Mɔnda ŋa 23 - Bibeli do fee

¹ Bii ì waa jɛ do inɛ ngbo gɔ, ce laakai iŋɛò inɛ iyi ì waa jɛu.

² Bii ì jɛ woo bi ijɛi, jɔ̀ i mu araɛ.

³ Maà jɔ̀ sɔnda didɔ̃ ŋau a faɛ, domi á yɔkɔ ku jɛ sɔndai zambai.

⁴ Maà wahala araɛ na amani. Maà lasabuò mɔm.

⁵ Hai ì yɔsi amani iju gbakã ì ya ba wee í fangaa í tã tãi. Í yɛi bɛi amaniu í ce ikpa ŋai nɔ í fo hee lele bɛi kungbã.

⁶ Bii inɛ iyi kù jɛ ilu inɔ akã í kpeɛ ku jɛ maà koo, maà na i ce kɔdɛɛi sɔndaɛ mɔm,

⁷ domi á maa ce dooai fei ndɛɛi si inɔɛ. Á ya sɔ̃ɛ mɔm ku ni i jɛ nɔ i mɔ, amma kù jɛ iyi í bi si idɔɛ.

⁸ Sɔnda iyi ì jɛ bɛ fei aa sãsii. Nɔ faajii kubi iyi ì baa ku ceu bɛ si ngbɛi ì coo.

⁹ Fɛò nnyɛi ku sɔ̃ ideɛ, á donda ikɔ jiidaɛi.

¹⁰ Maà tekĩò kɔɔ nwo. Maà lɔ si buɛi kɔyɔ ŋa,

¹¹ domi à nɛ ilu gbugbã woo degbe nŋa. Aɔ̃ Lafɛ̃ɛi á gba ku ja nŋa.

¹² Jɔ̀ i jɛsi ikɔ iyi à waa naɛ do idɔɛ fei, nɔ i de itĩ i gbɔ ikɔi inɛ iyi í nɛ kumà.

¹³ Maà jɔ̀ amaɛ hai kpãa iju, bii ì tɛaa kpɔtɔɔ kaa ku.

¹⁴ Nɔ mɔm kpɔtɔɔ iyi ì waa tɛaaui á nyaa si andɛi iku.

Ikɔ iyi baa wa sɔ̃ amaɛ

¹⁵ Amam, bii ì jɛ ilu laakai inɔm á dɔ̃.

¹⁶ Bii ì na ì waa fɔ ide iyi í tɛ, an ya n nɛ inɔ didɔ̃ nla nla.

¹⁷ Maà nɛ kɔdɛɛi kuwɛɛi inɛ laalɔ ŋa, amma i ya maa jirima Aɔ̃ Lafɛ̃ɛ waati kãma fei.

¹⁸ Do yaase bɛɛbɛ kuwɛɛɛ á dɔ̃ ala, nɔ kpãa ku cɔɛ mɔ kaa ce nfe.

¹⁹ De itĩ i gbɔ idem, nɔ i jɛ ilu bisi. Jɔ̀ i maa nɛ si kpãa jiida.

²⁰ Maà ya wa inɔi woo mɔ atɛ̃ ŋa do woo jɛ sɔnda ku lɔ zaka ŋa,

²¹ domi woo mɔ atɛ̃ hee ku kpaa do ilu kɔdɛɛ à ya na a ce arei. Aa na a sĩ njoo nɔ a maa dasi ibɔ ku ga ŋa.

²² Sotĩ i gbɔ ide iyi baa abíɛ wa sɔ̃ɛ, nɔ i maà na i donda iyeɛ si waati iyi í gbo.

²³ Dɛdɛ ntɔ do bisi do ikɔ do laakai nɔ i maà fũsi ŋa awɔ.

²⁴ Baai inɛ dee dee í ya nɛ inɔ didɔ̃ nla nla. Inɛ iyi í bí ama ilu laakai ilu inɔ didɔ̃i.

²⁵ Jɔ̀ iyeò baaɛ ŋa a nɛ inɔ didɔ̃u bɛ siɛ. Jɔ̀ iye abíɛ ku ba inɔ didɔ̃u bɛ.

²⁶ Amam, dasim naanɛ i cɔ kucem do laakai.

²⁷ Jɔ̀ i mà iyi abo à ta icu í yɛi bɛi lumbu, nɔ inaabo à ce sakara í yɛi bɛi lɔgɔ ku mongolo.

²⁸ À ya koo a maa degbe inɛ ŋai bɛi ile ŋa. Inɛmɔkɔ nkpɔ nkpɔi à ya dasi kurara.

Daai woo mɔ atɛ̃

²⁹ Yoo ŋai à ya ba inɔ kufɔ. Yoo ŋai à ya ba wahala. Yoo ŋai à ya ba ija. Yoo ŋai à ya maa weewea. Yoo ŋai à ya maa ba kumɛɛ hai nɛ yaase ŋa. Yoo ŋai à ya nɛ iju nkpa.

³⁰ Woo mɔ atɛ̃ ku sũ si ŋai do woo dɛdɛ atɛ̃ didɔ̃ ku dɔ̃ inunu ŋa.

³¹ Maà ya bi atɛ̃ vɛ̃ɛ nkpa kusĩa iyi wa gba si kɔɔfu. Í ya lɔ inɔ gbangɔlɔi faala faala,

³² amma iri ku kpaɛ, i ya sinda ku ŋɔɛi bɛi njo wukuku.

³³ Waati nŋu ijuɛ á sinda nɔ i lɔsi ide hai nɛ yaase ŋa ku fɔ.

³⁴ Á jɔɛ bɛi ì koo ì waa sũ mɔm nii si inɔ tenku walakɔ si antaii jĩi bii à so si acɔi akɔi inyi.

³⁵ Aa na i maa ni, à cãm, amma n kù gbɔ ara kuro kãma. À cãm golo anu nkpɔ nkpɔ, amma n kù gbɔ nkãma. Bii ǹ na n jĩ í gbe n ba ngɔgɔ n mɔ mái.