Mɔnda ŋa 7 - Bibeli do fee

Abo à ce sakara í dĩ ijui awaasũ gɔ

¹ Amam, mu idem ŋau, mu ŋa bɛi amaniɛ. Mu idem ŋau dim dim.

² Jirima woodam ŋa ku ba i wɛɛ. Mu ikɔm ŋa nɔ i maa ce kaasã nŋa bɛi inɛ í ya maa ce kaasãi ijuɛ.

³ Mu ŋa dim dim, kɔ ŋa si idɔɛ.

⁴ Sɔ̃ laakai i ni í jɛ wecĩɛ, bisi mɔ i kpoo kpaasiɛ.

⁵ Aŋai aa maa degbeɛ na inaabo à ce sakara, ku ba i maà dasi awɔi abo ilu gɛlɛ didɔ̃.

⁶ Ajɔ nŋu gɔ ǹ wa n cɔ ilu hai do fɛrɛntii ilem.

⁷ Ŋɔi ǹ yɛ awaasũ hai nɛ laakai gɔ ŋa, nɔ si inɔ nŋa ǹ hɔ̃nnɛ nnyɛi gɔ.

⁸ Awaasũu wa nɛ si kpãa, wa bɔ ikpa bii inaabo à ce sakara í ya wa. Wa nɛ kpɛlɛ kpɛlɛ wa bɔ ikpa kpasɛ̃i abou,

⁹ hai zakai amɛɛbii, hee idũ í koo í dũ.

¹⁰ Ŋɔi ǹ ba wee abou í na í kòo, wa dasi jĩnɛ bɛi woo ta icu ŋa nɔ í nɛ mayɛɛ.

¹¹ Í jɛ hai nɛ anyɔ do ilu ide nkpɔ. Fitiɛ ci ya buba kpasɛ̃ɛ.

¹² Waati gɔ ŋa aa yɔɔ si kpãa, waati gɔ ŋa mɔ si bantuma walakɔ si kɔkɔlɛ ŋa, ku maa degbe inɛmɔkɔ ŋa.

¹³ Waati iyi í kò awaasũu gbakã, ŋɔi í muu í sakuuɛ nɔ wa baa ide ku fɔ anyɔ kù waa muu mɔm í ni,

¹⁴ nnyii ǹ kɔ̃ kuwã iyi ǹ cea Ilaaɔ̃ do kuwee iyi à ya saabuɛò.

¹⁵ Na ŋɔi í jɔ̀ ǹ fita ǹ naa ku kpeɛ. Ǹ dɛdɛɛ nɔ ǹ yɛɛ.

¹⁶ Ǹ tɛ si daayim acɔ ila nkpɔ nkpɔ ku nɛ fia iyi à wɔ̃ do ikũi Ezibiti.

¹⁷ Ǹ fãsi daayiu tuae ku dɔ̃ inunu dimi ikã ikã.

¹⁸ Naa wa káa tɔtɔɔ sɛ̃ɛ hee iju koo máò, ka wɛɛò inɔ didɔ̃i kubiu.

¹⁹ Mɔkɔm kù wa ide, í bɔ ilu jĩijĩ gɔ.

²⁰ Í so fia nkpɔ nkpɔ si bɔgɔ í nɛò, nɔ kaa baa bii kù to waati iyi cukpa á lɛlɛ ama kɛtɛ.

²¹ Do yaase bɛɛbɛi í kãmaiɛ nɔ í sindaɛ do gɛlɛ didɔ̃ɛ.

²² Nɔ gbakã awaasũu wa tooɛ bɛi kɛtɛ iyi à waa bɔò bi ku kpa mɛɛmu ŋa, walakɔ bɛi mɛɛmui sako iyi í dasi cɛkũm,

²³ hee afa koo luu idɔɛ. Walakɔ bɛi yɛi iyi í dasi taa, kù mà baa iyi á kua hundeɛ.

²⁴ Nsɛi, awɔ amam, sotĩ i gbɔ idem ŋa iyi ǹ wa n sɔ̃ɛ.

²⁵ Maà jɔ̀ abo dimi bɛɛbɛ ku lɛlɛɛ, nɔ i maà na i nyɔ i koo i mu kpãaɛ,

²⁶ domi inɛ nkpɔ nkpɔi í kãmia í bɛjɛ kuwɛɛ nŋa, nɔ baa ilu gbugbã ŋa à dasi cɛkũm dɛɛ.

²⁷ Inɛ iyi wa bɔ ileɛ, kpãai bi kuwai iku ŋai wa mu.