Mɔnda ŋa 6 - Bibeli do fee

Maà jɔ̀ inɛ gɔ ku so gbese do iriɛ

¹ Amam, bii ì ce kuwã ì jɔ̀ inɛ gɔ í so gbese do iriɛ,

² nɔ kuwã iyi ì ceu í na wa mɔɛ inyi,

³ ì dasi awɔi ilu gbeseui. Na nŋu, koo yɔɔ nɔ i tɔɔɛ suuru ku nyaɛ hai si kuwã iyi ì ceu.

⁴ Maà sũ i sĩmi titã i bɛi i koo i tɔɔɛ suuru.

⁵ Nya araɛ hai si gbeseu nɔ i gbã hai si awɔɛ bɛi kulu í ya gbã si tobi, walakɔ bɛi yɛi í ya gbã hai si awɔi woo le taa.

Maà jɛ ilu ika

⁶ Awɔ ilu ika, bɔ bi cɛ̃cɛ̃ɛ, i koo i cɔ bɛi wa ce nɔ i ba bisi.

⁷ Cɛ̃cɛ̃ɛ kù nɛ inɛ ngbo kù nɛ inɛ iyi wa gbãa, nɔ kù nɛ ilaalu,

⁸ amma í ya maa ce kosĩai, hai waati iyi amaajɛ ŋa à wɛɛ, nɔ í ya dɛdɛ sɔndaɛi si waatii amaajɛ ku da koo jilɔɔ.

⁹ Awɔ ilu ika, hee waati yoomai aa maa sũ. Waati yoomai aa dede hai sĩ njoo.

¹⁰ Si njoo ku sũ keeke, do siiko keeke, do awɔ ku kɔlɔmbɛ keeke,

¹¹ are á na ku zambaɛi bɛi ile, nɔ ari ku boeɛ bɛi ile bata ngba.

Daai inɛ laalɔ

¹² Inɛ ngbɛ ngbɛ, inɛ laalɔi, nɔ í jɛ woo sɔ ibo.

¹³ Inɛ dimi bɛɛbɛ í ya ba inɛ ŋa ide ku fɔi do iju nɔ ku ce nyinda do kutɛ do awɔ [ku dĩò ijui inɛ ŋa].

¹⁴ Laalɔ ku cei í ya waa si idɔ. Í ya maa lasabuò laalɔi waati kãma fei. Í ya dede ija ŋa.

¹⁵ Na nŋu, laalɔ í ya to wa siɛi hai maà kasoo. Á ce asɔɔi araɛ kaa ba iwɔ.

Mii ŋa iyi Aɔ̃ Lafɛ̃ɛ í cé

^16-19 Mii mɛɛfai Aɔ̃ Lafɛ̃ɛ í cé. Mii ŋau wee. Ara ku so lele do ibo ku sɔ do hai nɛ taale ku kpa, do idɔ iyi wa lasabuò laalɔ ku ce, do inɛ iyi í ya saasa ku bɔ laalɔ ku ce, do inɛ ku má ide. Nɔ mɛɛjesia gɔ í wɛɛ iyi í cé má, woo kosi nyaanze ija.

Maà ce sakara

²⁰ Amam, de si idei baaɛ itĩ, nɔ i maà fũsi ikɔi iyeɛ awɔ.

²¹ Mu ŋa si idɔɛ dim dim hee do ajɔ fei. Jɔ̀ a jɛɛ bɛi sabai wura iyi aa dĩ si kɔ̃ɔɛ.

²² Aŋai aa maa gbãɛ bii ì waa nɛ, nɔ aa degbeɛ bii ì waa sĩ njoo, nɔ aa muuɛ bisi bii ì jĩ hai si iri njoo,

²³ domi wooda í yɛi bɛi fitila, ikɔ mɔ í yɛi bɛi inya kumá. Á sɔ̃ɛ ku ni i ce laakai nɔ ku jɔ̀ i maa leekĩ si kpãai kuwɛɛ.

²⁴ Á faabaɛ hai si awɔi abo à ce sakara do hai si gɛlɛ didɔ̃ɛ.

²⁵ Maà ce kɔdɛɛi abo dimi bɛɛbɛ na kusĩaɛ, nɔ i maà jɔ̀ ku lɛlɛɛ do nyikɔ̃ɛ.

²⁶ Bii ì waa sũò abo à ce sakara aa na i kua fiaɛ, amma bii ì waa sũò abo à so mɔkɔ kuwɛɛɛ feii aa kua.

²⁷ Aa yɔkɔ i dasi ina si zibaɛ iyi jĩnɛɛ kù lu ina?

²⁸ Aa yɔkɔ i tɛ ina nyɛnyɛ iyi isɛɛ kù bɔ?

²⁹ Bɛɛbɛ mɔi i kaa yɔkɔ i lu aboi inɛ gɔ iyi i kù ba ijuukpã.

³⁰ A ci ya donda inɛ iyi í ce ilei sɔnda í jɛ si na iyi í jɔ̀ ari wa kpaa,

³¹ amma bii à muu, á sã mii iyi í ce ileui ikɔ mɛɛje. Á na mii iyi í nɛ kpasɛ̃ɛ feii.

³² Amma inɛ iyi í lɛlɛ inaabo aŋaò à ce sakara nnyɛii. Inɛ iyi í ce bɛɛbɛ, á ce nfei.

³³ Á ba si wahala nɔ kaa nɛ bɛɛrɛ. Á maa wɛɛ do anyɔui hee do ajɔ fei.

³⁴ Akɔɔya á jɔ̀ idɔɔkɔ̃i mɔkɔi abou ku dede. Nɔ ajɔ iyi á ja akɔɔya kaa ce araarei inɛɛu.

³⁵ Kaa gba nkãma iyi aa sãa, nɔ kaa ce suuru baa bii à waa cea amua nkpɔ nkpɔ.