Mɔnda ŋa 5 - Bibeli do fee

I ce laakai do inaabo à ce sakara

¹ Amam, jɔ̀ i sotĩ i gbɔ ikɔ iyi ǹ wa n kɔɛ, jɔ̀ i de itĩ si idei bisi ŋa iyi ǹ wa n naɛ

² ku ba i jɛ ilu laakai, nɔ gɛlɛɛ ku mà ide ku fɔ,

³ domi gɛlɛi inaabo à ce sakara í ya dɔ̃i bɛi nyikɔ̃, nɔ ideɛ í ya dɔ̃i ku re baa ikpo.

⁴ Amma iri ku kpai ideɛu í ya roi bɛi gondee, nɔ í ya mɛɛ amanɛi bɛi taakuba andɛ minji ku dɔ̃ anu.

⁵ Kuceɛ í ya naaò iku wai, nɔ isɛɛnɛɛ mɔ í ya bɔi hee bi kuwai iku ŋa.

⁶ Ci ya mu kpãai kuwɛɛ. Í ya koo nyɔi baa nŋu takaɛ ci ya mà.

⁷ Nsɛi amam, sotĩ i gbɔ idem. Maà sinda i toaa anyi.

⁸ Jɔ̀ i jĩò abo dimi bɛɛbɛ. Maà bɔ baa anu koofai ileɛ,

⁹ ku ba i maà na i kpa bɛɛrɛɛ, nɔ hai nɛ araare ku kpaɛ.

¹⁰ [Maà bɔ bi abo dimi bɛɛbɛ] ku ba inɛ mmu ŋa a maà na a ko amaniɛ do ribai icɛɛ a nɛò kpasɛ̃i inɛ mmu,

¹¹ nɔ waati iyi ì na ì gbo nɔ araɛ fei í gbɛɛji i na i maa cã ara

¹² i maa ni, na mii í ce ǹ kɔ̀ ku gbɔ ikɔ. Na mii í jɔ̀ ǹ ce atafii si inɛ ŋa iyi à waa fɔ sim ide.

¹³ Bɛirei í ce n kù de si idei woo kɔm ŋa itĩ.

¹⁴ Í gbe keeke wo laalɔ ŋau bɛ fei ku bam si inɔi zamaam.

Bi aboɛ

¹⁵ Jɔ̀ i ya mɔ inyii isɔ̃i awɔ takaɛ, inyi iyi í wa si lɔgɔɛ.

¹⁶ Maà jɔ̀ inyiɛ ku maa dikã waduude. Maà jɔ̀ ku cã ku bɔ bantuma.

¹⁷ Jɔ̀ ku jɛ ti awɔ akã, ku maà jɛ ti inɛ mmu ŋa.

¹⁸ Ilaaɔ̃ ku weea inyii isɔ̃ɛu. Jɔ̀ inɔ didɔ̃ ku wa si gãmɛi awɔ do aboɛ iyi ì so hai awaasũɛ.

¹⁹ Jɔ̀ i nɛ kubii aboɛ iyi í sĩa bɛi kulu nɔ í jɛ inɛ kurɔ bɛi angbãi. Jɔ̀ i nɛ inɔ didɔ̃ si araɛ waati kãma fei. Waati kãma fei i ya na araɛ si kubiɛ.

²⁰ Amam, maà jɔ̀ i nɛ kubii abo à ce sakara, maà sakoo amɔi aboi inɛ gɔ,

²¹ domi Aɔ̃ Lafɛ̃ɛ waa yɛ kpãa iyi amanɛ wa too fei, nɔ nŋui í ya teesea kpãa ŋau.

²² Kurara ŋa iyi inɛ laalɔ wa cei í ya sinda ku muu. Dulum dɛɛ ŋai í ya kpatiɛ.

²³ Á kui si na iyi í jɔ̀ í mɔngɔ ku mu araɛ. Nnyɛi nla nla ku jɛɛi á jɔ̀ ku ce nfe.