Mɔnda ŋa 28 - Bibeli do fee

¹ Inɛ laalɔ í ya maa sai baa bii inɛ kãma kù waa leleɛ. Amma inɛ dee dee í ya maa wɛɛi do idɔ ku buba bɛi ama muusu nla.

² Bii inɛi ilɛ gɔ ŋa à dedeò ide ku kɔ̀, inɛ ngbo ŋa à ya kɔ̃ɔsii, amma inɛ gɔ iyi í nɛ bisi do kumài í ya baaò mii fei wa si agbɛɛ.

³ Ilu are iyi wa kpã hai nɛ ngɔgɔ ŋa iju í yɛi bɛi ijĩ iyi í wɔ í bɛjɛ mii ŋa nɔ í fa ari wa.

⁴ Woo fũsi wooda ŋa awɔ à ya maa saabu inɛ laalɔ ŋai. Amma woo jirima wooda ŋa à ya maa ba ŋa ku jai.

⁵ Inɛ laalɔ ŋa a ci ya gbɔ yaasei mii iyi í jɛ dee dee kãma. Amma inɛ ŋa iyi à waa jirima Aɔ̃ Lafɛ̃ɛ à ya gbɔ yaasei mii iyi í jɛ dee dee feii.

⁶ Ilu are iyi kuceɛ í jɛ dee dee í sĩa í re ilu amani iyi kuceɛ í sãmi.

⁷ Ama iyi í nɛ laakai í ya jirima wooda, amma ama iyi í nɛ kpaasi laalɔ ŋa í ya dasi baaɛ anyɔi.

⁸ Woo wɛ̃a inɛ ŋa fia do inyi nla nla, amaniɛ á nyi bi inɛ iyi í nɛ araarei ilu are ŋa.

⁹ Inɛ iyi í dĩ itĩɛ ku ba ku maà gbɔ wooda, kutɔɔi lafɛ̃ɛ mii laalɔi.

¹⁰ Inɛ iyi wa tale si inɛ jiida ŋa si kpãa laalɔ á na ku dasi isa iyi nŋu takaɛ í tu. Amma inɛ jiida ŋa aa ba didɔ̃ ku jɛ tubu nŋa.

¹¹ Ilu amani í ya wɛɛ si nŋuò ilu bisii, amma ilu are iyi í nɛ laakai í ya fitaɛ gbugbãai.

¹² Bii inɛ jiida ŋa à waa bɔ waju, bɛɛrɛ nla nlai, amma bii inɛ laalɔ ŋai à waa bɔ waju, inɛ fei í ya manjii.

¹³ Inɛ iyi wa singa kuraraɛ ŋa ci ya bɔ waju, amma inɛ iyi í ce tuubai kuraraɛ nɔ í jɔ̀ɔ à ya ce araareɛi.

¹⁴ Ilu inɔ didɔ̃i inɛ iyi waati kãma fei wa ce njoi laalɔ ku ce, amma inɛ iyi í kɔ̀ wa mɔsi á yɛ wahala.

¹⁵ Amanlu ilu inɔ kukã iyi í jɛ bomma si ilu are ŋa, í yɛi bɛi muusu nla iyi wa dɔ̃ anu walakɔ bɛi mɛɛmu kugaabu gɔ iyi wa sɛi si inɛ gɔ.

¹⁶ Inɛ ngbo iyi kù nɛ laakai í ya maa raraa inɛ ŋai kpaakpaa, amma inɛ iyi kù bi amani ku ba do daa sãmi, hundeɛ í ya sɔi.

¹⁷ Inɛ iyi í kpa amanɛ nɔ idɔɛ wa yɛ taaleɛ, á sɛii hee ku maa bɔ ku dasi balɛɛ, nɔ inɛ kãma ku maà gɛɛ.

¹⁸ Inɛ iyi wa jɛ kuwɛɛ dee dee á maa wɛɛi si laakaiɛ, amma ilu muafiti á ce nfe.

¹⁹ Inɛ iyi wa logoo ilɛɛ á ba mii ku jɛ, Amma inɛ iyi wa gbɔa mii nfe ŋa ku too, arei á baa.

²⁰ Ilu naanɛ á ba kuwee nkpɔ nkpɔ, amma inɛ iyi wa saasaò nŋu ku jɛ ilu amani kaa gbe iyi kù ba ijuukpã.

²¹ Kù sĩa i na inɛ ntɔ si na iyi í jɔ̀ ì waa cɔ bɛɛrɛɛ, amma inɛ gɔ ŋa à ya coo baa na sɔnda kili akã.

²² Ilu kɔdɛɛ í ya maa saasaò fia ku cei, ci ya lasabuò baa are iyi á baa mɔm.

²³ Woo sɔ̃ inɛ kuraraɛ í ya na ku ba saabu ku re woo lɛlɛɛ.

²⁴ Inɛ iyi wa ce iyeò baaɛ ile nɔ wa ni kù jɛ taale kãma, nŋu do bata ngba fei akãi.

²⁵ Ilu kɔdɛɛ í ya dede ijai, amma inɛ iyi í dasi Aɔ̃ Lafɛ̃ɛ naanɛ á ba amani.

²⁶ Inɛ iyi wa kaaba lasabui iri araɛ nnyɛii, amma laalɔ kaa ba inɛ iyi wa ce isɛɛnɛɛ do laakai.

²⁷ Inɛ iyi í ya mua ilu are ŋa kaa ce are, amma inɛ iyi wa bii ijuɛ si are nŋa wa kpasi araɛ ikpe ŋai bututu.

²⁸ Bii inɛ laalɔ ŋai à waa bɔ waju inɛ fei í ya sa ku manjii, amma bii à cuku inɛ dee dee ŋai à ya kpɔ à kɔ̃ɔsi.