Mɔnda ŋa 26 - Bibeli do fee

Idei nnyɛi ŋa

¹ Bɛi kù sĩa agbɛ ku mu atɛ, walakɔ ijĩ ku wɔ sukui amaajɛ ku da, bɛɛbɛ mɔi nnyɛi kù jɔò amboe.

² Bɛi yɛi í ya fo, bɛɛbɛ mɔi bii à ceekpe inɛ si ngbɛ, ci ya muu.

³ Arezem í wɛɛi na acĩ, golo mɔ í wɛɛi na gbankɛlɛ, nɔ kpɔtɔɔ í wɛɛi na nnyɛi.

⁴ Maà jɛa nnyɛi do idei nnyɛiɛ ku ba awɔ takaɛ i maà na i jɔɔ.

⁵ I ya jɛa nnyɛi bɛi nnyɛiɛ í to ku ba ku maà na ku cɔ araɛ ilu bisi.

⁶ Inɛ iyi wa bɛò nnyɛi ide, í yɛi bɛi inɛ iyi í bu kutɛi araɛ nɔ á ba wahala.

⁷ Bɛi kutɛi wɛɛgɛ kù nɛ gbugbã, bɛɛbɛ mɔi mɔndai nnyɛi ci ya nɛ gbugbã kãma.

⁸ Inɛ iyi wa saabu nnyɛi, í yɛi bɛi inɛ iyi wa dĩ kuta si atavim ku bɛi ku taa.

⁹ Nnyɛi iyi wa kpa mɔnda í yɛi bɛi woo mɔ atɛ̃ iyi wa fĩ kpɔtɔɔi agũ.

¹⁰ Inɛ iyi í so nnyɛi walakɔ woo yiyi icɛ í yɛi bɛi woo ta afa iyi wa mɛɛ inɛ fei.

¹¹ Nnyɛi iyi í baa si daai nnyɛiɛ í yɛi bɛi aja iyi í nyi si ituɛ.

¹² Bii ì yɛ inɛ gɔ wa cɔ araɛ ilu bisi, idei nnyɛi á nɛ kpãa ku cɔ ku re ti inɛɛu bɛ.

Daai ilu ika

¹³ Ilu ika í ya nii, muusu nla gɔ í wa kpãa bɛ, iŋa buu gɔ wa dabii si kpãa ŋa.

¹⁴ Bɛi gambo í ya maa bibii si isɔɛ, bɛɛbɛ mɔi ilu ika í ya sũ ku maa sinda si daayiɛ.

¹⁵ Ilu ika í ya cãsi jɛɛ kujɛ awɔ, amma gɛlɛ ku bɔui í ya jɛaa icɛ.

¹⁶ Ilu ika í ya wɛɛ si iyi nŋu í nɛ bisi nŋu í re inɛ mɛɛje iyi í ya jɛ ide dee dee.

Mɔnda mmu ŋa

¹⁷ Bii ì fo ì dasi ija iyi kù wa baaɛ ì yɛi bɛi inɛ iyi í mu itĩi aja í faa waati iyi ajau wa lɔ.

^18-19 Inɛ iyi wa dĩ ijui kpaasiɛ nɔ wa ni, ǹ wa n baɛ ku cɛii, lafɛ̃ɛ í yɛi bɛi sũmu iyi wa ta afa do ina do kuta iyi á kpa inɛ ŋa.

²⁰ Bii jĩi kù wɛɛ ina í ya kui. Bɛɛbɛ mɔi bii woo kpantã inɛ ŋa a kù wɛɛ, ija mɔ í ya dusui.

²¹ Bɛi kanjũa í ya ce ina nyɛnyɛ, nɔ jĩi mɔ ku jɔ̀ ina ku maa jo, bɛɛbɛ mɔi woo bi ija í ya kɔ̃ɔsi inai ija.

²² Irii inɛ ku sɔ í yɛi bɛi sɔnda didɔ̃, nɔ í ya lɔi hee si lɛlɛi idɔi amanɛ.

²³ Ide didɔ̃ iyi wa singa inɔ sãmi í yɛi bɛi cakai amà iyi à mási imii isɔ fũfũ.

²⁴ Do gɛlɛ didɔ̃i inɛ iyi í cé kpaasi í ya singa muafiti iyi í waa si inɔ.

²⁵ Bii wa fɔ ide didɔ̃ɛ, maà dasi naanɛ, domi lasabu sãmii wa kɔ̃ si inɔɛ.

²⁶ Í singa inɛ ku céui do idei zamba, amma inɔ kukãɛ á na ku fita inɛ fei ku yɔɔ.

²⁷ Inɛ iyi í tu isai á dasi ndɛɛ, nɔ inɛ iyi wa bimbili kutai kutau á sinda si wa.

²⁸ Inɛ iyi wa sɔ ibo í ya cé inɛ ŋa iyi ideu wa dɔ̃i, nɔ do gɛlɛ didɔ̃i à ya bɛjɛò inɛ gɔ.