Mɔnda ŋa 18 - Bibeli do fee

¹ Inɛ iyi wa nya araɛ ikã aranfãanii araɛi wa dɛdɛ, nɔ idɔɛ í ya kɔ̃i si mii jiida iyi inɛ ŋa à waa cea fei.

² Nnyɛi ci ya degbe ku gbɔ yaasei ide kãma, nŋu de ku ba ku fɔ tɛɛ.

³ Inɔ kukã í ya naaò inɛ ku cé wai, bɛɛbɛ mɔi anyɔ, anyi ncãi í ya naaò wa.

⁴ Idei gɛlɛi amanɛ í yɛi bɛi inyii ido iyi í jĩ isa, í yɛi má bɛi inyi iyi wa cã iyi á na amanɛ bisi.

⁵ Kù sĩa woo ce kiiti ku kɔ̀ ku na inɛ dee dee ntɔ si na iyi í jɔ̀ wa cɔ bɛɛrɛi inɛ iyi í ce kurara.

⁶ Bii nnyɛi wa fɔ ide í ya naaò kakɔɔ wai, nɔ ideɛ í ya bíaa goloi.

⁷ Gɛlɛi nnyɛii í ya too do nfe ku ce, nɔ ku muu bɛi cɛkũm.

⁸ Idei woo sɔ irii inɛ í yɛi bɛi sɔnda didɔ̃, nɔ í ya lɔi hee si lɛlɛi idɔi amanɛ.

⁹ Inɛ iyi kù waa yesi icɛɛ do inɛ iyi wa bɛjɛ icɛu, aŋa fei nyaanze akãi.

¹⁰ Aɔ̃ Lafɛ̃ɛi í jɛ ile ku nɛ gbugbã. Tengi bɛi inɛ dee dee í ya sa koo manji.

¹¹ Ilu fia amaniɛi í ya maa kaaba, nɔ ku maa cɔɔ bɛi bindi ku nɛ gbugbã iyi á maa degbe nŋu.

¹² Ara ku so í ya naa amanɛ nfe ku ce wai, amma ara ku kaye í ya jɔ̀ amanɛ ku nɛ bɛɛrɛi.

¹³ Inɛ iyi ci ya sotĩ ku gbɔ ide ku bɛi ku jɛ, wa nyisi nnyɛi ku jɛɛi, nɔ wa dasi araɛ anyɔi.

¹⁴ Wɔɔkɔ í ya jɔ̀ amanɛ ku temuaò bɔ̃ɔi, amma bii inɔi inɛ í fɔ hee í caa yooi á yɔkɔ ku muaa gbugbã má.

¹⁵ Ilu laakaii í ya ba kumà. Nɔ ilu bisi í ya maa de itĩ si ikɔi.

¹⁶ Amua ŋa à ya cĩa amanɛ kpãa, nɔ à ya jɔ̀ lafɛ̃ɛ ku to hee si inɛ nla ŋa.

¹⁷ Si kiiti inɛ iyi í tako í fɔ idei í ya jɔ ilu ntɔ, amma bii kpaasiu í fɔ titɛɛ nŋui í ya naaò inya kumá wa.

¹⁸ Kpasai í ya kpa irii kakɔɔ, nɔ nŋui í ya la baa inɛ nla ŋa ija.

¹⁹ Í ya gaabu i koo bi kpaasiɛ iyi ì raraa ku re i kɛkɛ bindi ku nɛ gbugbã. Nɔ idei kakɔɔ ku teese í ya gaabu ku re i lɔ ile ku nɛ gbugbã iyi à sɔkɔ.

²⁰ Amanɛ í ya jɛ ku yoi si kumà ku fɔɛ. Inɛ fei í ya ba mii iyi á jɛ ku maa yoi si idei gɛlɛɛ.

²¹ Ide á yɔkɔ ku jɔ̀ amanɛ ku faaba inɛ walakɔ ku kpaa. Ilu ide nkpɔ á yɛ isoi ndɛɛ.

²² Inɛ iyi í ba abo í ba didɔ̃i. Aɔ̃ Lafɛ̃ɛi í ce araareɛ.

²³ Ilu are í ya fɔ idei ku maa tɔɔò suuru, amma ilu amani í ya jɛaai do kugaabu.

²⁴ Kpaasi nkpɔ nkpɔ ku nɛ á yɔkɔ ku to inɛ do wahala, amma kpaasi jiida í re nyaanze.