Mɔnda ŋa 30 - Bibeli do fee

Mɔndai Aguu

¹ Mɔnda ŋa iyi Aguu amai Yakee í kpaa wee. Í ni, ǹ gbɛɛji, Ilaaɔ̃, ǹ gbɛɛji, nɔ n kù nɛ gbugbã má.

² Ntɔi, amui ǹ ce nnyɛi ǹ re si inɔi amanɛ ŋa, n kù nɛ laakai kãma iyi í jɛ ti amanɛ.

³ N kù kɔkɔ bisi nɔ n kù nɛ kumài Ilaaɔ̃, nŋu iyi í má.

⁴ Yooi í bɔ lele í baa. Yooi í kukutu fufu si awɔɛ ŋa. Yooi í wo inyi si ibɔ kumbooɛ. Yooi í jilɛ kɔɔi ilɛu fei. Bɛirei à ya kpoo nɔ bɛirei à ya kpe amaɛ. Fɔɔ bii í jɛ ì màai.

⁵ Ide iyi Ilaaɔ̃ í fɔ fei ntɔi mam mam. Ilaaɔ̃i í jɛ tɛlii inɛ ŋa iyi à dasiɛ naanɛ.

⁶ Maà na i kɔ̃ɔsi nkãma si idei Ilaaɔ̃. Bii ì nɔ ì kɔ̀ mɔ á na ku yɛ taaleɛ nɔ á cɔɛ ilu ibo.

⁷ Aɔ̃ Lafɛ̃ɛm, ǹ wa n tɔɔɛ mii minji. Muum mii ŋau n maa n nɛ ŋa hee ǹ koo ǹ kuò.

⁸ Jɔ̀ ide nfe do ibo ku sɔ ku jĩim. Maà jɔ̀ n jɛ ilu are walakɔ ilu amani. Muum andi iyi á tom n jɛ n maa n wɛɛò.

⁹ Á yɔkɔ ku jɛ bii ǹ na n jɛ ilu amani an na n kɔ̀siɛ nɔ n maa n ni, yooi í jɛ Aɔ̃ Lafɛ̃ɛ, walakɔ bii are í mantem an na n lɔsi ile ku ce nɔ n bɛjɛò iriɛ.

¹⁰ Maà bɛjɛ irii woo ce icɛ bi lafɛ̃ɛɛ ku ba ku maà na ku ceekpeɛ nɔ i baa i jɛ ilu taale.

¹¹ Inɛ gɔ ŋa à wɛɛ iyi à ya maa ceekpe baa nŋa ŋa nɔ a ci ya weea iye nŋa ŋa ajɔ kãma.

¹² Inɛ gɔ ŋa mɔ à waa cɔ ara nŋa hai nɛ taale kãma, baa do iyi a kù jɔ̀ kurara ŋa ku ce.

¹³ Inɛ gɔ ŋa à waa so ara nŋa lele, nɔ à waa cɔ inɛ fei ilɛ ngbɛ.

¹⁴ Inɛ gɔ ŋa à ya taa hai nɛ gbugbã ŋa do ilu are ŋa gbugbã. Inyíi inɛ ŋau í yɛi bɛi taakuba, kɛkɛlɛ nŋa ŋa mɔ bɛi kasɛ.

Mɔnda gɔ ŋa

¹⁵ Mɔmɔɔ í nɛ ama inaabo minji gɔ. À ya maa ni, muum, muum. Mii mɛɛtai í wɛɛ iyi nkãma ci ya to ŋa, nɔ aŋa mɛɛ mɔm nii à wɛɛ iyi a ci ya ni í to bɛɛbɛ ajɔ kãma. Aŋa wee.

¹⁶ Bi kuwai iku ŋa do inaabo gbɛnda, do ilɛ iyi inyi ci ya too ajɔ kãma do ina iyi ci ya ni í to bɛɛbɛ.

¹⁷ Inɛ iyi wa yaako baaɛ nɔ wa donda iyeɛ, gaagaa ŋai aa nya ijuɛ, nɔ kungbã ŋa aa jɔ́ɔ.

¹⁸ Mii mɛɛtai í wɛɛ iyi í ya mum biti hee ku caa, nɔ mii mɛɛ mɔm dei iyi n ci ya n gbɔ yaaseɛ. Aŋa wee.

¹⁹ Kpãai kungbã iyi wa fo lele do kpãai njo si kuta, do kpãai akɔi inyi si tenku do kpãai inɛmɔkɔ ku bɔ bi mudɛ̃ɛ.

²⁰ Bɛi inaabo ace sakara í ya ce wee. Í ya jɛ ku yoi, ku gbã gɛlɛɛ [waatɔ bii í ce sakara í tã í ya teese araɛi] nɔ ku ni, n kù ce laalɔ kãma.

²¹ Mii mɛɛtai í wɛɛ iyi ci ya cea amanɛ ŋa, nɔ mii mɛɛ mɔm nii iyi a ci ya yɔkɔ a temuaò. Aŋa wee.

²² Aru iyi í jɛ bomma do nnyɛi iyi wa gbɔ ididɔ̃

²³ do inaabo iyi inɛ gɔ kù bi wo nɔ í ba mɔkɔ do inaabo aru iyi í gba agbɛi lafɛ̃ɛɛ.

²⁴ Mɛɛmu mɛɛ gɔ ŋa à wɛɛ iyi à kere, amma à nɛ bisi ntɔ ntɔ. Aŋa wee.

²⁵ Cɛ̃cɛ̃ɛ ŋa a kù nɛ gbugbã, amma à ya ce sɔɔlui sɔnda nŋa hai sukui amaajɛ ku da.

²⁶ Damaa ŋa mɔ a kù nɛ gbugbã kãma, amma à ya koo a ce kolo nŋai si isai kuta ŋa.

²⁷ Angotue ŋa a kù nɛ ilaalu, amma do nŋu fei à ya fita a maa nɛ wuaa do wuaa.

²⁸ Muɛ ŋa iyi inɛ á yɔkɔ ku mu si awɔ, à ya lɔ hee inɔ kpasɛ̃i ilaalu.

²⁹ Mii ilu hunde mɛɛtai í wɛɛ iyi isɛɛnɛ nŋa í ya sĩa, nɔ aŋa mɛɛ mɔm nii iyi isɛɛnɛ nŋa í nɛ bɛɛrɛ. Aŋa wee.

³⁰ Muusu nla í nɛ wɔɔkɔ í re mɛɛmui sako ŋa fei nɔ ci ya sɛkɛɛò anyi si wajui inɛ kãma

³¹ do ajɛɛ kɔkɔ do iwo kombo do ilaalu iyi wa cuaa soogeɛ ŋa.

³² Bii ì so araɛ lele i ce idei awɔ anyi, walakɔ bii ì dasi idɔ i ce daa laalɔ wo, jɔ̀ i yɔkɔ gɛlɛɛ,

³³ domi bii à ka amɔ tũtũ í ya ce ikpoi, nɔ bii à cã inɛ si imɔ ammɔnyãɛ á dedei, nɔ bii idɔɔkɔ̃ í dede í ya bi ijai.