Mɔnda ŋa 20 - Bibeli do fee

¹ Atɛ̃ vɛ̃ɛ í ya jɔ̀ inɛ ku jɛ woo yaako amanɛi, nɔ í ya nɛ kɔsɔngu. Inɛ iyi í ya jɔ̀ atɛ̃u ku kpaa kaa jɛ ilu laakai.

² Idɔɔkɔ̃i ilaalu í ya nɛ njoi bɛi anu kudɔ̃i muusu nla. Inɛ iyi wa dedeɛ, hundeɛ wa wɔ̀ jɔlɔi.

³ Inɛ iyi í ya jĩò wɔbia, á jɛ ilu bɛɛrɛ. Amma nnyɛi ŋa à ya fo a dasi ijai.

⁴ Ilɛ ku fa ci ya bindii ilu ika jɛadɔ̃. Sukui ku da nŋu mɔ í ya dɛdɛ mii iyi á da amma ci ya ba nkãma.

⁵ Lasabui amanɛ í yɛ bɛi inyii bua iyi í jĩ isa, amma ilu laakai í ya yɔkɔ ku fitaòɛ wa gbugbãa.

⁶ Inɛ nkpɔ nkpɔi í ya maa ni nŋu í jɛ ilu naanɛ, amma yooi í jɛ ilu naanɛ do ntɔ.

⁷ Inɛ jiida í ya jɛ kuwɛɛi dee dee. Inɔ didɔ̃i í ya na ku jɛ ti amaɛ ŋa.

⁸ Bii ilaalu wa ce kiiti, í ya yɛ laalɔui bii í cɔ ilu anu akã.

⁹ Yooi á yɔkɔ ku ni nŋu kù nɛ taale kãma, nŋu í teese kuwɛɛ nŋu í maaju.

¹⁰ Aɔ̃ Lafɛ̃ɛ í cé gũa iyi kù jɛ dee dee do kuwo iyi kù jɛ dee dee.

¹¹ Ama keeke, aa mà bii í jɛ daaɛ á na ku sĩa si kuceɛ.

¹² Aɔ̃ Lafɛ̃ɛ í mu nwa itĩ iyi aa ka gbɔò idei, iju mɔ ka yɛò ilu.

¹³ Maà bi njoo ku caa ku ba i maa na i ce are. I ya wɔ njoo, aa ba mii ku jɛ.

¹⁴ Woo ra iwo í ya ca iwoui ku maa ni kù sĩa, amma bii í raa í tã í ya maa saabu araɛi.

¹⁵ Wura í wɛɛ, nɔ lɛgɛ jiida nkpɔ nkpɔ mɔ í wɛɛ, amma iyi í jɛ jiida í rei í jɛ, idei ilu bisi.

¹⁶ Bii inɛ gɔ í jɛsi nŋu ku so gbesei inɛ gɔ si iriɛ, gba ibɔɛ. Bii í nɔ í jɛ ti inɛ njoo mɔi tilasiɛ ku jɔ̀ɛ tɔɔma.

¹⁷ Sɔnda iyi inɛ í ce ile í ya dɔ̃aa sii titã, amma si anyiɛ í ya na ku yɛaai bɛi kuta cɔ̀cɔ́ si gɛlɛ.

¹⁸ Bii ì waa bi i ce ngɔgɔ koo bee ikɔ titã. Iyi í re mɔm bii ì waa bi i bɔ igũ.

¹⁹ Woo sɔ irii amanɛ ci ya singa asii. I ya saa ilu ide nkpɔ.

²⁰ Inɛ iyi í ceekpe iyeɛ walakɔ baaɛ, lafɛ̃ɛ á kui bɛi fitila í ya ku si ilu kuku nla nla.

²¹ Amani iyi inɛ í ba anu akã ci ya na ku ba kuwee ku kpɛ si.

²² Maà ni aa sã gbese. Dasi Aɔ̃ Lafɛ̃ɛ naanɛ, nŋui á faabaɛ.

²³ Aɔ̃ Lafɛ̃ɛ kù bi a maa wã iwo do kiloo iyi kù jɛ dee dee.

²⁴ Aɔ̃ Lafɛ̃ɛi wa nɛò kuwɛɛi amanɛ. Amanɛ takaɛ kaa mà kpãa iyi á sĩa nŋu ku too.

²⁵ Kali nla nlai bii ì cea Aɔ̃ Lafɛ̃ɛ kuwã ì bɛi ì na ì waa lasabu má do ankãanyi.

²⁶ Ilaalu ilu bisi í ya nya inɛ laalɔ ŋai hai si inɔi inɛ jiida ŋa nɔ ku kpã ŋa iju ntɔ ntɔ.

²⁷ Lasabui í jɛ fitila iyi Aɔ̃ Lafɛ̃ɛ í mua amanɛ. Nŋui í ya wusɛ hee lɛlɛi idɔi lafɛ̃ɛ ku kiitiɛ.

²⁸ Jiida ku jɛ do ntɔi í jɛ bii anyii ilaalu. Bommaɛ í ya ba gbugbãi bii í jɛ inɛ dee dee.

²⁹ Awaasũ ŋa à ya nɛ inɔ didɔ̃i si gbugbã nŋa, amma bɛɛrɛi mɔkɔ ngbo ŋa í wai si ntoi iri fũfũ.

³⁰ Bii à cã inɛ laalɔ à mɛɛ, á jɔ̀ laalɔ ku ceu. Goloui á teese idɔɛ.