Mɔnda ŋa 25 - Bibeli do fee

¹ Mɔndai Salomɔɔ ŋau gɔgɔ ŋa wee má. Akawei Ezekiasi ilaalui Zudaa ŋai à tɔtɔɔ ŋa à kɔ ŋa.

Mɔnda ikã ikãi Salomɔɔ ŋa

² À ya ka yɛ amboei Ilaaɔ̃ si na iyi í jɔ̀ yaasei mii ŋa wa singa bi tɛɛ. À ya ka yɛ amboei ilaalu ŋa si na iyi í jɔ̀ à ya wusɛ mii ŋa.

³ Bɛi a kù mà kugbokai lele do ku jĩisai ilɛ, bɛɛbɛ mɔi i kaa mà mii iyi í wa idɔi ilaalu.

⁴ Bii à nya imii isɔ fũfũ, gbɛdɛ á yɔkɔ ku ceò mii kusĩa.

⁵ Bii à nya inɛ laalɔ ŋa hai bi ilaalu, kiiti á jɛ dee dee nɔ bommaɛ á ce gbugbã.

⁶ Maà ya tɔɔ fufu si wajui ilaalu, nɔ i maà ya buba si inyai inɛ nla ŋa.

⁷ Á sĩa a na a kpeɛ a ni, naa i buba si kitã iyi í nɛ bɛɛrɛu ihɛ̃, do iyi aa na a dedeɛ si wajui amanlu ŋa a dasiɛ anyɔ.

⁸ Bii ì yɛ ngɔgɔ, maà saasa i bɔò ile bi ku ce kiiti, domi inɛ iyi ì waa yɛ taaleɛu bii í na í fɔ ide nɔ à ba wee i kù nɛ ntɔ, bɛirei aa ce.

⁹ I ya teese ide iyi í wa si gãmɛi iŋɛò inɛ gɔ, nɔ i maà ya koo i sisi asiii inɛ gɔ,

¹⁰ domi bii inɛ gɔ í gbɔ á maa buɛi nɔ iriɛ ku bɛjɛ.

¹¹ Ide iyi à fɔ si waati iyi í jɔ í sĩa bɛi mii ndii wura iyi à ce si boodai isɔ fũfũ.

¹² Kai iyi ilu bisi wa ni, í yɛi bɛi lɛlɛawɔi wura walakɔ sabai wura, bi inɛ iyi wa gbɔɔ do laakai.

¹³ Bɛi inyi tũtũ í ya tũ arai inɛ si waatii amaajɛ ku da, bɛɛbɛ mɔi amaabɛ ilu naanɛ í ya tũ inɔi lafɛ̃ɛɛ.

¹⁴ Inɛ iyi wa tɔɔ fufu si inɔ akãɛ nɔ awɔɛ ci ya bɛi ku fũ í yɛi bɛi kudũi ijĩ do fufu nɔ ijĩu kù wɔ.

¹⁵ Do temuai à ya kãmiaò inɛ ngbo ŋa, nɔ do ide didɔ̃i á ya kɛkɛò lasabu ku lele nŋa.

¹⁶ Bii ì ba nyikɔ̃, maà jɔ́ɔ ku lɔ zaka, domi bii ì na ì jɔ́ɔ í lɔ zaka aa tuu wai.

¹⁷ Maà ya maa kpɔò idei kpaasiɛ ku bɔ ku ba ku maà na ku gbɛɛjiòɛ nɔ ku céɛ.

¹⁸ Woo jɛ sɛɛda ibo iyi wa má kpaasiɛ ide wa ceaa laalɔi bɛi golo walakɔ taakuba walakɔ afa iyi í ya mɛɛ amanɛ.

¹⁹ Bii ì waa kaaba inɛ laalɔ ajɔi ijuukpã í yɛi bɛi ì waa bɔ iŋa ku ŋɔ do inyí iyi í cɛ walakɔ ì na gbugbã si isɛ iyi kù waa nɛ baani.

²⁰ Bii ì waa kɔ̃a ilu inɔ kufɔ iri í yɛi bɛi ì bɔ ibɔɛ sukui tũtũ, walakɔ bɛi ì waa daa si aro si juju.

²¹ Bii ari wa kpa mbɛɛɛ, muaa sɔnda ku jɛ, bii agbɛ wa kpaa, muaa inyi ku mɔ.

²² Bii ì waa ce bɛɛbɛ Aɔ̃ Lafɛ̃ɛ á sãɛ, nɔ á yɛ bɛi ì waa kosi iriɛ ina nyɛnyɛi.

²³ Si bɛi fufui awɔ njɛi kpãai inunui í ya naaò ijĩ wa, bɛɛbɛ mɔi ide ku sisi í ya dede idɔɔkɔ̃i inɛ.

²⁴ Á sĩa i wa si inɔ ile keeke awɔ akã, do iyi aa wa si inɔ ile nla nla do abo à bi ija.

²⁵ Laabaau jiida iyi wa naa hai jĩijĩ í ya dɔ̃a inɛ sii bɛi inyi tũtũ í ya tũ gbangɔlɔi inɛ iyi agbɛ í mu.

²⁶ Inɛ dee dee iyi í jɔ̀ inɛ laalɔ í kɔaa si daaɛ í yɛi bɛi isɔ̃ iyi inyiɛ í fɔ walakɔ bɛi lɔgɔ iyi à bɛjɛ inyiɛ.

²⁷ Kù sĩa i jɛ nyikɔ̃ ku caa, bɛɛbɛ mɔi kù sĩa i dɛdɛ i ba bɛɛrɛ ku caa.

²⁸ Inɛ iyi kù mà araɛ ku mu í yɛi bɛi ilu iyi kù nɛ bindi.