Mɔnda ŋa 29 - Bibeli do fee

¹ Inɛ iyi bii à sɔ̃ɔ kuraraɛ ci ya jɛsi, á ce nfei anu akã nɔ kaa dede má.

² Bii inɛ dee dee ŋa à waa mu ilɛu inɔi zamaau í ya maa dɔ̃i, amma bii inɛ laalɔ ŋai à waa muu, zamaau í ya maa dɔ̃ anui.

³ Ilu laakai í ya jɔ̀ baaɛ ku nɛ inɔ didɔ̃i. Amma inɛ iyi wa bɔ bi abo à ta icu ŋa í ya ce nfei amaniɛi.

⁴ Ilaalu iyi wa jirima woodai í ya jɔ̀ ilɛu ku bɔ waju, amma ilaalu ilu kɔdɛɛ, á kpa ilɛui.

⁵ Inɛ iyi wa sɔ kpaasiɛ iko, wa leaa cɛkũm nii.

⁶ Laalɔi inɛ laalɔ ŋai í ya sinda ku ba aŋa taka nŋa, amma inɛ jiida ŋa à ya maa dɔ̃ anui do inɔ didɔ̃.

⁷ Inɛ dee dee í ya mà mii iyi í nɛ ku jɛ ti ilu are ŋai, amma baai inɛ laalɔ ŋa ci ya wa si.

⁸ Woo yaako inɛ ŋai à ya dasi ilu ina. amma ilu laakai ŋai à ya sũ idɔɔkɔ̃i inɛ ŋa.

⁹ Bii ilu bisi í bɔ kiiti do nnyɛi, ideu kaa ce jiida, domi idɔi nnyɛi á kɔ̃ nɔ ku maa yaako inɛ ŋa.

¹⁰ Woo kpa inɛ ŋa à ya cé hai nɛ taalei, amma inɛ dee dee ŋai à ya maa wɔ̀ njoo si kuwɛɛɛ.

¹¹ Nnyɛi í ya fitaò idɔɔkɔ̃ɛi anu akã, amma ilu laakai í ya mu tɛɛi ku maa cokoò.

¹² Bii amanlu wa ceò ibo icɛ, akaweɛ ŋa fei à ya na a gaabui.

¹³ Ilu are do inɛ iyi wa taa inɛ gbugbã à nɛ mii akã gɔ. Hai bi Aɔ̃ Lafɛ̃ɛi aŋa fei à ba iju à waa yɛò ilu.

¹⁴ Bii ilaalu wa ce kiitii ilu are ŋa do dee dee ku jɛ, bommaɛ í ya ce gbugbãi hee do ajɔ fei.

¹⁵ Golo do kugbagbasii í ya jɔ̀ ama ku jɛ ilu laakai, amma ama iyi à jɔ̀ɛ í bɛjɛ á na ku jɛa iyeɛ anyɔ.

¹⁶ Bii inɛ laalɔ ŋa à waa kɔ̃ɔsi, dulum mɔ í ya kɔ̃ɔsii, amma inɛ dee dee ŋa aa yɛ nfe ku ce nŋa.

¹⁷ Bii ì kpã amaɛ iju, zigiɛ kaa maa da na iriɛ, nɔ amau á jɔ̀ inɔɛ ku maa dɔ̃.

¹⁸ Bii a kù waa nyisi inɛ ŋa iyi í jɛ idɔɔbii Ilaaɔ̃ má, zamaa í ya maa ceɛi bɛi í bi. Ilu inɔ didɔ̃i inɛ iyi wa jirima woodai Ilaaɔ̃.

¹⁹ Kù jɛ do ide ku fɔ nŋu akãi aa baaò woo ce icɛ wa si kpãa, domi baa bii í gbɔ bɛi ì dɔ̃ ci ya too si.

²⁰ Bii ì yɛ inɛ gɔ iyi í ya fɔ ide kù tã ku bɛi ku maa lasabu, jɔ̀ i mà iyi idei nnyɛi á nɛ kpãa ku re ti inɛɛu bɛ.

²¹ Woo ce icɛ iyi à jɔ̀ í bɛjɛ hai keekeɛ, á na ku jɛ ilu itĩ ku yika.

²² Ilu idɔɔkɔ̃ í ya maa dede ijai, nɔ ilu ara gbãa í ya ce kurara nkpɔ nkpɔ.

²³ Faaui amanɛi í ya too do anyɔ, amma inɛ iyi í ya kaye araɛ á ba saabu.

²⁴ Inɛ iyi í ba ikpɛ̃ɛ si mii iyi à ce ile, wa cea araɛ laalɔi, domi inɛ iyi í mà iyi inɛ gɔ í ce ile nɔ kù fɔ, ikpe í wa si irii lafɛ̃ɛi.

²⁵ Njoi amanɛ ŋa iyi ì waa ce ŋai í jɛ bɛi cɛkũm du ŋɛ. Amma nkãma ci ya ba inɛ iyi í dasi Aɔ̃ Lafɛ̃ɛ naanɛ.

²⁶ Inɛ nkpɔ nkpɔi í ya maa dɛdɛ nŋu ku dɔ̃ do inɛ ngbo ŋa, amma Aɔ̃ Lafɛ̃ɛ nŋu akãi í ya kiiti inɛ fei dee dee.

²⁷ Inɛ dee dee ŋa a ci ya bi inɛ ŋa iyi daa nŋa kù sĩa, nɔ inɛ laalɔ ŋa mɔ a ci ya bi inɛ jiida ŋa.