Mɔnda ŋa 4 - Bibeli do fee

Ikɔ iyi baa í na amaɛ

¹ Iŋɛ amam ŋa, i sotĩ i gbɔ ikɔ iyi amu baa nŋɛ ǹ wa n na ŋɛ. I ya de si itĩ ŋa ku ba i ba bisi ŋa.

² Kumà jiidai ǹ wa n mu nŋɛ, i maà fũsi ikɔm ŋa awɔ.

³ Amu mɔ ǹ nɛ baa iyi í nam ikɔ. Iyem í bim jiida jiida, nɔ amu akãi ǹ jɛ amaɛ. Hai waati iyi ǹ wɛɛ keeke

⁴ baam nɔu í ya kɔm ku maa ni, jɔ̀ i mu idem ŋa si idɔɛ. Jɔ̀ i jirima woodam ŋa nɔ i wɛɛ.

⁵ Jɔ̀ i dɛ bisi nɔ i dɛ laakai, maà gbɛjɛ ide iyi ǹ sɔ̃ɛ nɔ i maà yaa hai si idem ŋa.

⁶ Maà kɔ̀si bisiu, á degbeɛ. Jɔ̀ i buu, á maa muɛ.

⁷ Bii ì bi i nɛ laakai, jɔ̀ i dɛdɛɛ titã, nɔ i jɔ̀ i dɛdɛ bisi do mii iyi ì nɛ fei.

⁸ Jɔ̀ i mà bɛɛrɛɛ, á jɔ̀ a soɛ lele. Gbaa awɔ minji, á jɔ̀ i nɛ bɛɛrɛ.

⁹ Á yɛi bɛi booda jiida si iriɛ, walakɔ bɛi fulai ilaalu.

Saa kucei inɛ laalɔ ŋa

¹⁰ Amam, sotĩ i gbɔ idem ŋa iyi ǹ wa n sɔ̃ɛ. Do yaase bɛɛbɛ hundeɛ á sɔ.

¹¹ Ǹ wa n kɔɛi bɛi aa ce i jɛò ilu laakai, nɔ ǹ wa n gbãɛi si kpãa iyi í tɛ.

¹² Bii ì waa nɛ si, isɛɛ kaa ba bitandi kãma gɔ, nɔ bii ì waa sɛi i kaa koosɛ.

¹³ Jɔ̀ i mu ikɔu, nɔ i maa jɔ̀ɔ. Muu, domi nŋui í jɛ kuwɛɛɛ.

¹⁴ Maà too kpãai ilu inɔ kukã ŋa, maà too si kuce nŋa.

¹⁵ Saa kpãa nŋau, maà muu. Sinda i koo i too inya mmu.

¹⁶ Inɛ ŋau à ci ya sĩ njoo bii a kù ce laalɔ. À ci ya ba njoo bii a kù ba inɛ iyi à cea laalɔ.

¹⁷ Inɔ kukãi í jɛ sɔnda nŋa, nɔ inɔ sãmii í jɛ atɛ̃ nŋa.

¹⁸ Kpãai inɛ dee dee ŋa í yɛi bɛi inya kumái daadaakɔ iyi wa daana nɔ inya kumáɛu í la wa koo hee koo to dasã.

¹⁹ Amma kpãai inɛ laalɔ ŋa í yɛi bɛi ilu kuku. À ci ya yɛ mii iyi á jɔ̀ a koosɛ.

Jɔ̀ kuceɛ ku sĩa

²⁰ Amam, sotĩ i gbɔ idem. Jɔ̀ i gbɔ ikɔ ŋa iyi ǹ wa n sɔ̃ɛ.

²¹ Maà jɔ̀ a jĩòɛ, mu ŋa hee si lɛlɛi idɔɛ,

²² domi ikɔ ŋaui à jɛ kuwɛɛi inɛ ŋa iyi à ba ŋa, nɔ à ya jɔ̀ ara nŋa fei ku maa nɛ baani.

²³ Iyi í re mɔm, jɔ̀ i ce laakai si mii iyi ì waa lasabu hee si lɛlɛi idɔɛ, domi nŋui á maa nɛò kuwɛɛɛ.

²⁴ Jɔ̀ ibo ku jĩò gɛlɛɛ, nɔ i maà ya fɔ ide nfe nfe.

²⁵ Jɔ̀ i kãsi mii iyi ì waa lele iju, maà ya sinda wajuɛ.

²⁶ Teese kpãa bii ì ya too, nɔ kpãaɛ fei ku nɛ naanɛ.

²⁷ Maà na i yaa do awɔ canga walakɔ do awɔ njɛ. Jɔ̀ i jĩò laalɔ ku ce.