Mɔnda ŋa 31 - Bibeli do fee

Ikɔ iyi à jɔ̀a ilaalu

¹ Ikɔ ŋa iyi Lemuɛli ilaalu í ba hai bi iyeɛ wee.

² Amam, awɔ iyi ǹ gulɛ ǹ bí, sotĩ i gbɔ ide iyi ǹ wa n sɔ̃ɛ, awɔ iyi ǹ tɔɔ hai bi Ilaaɔ̃.

³ Maà na i jɔ̀ inaabo ŋa a tã gbugbãɛ, nɔ i maà na i too kpãai inaabo ku nyɔ ilaalu ŋa.

⁴ Lemuɛli, atɛ̃ kù sĩaò ilaalu ŋa, kù sĩa ilaalu ku maa mɔ atɛ̃, kù nɔ kù sĩa inɛ ŋa iyi à waa mu ilɛ ŋa a maa mɔ atɛ̃ ku kpa inɛ,

⁵ domi bii à mɔ atɛ̃u à yo, aa na a jɔ̀ wooda ŋa ku too nɔ a kɔ̀ kãma ŋa mii ŋa iyi à nɛ kpãaɛ.

⁶ Á sĩa mɔm a ya na inɛ iyi wa bɔ nfe ku ce atɛ̃ ku kpa inɛ ŋa, nɔ a ya na ilu inɔ kufɔ mɔ atɛ̃ vɛ̃ɛ.

⁷ Bii à mɔɔ, aa gbɛjɛ wahala do are nŋa.

⁸ Amma awɔ, i ya leekĩa inɛ ŋa iyi a kaa yɔkɔ a fɔ ide, nɔ i ya kɔ̀ò inɛ ŋa iyi a kù nɛ inɛ gɔ.

⁹ I ya kiiti si ntɔ, nɔ i ya kɔ̀ò kãma do ilu are ŋa.

Haalii abo jiida

¹⁰ Ilu inɔ didɔ̃i inɛ iyi í ba abo jiida, domi abo jiida kù kpɔ. Abo jiida í nɛ bɛɛrɛ í re lɛgɛ caada.

¹¹ Mɔkɔɛ í ya naanɛɛ, are kaa wa si kpasɛ̃ nŋa.

¹² Í ya maa cea mɔkɔu mii jiidai si kuwɛɛ fei, ci ya ceaa laalɔ.

¹³ Í ya dɛdɛ ikũ jiida iyi á ceò ibɔ ŋa, nɔ ku ceò icɛ do inɔ akã.

¹⁴ Hai jĩijĩi í ya ko dɛdɛ sɔndaɛ wa ku baaò wa kpasɛ̃ bɛi akɔi inyi ŋa iyi à waa ce sĩa à ya ce.

¹⁵ Hai amɛɛjuumái í ya dede ku ce sɔndai kpasɛ̃, nɔ ku kpɛ̃a inaabo woo ce icɛ ŋau fei icɛ nŋa ŋa.

¹⁶ Í ya ce lasabui ilɛ gɔ nɔ koo raa do fiai icɛi awɔɛ nɔ ku lɔsi jĩi ndii rezɛ̃ɛ ŋa.

¹⁷ Í ya maa ce icɛi do himma nɔ ci ya wɛɛ ngbɛ.

¹⁸ Í ya ba wee wũai nŋu fei wa cei jiida jiida. Fitilaɛ í ya maa joi hee do idũ laja ŋa fei.

¹⁹ Í ya sɔ gomboi ku maa wɔ̃ò acɔ.

²⁰ Í ya cea ilu are ŋa amua do inɔ akã.

²¹ Baaɛ ci ya wa si do sukui kpaa nŋu do inɛi kpasɛ̃ɛ ŋa, domi aŋa fei à ya nɛ ibɔ minji minji iyi à waa dasii.

²² Í ya cea araɛ acɔ ku bii ŋa. Í ya nɛ jĩnɛi acɔ ku nɛ fia ŋa.

²³ Inɛ fei í ya mà bɛɛrɛi mɔkɔɛi na iriɛ, waati iyi wa buba anu koofai ilu si inɔi inɛ ngboi ilu ŋau.

²⁴ Abou takaɛi í ya wɔ̃ ibɔ ŋa do kungbã ŋa ku maa taa sĩa ŋa.

²⁵ Gbugbã do bɛɛrɛi à jɛ boodaɛ. Zigiɛ ci ya daò ala.

²⁶ Idei ilu laakai í ya maa fɔ, nɔ í ya kɔ inɛ ŋa si cio do kubi.

²⁷ Í ya maa wɔ̀ njoo si didɔ̃i kpasɛ̃ɛ nɔ kù nɛ ika.

²⁸ Amaɛ ŋa à ya maa saabuɛi, nɔ mɔkɔɛ mɔ í ya maa cũu.

²⁹ Mɔkɔu í ya maa ni, inaabo jiida nkpɔ nkpɔi í wɛɛ, amma awɔi ì re aŋa fei.

³⁰ Daa didɔ̃ í ya lɛlɛ inɛ, nɔ kusĩai ara í ya na ku tã, amma inaabo iyi wa jirima Aɔ̃ Lafɛ̃ɛi í to saabu.

³¹ Ì jɔ̀ ku yɛ ribai icɛi awɔɛ, nɔ inɛ ŋa a maa saabuɛ bii fei na mii ŋa iyi wa ce fei.