Mɔnda ŋa 19 - Bibeli do fee

¹ Ilu are iyi daaɛ í sĩa, í tia nnyɛi woo sɔ ibo.

² Himmai inɛ iyi kù nɛ kumà kù nɛ aranfãani kãma. Nɔ saasa í ya naaò kurara wai.

³ Nnyɛii amanɛ í ya bɛjɛ kuwɛɛɛi, amma taalei Aɔ̃ Lafɛ̃ɛi í ya yɛ.

⁴ Amani í ya kɔ̃ɔsi akpɔi kpaasi ŋa wai, amma ilu are, baa kpaasi akã iyi í nɛ, í ya saai.

⁵ Woo jɛ sɛɛda ibo kaa gbe iyi kù ba ijuukpã, nɔ woo sɔ ibo kaa fita si.

⁶ Inɛ nkpɔi í ya maa dasi ilu bɛɛrɛ ŋa fufu ngbɛ ngbɛ, nɔ inɛ fei kpaasii woo ce amuai.

⁷ Nyaanzei ilu are ŋa fei à ya cooi, aa fɔ idei kpaasiɛ ŋa iyi à fũsiɛ awɔ má? Baa bii wa bi ku ba ŋa ide ku fɔ, a ci ya wa bɛ.

⁸ Inɛ iyi í kɔkɔ ku lasabu í bi hundeɛi. Inɛ iyi í bi yaasei mii gɔ ku gbɔ í ya to si inɔ didɔ̃i.

⁹ Woo jɛ sɛɛda ibo kaa gbe iyi kù ba ijuukpã nɔ woo sɔ ibo á ce nfe.

¹⁰ Kù jɔ nnyɛi ku maa wa si inɔi amani nla nla. Bɛɛbɛ mɔi kù jɔ aru ku jɛ inɛ ngboi ilaalu ŋa.

¹¹ Idɔi ilu laakai ci ya saasa ku kɔ̃, nɔ í ya jɛ ilu bɛɛrɛi si na iyi í jɔ̀ í ya gbɛjɛ taale iyi à ceaa.

¹² Idɔɔkɔ̃i ilaalu í ya jɔ̀ njo ku mu inɛi bɛi anu kudɔ̃i muusu nla, amma jiida ku jɛɛ í dɔ̃i bɛi ikpã í ya dɔ̃a fɔfɔ tũtũ si.

¹³ Ama nnyɛi í ya naa baaɛ nfe ku ce wai, nɔ abo à bi ija í yɛi bɛi ibai inyi iyi wa tontoo waati kãma fei.

¹⁴ Amanɛ á yɔkɔ ku jɛ tubui kpasɛ̃ do amanii baaɛ ŋa. Amma abo jiida amuai Aɔ̃ Lafɛ̃ɛi.

¹⁵ Ika í ya tale si inɛ njoo ku sũi, nɔ inɛ iyi kù bi ngɔgɔ ku ce, ari á kpaa.

¹⁶ Inɛ iyi wa jirima wooda wa wɔ njoo si hundeɛi. Inɛ iyi wa dondaɛ á ce nfe.

¹⁷ Inɛ iyi wa cea ilu are ŋa amua, wa wɛ̃a Aɔ̃ Lafɛ̃ɛi. Nŋui á na ku sãa.

¹⁸ Kpã amaɛ iju do njuma hai waati iyi aa nɔɔ, amma maà cãa i kpaa.

¹⁹ Ilu idɔɔkɔ̃ yaamɔ í nɛ a jɔ̀ ku sãi. Bii a kù jɔ̀ ku sã, á muaa kpãa ku ce mái.

²⁰ Sotĩ i gbɔ ikɔ ŋa, nɔ i jɔ̀ a gbagba siɛ, aa yɛ i na i jɛ ilu laakai.

²¹ Mii nkpɔ nkpɔi amanɛ í ya lasabu nŋu ku ce, amma idɔɔbii Aɔ̃ Lafɛ̃ɛi í ya ce.

²² Mii iyi à ya saabu si amanɛi í jɛ jiida ku jɛɛ, nɔ á sĩa i jɛ ilu are iyi í ya fɔ ntɔ do iyi aa jɛ ilu fia iyi í ya sɔ ibo.

²³ Aɔ̃ Lafɛ̃ɛ ku jirima í ya jɔ̀ amanɛ ku ba kuwɛɛ. Kaa sũò ari nɔ laalɔ kãma kaa naa siɛ.

²⁴ Ilu ika í ya cãsi jɛɛ kujɛ awɔ, amma ci ya yɔkɔ ku bɔò sɔndau gɛlɛ.

²⁵ Cã woo yaako amanɛ ku ba nnyɛi ku ce laakai, amma i ya gbagba si ilu laakai, á gbɔ yaasei ikɔɛ.

²⁶ Ama iyi wa ce baaɛ ile nɔ wa kpã iyeɛ iju í ya dasi iyeò baaɛ anyɔi.

²⁷ Amam, bii ì kɔ̀ ikɔ ku gbɔ, aa toa kumà anyi.

²⁸ Woo jɛ sɛɛda ibo ci ya saalu asaiya, nɔ inɛ laalɔ ŋa laalɔi à ya bi.

²⁹ Ijuukpã wa degbe woo yaako inɛ ŋa, nɔ golo wa degbe nnyɛi ŋa.