nɔ í ni ku maà kuaɛ, waati iyi í jilɛ icui ilɛ,

³⁰ ǹ wa bi tɛɛ ǹ wa n jɛ bɛi inɛ ngboi icɛu. Inɔ didɔ̃ɛ fei í wa sim. Ǹ ya n maa n cɛi waati kãma fei si wajuɛ do inɔ didɔ̃,

³¹ hee do si bantumai ilɛɛ, nɔ ǹ ya n nɛ inɔ didɔ̃i si inɔi amanɛ ŋa.

Ilu inɔ didɔ̃i inɛ iyi wa gbɔ idei laakai

³² Amu laakai ǹ ni, na nŋu iŋɛ amam ŋa, i sotĩ i gbɔ idem ŋa. Ilu inɔ didɔ̃ ŋai inɛ ŋa iyi à waa too kpãam.

³³ I de si ikɔm itĩ ŋa aa jɛ ilu laakai ŋa, i maà ce si atafii ŋa.

³⁴ Ilu inɔ didɔ̃i inɛ iyi wa de sim itĩ, nɔ í ya maa leekĩ anu koofai kpasɛ̃m waati kãma fei ku maa degbem,

³⁵ domi inɛ iyi í bam í ba kuwɛɛi nɔ í ba didɔ̃i Aɔ̃ Lafɛ̃ɛi.

³⁶ Amma inɛ iyi kù bam wa cea araɛ laalɔi. Inɛ ŋa iyi à cém fei à bi ikui.