Mɔnda ŋa 2 - Bibeli do fee

Laakai í ya jɔ̀ laalɔ ku jĩò inɛ

¹ Amam, sotĩ i gbɔ ikɔm. Mu wooda ŋa iyi ǹ wa n jilɛɛ si idɔɛ.

² Jɔ̀ i de itĩ si laakai iyi ǹ wa n kɔɛ, nɔ i ce kookaai i gbɔ yaaseɛ.

³ Tɔɔ kumà sobi, nɔ i kpe laakai ku faabaɛ.

⁴ Jɔ̀ i dɛdɛ laakai bɛi isɔ fũfũ, jɔ̀ i dɛdɛɛ bɛi amani iyi wa singa.

⁵ Bii ì waa ce bɛɛbɛ aa mà bɛi aa jirima Aɔ̃ Lafɛ̃ɛ, nɔ aa ba kumà hai bi tɛɛ.

⁶ Aɔ̃ Lafɛ̃ɛi í ya mua inɛ laakai. Hai si gɛlɛɛi kumà do yaasei mii ŋa ku gbɔ í ya fita wa.

⁷ Í ya sobi inɛ ŋa iyi a kù nɛ taale, nɔ í ya degbe inɛ dee dee ŋa, ku jɛ bɛi tɛli nŋa.

⁸ Ilaaɔ̃ í ya degbe inɛ ŋa iyi à waa nɛ si dee dee ku jɛ. Í ya degbe inɛɛ ŋa si isɛɛnɛ nŋa.

⁹ Amam, bii ì waa gbɔ idem, aa mà mii iyi í jɛ dee dee, do mii iyi wa too kpãa do mii iyi í tɛ. Mii ŋau bɛi á bɔò amanɛ si ididɔ̃.

¹⁰ Laakai á buba si idɔɛ, nɔ kumà á jɔ̀ i nɛ inɔ didɔ̃.

¹¹ Bisi á maa degbeɛ, nɔ laakai á bii anyiɛ

¹² ku ba i maà na i dasi kpãai laalɔ ku ce, nɔ i maà na i dasi awɔi ilu ibo ŋa,

¹³ iyi à jɔ̀ kpãai dee dee ku jɛ à koo à mu kpãai ilu kuku.

¹⁴ Inɛ ŋau à ya nɛ inɔ didɔ̃ si laalɔ ku ce. Inɔ didɔ̃ nŋa fei í ya wai si ide sãmi.

¹⁵ Kpãa nŋa í ce awɔ anyi nɔ kù tɛ.

¹⁶ [Laakai do bisi aa nyi a bii anyiɛ má,] nɔ á jɔ̀ i saa abo ace sakara iyi á bi ku lɛlɛɛ do gɛlɛ didɔ̃,

¹⁷ nŋu iyi í kɔ̀si mɔkɔ sinteɛ nɔ i dede si akabuu iyi aŋaò à dĩ si wajui Ilaaɔ̃.

¹⁸ Daaɛ á jɔ̀ ku ku, kuceɛ ŋa mɔ wa bɔòɛ bi kuwai iku ŋa.

¹⁹ Inɛ ŋa iyi à koo siɛ baa akã nŋa ci ya baa, a ci ya yɛ kpãai kuwɛɛ má.

²⁰ Na nŋu, jɔ̀ i too kpãai inɛ jiida ŋa, nɔ i mu kpãai inɛ dee dee ŋa,

²¹ domi inɛ jiida ŋa do hai nɛ taale ŋai aa buba si ilɛu nɔ a maa wa bɛ.

²² Amma aa lele inɛ laalɔ ŋa do hai gbɔ ide ŋa a nya ŋa hai si ilɛu.