Mɔnda ŋa 21 - Bibeli do fee

¹ Idɔi ilaalu í yɛi bɛi acãi inyi si awɔi Aɔ̃ Lafɛ̃ɛ. Nŋui í ya maa sindaɛ bɛi í bi.

² Amanɛ í ya maa tamaa iyi mii iyi nŋu wa ce fei í sĩai, amma Aɔ̃ Lafɛ̃ɛi wa yɛ idɔi inɛ fei.

³ Bii amanɛ í nɛ daa jiida nɔ wa ce mii iyi í sĩa, í ya dɔ̃a Aɔ̃ Lafɛ̃ɛ si ku re bii wa ceaa kuwee ŋa.

⁴ Ara ku so do inɛ ku dondai í ya nyisi dulum dii inɛ laalɔ ŋa.

⁵ Lasabui í ya bɔò woo ce icɛ ikpa bi ididɔ̃. Amma woo saasa á koo ku dasi ari.

⁶ Amanɛ ku sɔ ibo ku bɛi ku baò fia, fiau á na ku lɔi bɛi cua nɔ ku bɔò lafɛ̃ɛ si iku.

⁷ Inɔ kukãi inɛ laalɔ ŋai í ya bɔò ŋa si nfe ku ce si na iyi í jɔ̀ a ci ya bi wooda ku jirima.

⁸ Kpãai ilu taale í ya kai, amma daai ilu ntɔ í ya tɛi.

⁹ Á sĩa i wa si inɔ ile keeke awɔ akã, do iyi aa wa inɔ ile nla nla do abo iyi í bi ija.

¹⁰ Ilu inɔ kukã í ya maa dɛdɛ laalɔ ku cei, ci ya nɛ baa araarei kpaasiɛ.

¹¹ Bii à kpã woo yaako inɛ iju, baa nnyɛi í ya ba bisii, nɔ bii à waa kɔ ilu bisi, í ya ba kumài.

¹² Aɔ̃ Lafɛ̃ɛ inɛ dee deeu í ya maa cɔ kpasɛ̃i ilu inɔ kukã ŋa do laakai, nɔ í ya dasi inɛ laalɔ ŋa wahalai.

¹³ Inɛ iyi í dĩ itĩɛ waati iyi ilu are gɔ wa tɔɔ faaba, nŋu mɔ á na ku tɔɔ faaba ku kua.

¹⁴ Amua iyi à ce si asii í ya tɛ idɔɔkɔ̃ nɔ í ya tũ baa idɔ gbãa.

¹⁵ Ntɔ ku tooi í ya jɛ inɔ didɔ̃i inɛ dee dee ŋa, amma nŋui í ya jɛ zigiidai inɛ laalɔ ŋa.

¹⁶ Inɛ iyi í yaa hai si kpãa jiida á nɛ bi kuwai iku ŋa kaa kpɛ.

¹⁷ Inɛ iyi í bi faayi á ce are, nɔ inɛ iyi ci ya gbea atɛ̃ do ididɔ̃ nla nla kaa ce fia.

¹⁸ Inɛ laalɔ ŋa aa yɛ ijuukpã iyi inɛ jiida ŋa a kaa yɛ.

¹⁹ Á sĩa i koo i maa wa si gbaa do iyi aa maa wɛɛ do abo à bi ija iyi í ya dede idɔɔkɔ̃.

²⁰ Amani jiida ŋa do ikpo í ya wa kpasɛ̃i ilu bisi, amma nnyɛi í ya jɛ titɛɛ ku bɛjɛɛi fei.

²¹ Inɛ iyi wa dɛdɛ nŋu ku jɛ inɛ dee dee do inɛ jiida, hundeɛ á sɔ. Inɛ ŋa aa mà bɛɛrɛɛ nɔ a ceaa jiida.

²² Ilu bisi í ya bɔ igũi si ilui kaasãanɛ ŋa nɔ ku kɛkɛ bindi iyi à waa kaabau.

²³ Bitandi á jĩò inɛ iyi í nɔ gɛlɛɛ do amɛɛ.

²⁴ Woo yaako inɛ fei ilu faaui do woo tɔɔ fufu. Faau hai nɛ yaasei í ya maa tale siɛ si mii iyi wa ce fei.

²⁵ Kɔdɛɛi á kpa ilu ika domi kù bi icɛ ku ce,

²⁶ waati kãma fei í ya maa ce kɔdɛɛi ti ngu ŋai, amma inɛ jiida njɛ í ya maa ce amua hai nɛ kɔɔi.

²⁷ Aɔ̃ Lafɛ̃ɛ í cé kuweei inɛ laalɔ, iyi í re mɔm bii lafɛ̃ɛ wa coo do lasabu laalɔ.

²⁸ Woo jɛ sɛɛda ibo á ku, amma inɛ iyi í ya saku ku gbɔ ide, waati kãma fei á ya ba kpãai ku fɔ ideɛ.

²⁹ Inɛ laalɔ í ya maa kaaba araɛi, amma inɛ jiida í ya maa ce laakaii isɛɛnɛɛi.

³⁰ Bisi do kumà do ikɔ iyi amanɛ í nɛ, kãma kaa sinda idɔɔbii Aɔ̃ Lafɛ̃ɛ.

³¹ Ajɔi igũ à ya dĩa acĩ ŋa gaayi a bɔò ŋa igũ, amma igũ ku jɛu í wa awɔi Aɔ̃ Lafɛ̃ɛ.