Mɔnda ŋa 3 - Bibeli do fee

Ilu laakai á jirima Ilaaɔ̃

¹ Amam, maà ya gbɛjɛ ikɔm ŋa, jɔ̀ i ya maa mu woodam ŋa si idɔɛ.

² Aŋai aa jɔ̀ kuwɛɛɛ ku sɔ nɔ i nɛ laakai ku sũ do inɔ didɔ̃.

³ Jɔ̀ i ya ce jiida nɔ i jɛ ilu naanɛ. Jɔ̀ jiida kú jɛ do naanɛu a jɛ bɛi sabai wura iyi aa dĩ si kɔ̃ɔ, nɔ i ya maa mu ŋa si idɔɛ.

⁴ Do yaase bɛɛbɛ aa jɛ ilu laakai nɔ i ba didɔ̃ bi Ilaaɔ̃ do bi amanɛ ŋa.

⁵ Dasi Aɔ̃ Lafɛ̃ɛ naanɛ do idɔɛ fei, nɔ i maà ya maa kaaba bisiɛ.

⁶ Jɔ̀ Aɔ̃ Lafɛ̃ɛ kú maa nɛòɛ si mii iyi ì waa ce fei. Bii ì waa ce bɛɛbɛ, nŋui á teeseɛ kpãaɛ.

⁷ Maà cɔ araɛ ilu bisi, jɔ̀ i mà bɛɛrɛi Aɔ̃ Lafɛ̃ɛ nɔ i ya saa laalɔ.

⁸ Araɛ á maa nɛ baani nɔ awɔ takaɛ aa nɛ gbugbã.

⁹ Si mii iyi ì nɛ fei, i ya tako i na Aɔ̃ Lafɛ̃ɛ iyi í nɛ ku jɛ tɛɛ hee do amaajɛ sinteɛ ŋa.

¹⁰ [Bii ì waa jirimaɛ do yaase bɛɛbɛ] suuɛ ŋa aa kɔ̃ a kpante, nɔ dangalaɛ ŋa aa maa kɔ̃i do vɛ̃ɛ titɔ̃.

¹¹ Awɔ amam, bii Aɔ̃ Lafɛ̃ɛ wa baaɛ wa si kpãa do ijuukpã, maà ya kɔ̀, nɔ i maà ya ce atafii si ijuukpãɛu,

¹² domi inɛ iyi í bii í ya kpãa iju bɛi baa iyi í bi amaɛ ntɔ ntɔ í ya ce.

Bisi do inɔ didɔ̃

¹³ Ilu inɔ didɔ̃i inɛ iyi í ba bisi í kɔ̃ɔsi, nɔ í ba kumá.

¹⁴ Bisi í nɛ aranfãani í re isɔ fũfũ, nɔ mii iyi í ya baaò wa í re wura.

¹⁵ Í jɛ jiida í re lɛgɛ ku nɛ fia ŋa, nɔ mii ŋa iyi ì bi kãma kaa too do bɛɛrɛɛ.

¹⁶ Hunde sisɔ í wa si awɔ njɛɛ, amani do amboe mɔ à wa si awɔ cangaɛ.

¹⁷ Kpãaɛ ŋa fei kpãa jiida ŋai, nɔ aŋa fei à ya naaò laakai ku sũ wai.

¹⁸ Jĩi ndii kuwɛɛi ti inɛ ŋa iyi à muu, nɔ inɛ ŋa iyi à kɔ̀ ku jɔ̀ɔ à ya nɛ inɔ didɔ̃.

¹⁹ Do bisiui Aɔ̃ Lafɛ̃ɛ í takaò ilɛ, do kumàɛi í tɛò lele.

²⁰ Do kumàɛ í jɔ̀ inyi wa fitaò wa hai ilɛ, nɔ kudũi ijĩ í jɔ̀ ijĩ wa wɔ.

Ilaaɔ̃i wa degbe ilu laakai

²¹ Amam, jɔ̀ i mu bisi nɔ i mu laakai, nɔ i maà jɔ̀ gɔgɔɛ ku gbã siɛ.

²² Aŋai aa jɔ̀ i maa wɛɛ si hunde, nɔ aa jɔ̀ kuwɛɛɛ ku ce jiida bɛi booda iyi aa dasi kɔ̃ɔ.

²³ Aa jɔ̀ i maa nɛ do naanɛ si kpãaɛ, nɔ i kaa koosɛ.

²⁴ Njo kaa muɛ bii ì waa sũ, nɔ njooɛ á dɔ̃.

²⁵ Maà ce njoi laalɔ iyi á yɔkɔ ku na ku baɛ anu akã, nɔ i maà ce njoi mii iyi á na ku ba inɛ laalɔ ŋa,

²⁶ domi Aɔ̃ Lafɛ̃ɛi á maa degbeɛ nɔ kaa jɔ̀ isɛɛ ku dasi cɛkũm.

Bi kpaasiɛ

²⁷ Maà kɔ̀ jiida ku cea inɛ ŋa iyi à nɛ bukaatai sobi bii ì nɛ gbugbãɛ.

²⁸ Bii inɛ gɔ í naa í tɔɔɛ sobi, bii ì nɛ mii iyi aa yɔkɔ i sobiò lafɛ̃ɛu, maà sɔ̃ɔ i ni, koo titã nɔ i na i nyi wa, alai an muuɛ.

²⁹ Maà lasabu i cea kpaasiɛ laalɔ, nŋu iyi í wa kɔkɔɛ do laakai ku sũ.

³⁰ Maà ya baò inɛ iyi kù ceɛ taale kãma ija.

³¹ Maà ya bi idei ilu inɔ kukã ŋa, nɔ i maà too si kuce nŋa,

³² domi Aɔ̃ Lafɛ̃ɛ kù bi inɛ laalɔ, amma í ya bi inɛ ŋa iyi kuce nŋa í tɛ.

³³ Í ya ceekpe kpasɛ̃i inɛ laalɔ ŋai, amma í ya weea kpasɛ̃i inɛ dee dee ŋa.

³⁴ Baaɛ ci ya wa si woo yaako inɛ ŋa, amma í ya cea inɛ ŋa iyi à kaye ara nŋa didɔ̃.

³⁵ Ilu bisi ŋa aa nɛ bɛɛrɛ, amma nnyɛi ŋa aa yɛ anyɔ.