Mɔnda ŋa 24 - Bibeli do fee

Ilu bisi do inɛ laalɔ

¹ Maà ya bi idei woo ce laalɔ ŋa nɔ i maà ya dɛdɛ i jɛ kpaasi nŋa,

² domi lasabu nŋa si mii ŋa ku bɛjɛi í ya wa, nɔ idei laalɔ ku cei í ya wa gɛlɛ nŋa.

³ Do bisii à ya maò ile, nɔ do laakaii à ya coo ku nɛ gbugbã,

⁴ nɔ do kumài à ya kɔ̃ ilaawaɛ ŋa do mii jiida ku nɛ fia dimi baa yooma fei.

⁵ Inɛ iyi í nɛ laakaii í jɛ ilu gbugbã, nɔ inɛ iyi í nɛ kumà, gbugbãɛ í ya maa kɔ̃ɔsi.

⁶ Na nŋu, á sĩa i lasabu i bɛi i bɔ igũ, nɔ ikɔ jiidai inɛ nkpɔ nkpɔi á jɔ̀ i jɛ igũu.

⁷ Nnyɛi kaa yɔkɔ ku mà yaasei laakai. Na nŋu, kaa yɔkɔ ku fɔ ide bii à buba anu koofai ilu.

⁸ Inɛ iyi wa lasabu si laalɔ ku ce á na ku nya iri si laalɔ ku ce.

⁹ Lasabu iyi nnyɛi í ya ce fei, dulum nii. Nɔ à ya cé woo yaako inɛi.

¹⁰ Bii ì mɔngɔ temua si wahala ì nyisi gbugbã hai nɛɛi.

¹¹ Ce kookaai i faaba inɛ ŋa iyi a kù ce nkãma nɔ à waa bɔ ku kpa ŋa.

¹² Bii ì na ì ni i kù mài, Ilaaɔ̃ wa yɔɔ, nŋu iyi í mà mii iyi wa ce hee si lɛlɛi idɔi amanɛ. Nŋu iyi wa mu hundeɛ í mà, nɔ á sãa inɛ fei mii iyi í ce.

¹³ Amam, jɛ nyikɔ̃, domi í dɔ̃. Inyii nyikɔ̃ fãfã iyi wa jo wa á dɔ̃a gɛlɛɛ si.

¹⁴ Bɛɛbɛ mɔi laakai á dɔ̃ɛ si. Bii ì nɔɔ alaɛ á dɔ̃ nɔ kpãa ku cɔɛ mɔ kaa ce nfe.

¹⁵ Maà dɛdɛ kpasɛ̃i inɛ dee dee ku gba do mayɛɛ bɛi inɛ laalɔ í ya ce. Maà jɔ̀ ku kua bi kuwaɛ,

¹⁶ domi baa bii inɛ dee dee í cuku isɛ gbɛɛje, í ya nyi ku dede má. Amma inɛ laalɔ ŋa wahala í ya kɛkɛ ŋai nɔ a ci ya dede má.

¹⁷ Maà jɔ̀ inɔɛ ku dɔ̃ bii mbɛɛɛ í cuku, walakɔ bii í koosɛ.

¹⁸ Bii ì ce bɛɛbɛ, kaa dɔ̃a Aɔ̃ Lafɛ̃ɛ si, nɔ á yɔkɔ ku jɛ idɔɔkɔ̃ɛ kaa dede si mbɛɛɛu má.

¹⁹ Maà jɔ̀ idɔɛ ku kɔ̃ si inɛ laalɔ ŋa, nɔ i maà ce kɔdɛɛi yaasei kuwɛɛ nŋa,

²⁰ domi woo ce laalɔ ŋa a kù nɛ kpãa ku cɔ, nɔ kuwɛɛ nŋa í yɛi bɛi fitila iyi wa ku.

²¹ Amam, i ya maa jirima Aɔ̃ Lafɛ̃ɛ do ilaalu. Maà ya tɔtɔɔ do inɛ ŋa iyi à ya bi mii fei ku fɔtɔtɔ,

²² domi nfe ku ce nŋa á naai anu akã, nɔ inɛ kãma kaa mà dimii ijuukpã iyi Aɔ̃ Lafɛ̃ɛ do ilaalu aa jɔ̀ ku ba ŋa.

Ikɔ mmui ilu laakai ŋau má

²³ Mɔnda iyi ilu laakai ŋau à nyi à kpa má wee. Kubi ku na ntɔ bi ku ce kiiti mii laalɔi.

²⁴ Bii woo kiiti í na ilu taale ntɔ, zamaa á ceekpeɛ nɔ inɛ ŋa a cóo,

²⁵ amma bii í yɛ taaleɛ á ba saabu do kuwee do ididɔ̃.

²⁶ Inɛ iyi í ya sɔ̃ɛ ntɔ, kubi jiidai wa nyisiɛ bɛ.

²⁷ Hanya i ce icɛɛ waduude, ce gbangaaɛ ŋa i tã, i bɛi i ma ileɛ.

²⁸ Maà jɛ sɛɛda ibo i yɛò taalei kpaasiɛ. Maà dĩ ijui inɛ ŋa do ide ku fɔɛ bɛɛbɛ.

²⁹ Maà ni, amu mɔ an ceaai bɛi nŋu mɔ í ceem nɔu, an sãa mɔkɔu ihɛ̃ gbesei mii iyi nŋu mɔ í ceem nii.

Daai ilu ika

³⁰ Ajɔ nŋu gɔ ǹ too itĩ kɔɔi ikoi jĩi ndii rezɛ̃ɛi ilu ika hai nɛ yaase gɔ.

³¹ Ŋɔi ǹ ba wee kakayɛtɛ í jɛ ilɛu fei, agũ ŋa à cã à bii ilɛu fei, nɔ idĩ iyi à ma do kuta ŋau í cuku.

³² Iyi ǹ cɔɔ, ŋɔi ǹ wasi ku lasabu. Nɔ ǹ ba ikɔ si mii iyi ǹ yɛu.

³³ Si njoo ku sũ keeke do siiko keeke, do awɔ ku kɔlɔmbɛ keeke,

³⁴ are á na ku zambaɛi bɛi ile, nɔ ari á na ku boeɛ bɛi ile bata ngba.