Mɔnda ŋa 17 - Bibeli do fee

¹ Í sĩa i maa jɛ pɛ̃ɛ kokosi ngbɛ do laakai ku sũ do iyi aa maa wa inɔ kpasɛ̃i ija bii iŋa wa kɔ̃.

² Woo ce icɛ ilu laakai í ya kãmia ama yaamɔi lafɛ̃ɛɛ, nɔ á ba ikpɛ̃ si tubu nŋu do amai baa ŋau.

³ Do inai à ya yɔò isɔ fũfũ do wura a cɔò jiida ku jɛ nŋa, amma Aɔ̃ Lafɛ̃ɛi í ya wusɛ idɔi amanɛ ku cɔ.

⁴ Woo ce ide sãmi fei woo gbɔ idei inɛ laalɔ ŋai. Woo sɔ iboi í ya de si gɛlɛ sãmi itĩ.

⁵ Inɛ iyi wa bu ilu are inɛ iyi í takaɛi wa bu, nɔ inɛ iyi í nɛ inɔ didɔ̃ si wahalai kpaasiɛ á ba ijuukpã.

⁶ Tɔku ŋai à ya jɛ bɛɛrɛi mɔkɔ ngbo ŋa. Nɔ jirimai amu ŋa fei si baa nŋa ŋai í ya wa.

⁷ Ide jiida kù jɔò nnyɛi, nɔ iyi í re mɔm amanlu kù jɔò ibo ku sɔ.

⁸ Inɛ gɔ ŋa à ya maa tamaa bɛi amua ku cei aŋai á naa aŋa mii jiida ŋa wa. Tengi bii à lɔ fei, wũai aŋa á cei.

⁹ Inɛ iyi í bi inɛ ŋa a buu, í ya kpa idei kurara iyi à ceai. Inɛ iyi wa fɔ idei kurarau, kpaasi ŋa aa jĩòɛi.

¹⁰ Kugbagba si í ya to si ilu laakai ku re baa golo anu cĩɔ iyi aa cã nnyɛi.

¹¹ Ilu inɔ kukã ci ya bi kaa amanɛ ku kosi, amma aa bɛ siɛ inɛ kugaabu gɔ wa ku kpãa iju.

¹² Í sĩa i ko muusu nla iyi í nyɔ amaɛ ŋa do iyi aa ko nnyɛi ajɔ iyi sũmuɛ á dede.

¹³ Inɛ iyi bii à cea jiida cɛ̃ɛi í ya sã, laalɔ kaa fita hai kpasɛ̃ɛ.

¹⁴ Inɛ iyi í dede kakɔɔ, í yɛi bɛi inɛ iyi í lu idĩ iyi wa gɛɛ inyi. Na nŋu, coko hee ija ku maa dede.

¹⁵ Aɔ̃ Lafɛ̃ɛ kù bi inɛ iyi í yɛ taalei ilu ntɔ do inɛ iyi kù yɛ taalei inɛ iyi í ce kurara.

¹⁶ Aranfãani mii fia í nɛ si awɔi nnyɛi. Kaa yɔkɔ ku raò baa bisi domi í ce nnyɛi tã.

¹⁷ Kpaasi jiida í ya bi kpaasiɛi waati kãma fei, nɔ baa si waatii wahala í ya nyisi iyi nŋuu baakɔɔɛi.

¹⁸ Inɛ iyi í ce nnyɛi nŋu akãi í ya jɛsi nŋu ku sã gbesei ngu ŋa.

¹⁹ Woo bi ija woo bi dulum nii. Inɛ iyi wa so araɛ lele wa ce nfei araɛi.

²⁰ Inɛ iyi inɔɛ kù sĩa ci ya nɛ inɔ didɔ̃. Nɔ woo sɔ ibo ci ya dasi kaa si laalɔ.

²¹ Inɛ iyi í bí ama nnyɛi á nɛ inɔ kufɔ. Baa iyi í nɛ ama sũmu ci ya nɛ inɔ didɔ̃.

²² Inɔ didɔ̃ iwɔ jiidai. Amma inɔ kufɔ í ya jɔ̀ inɛ ku gbɛi.

²³ Inɛ yaamɔ ŋa à ya gba amuai do asii nɔ a bii iju si asaiya.

²⁴ Ilu laakai ŋa à ya maa yɔsi bisi ijui waati kãma fei. Amma nnyɛi ŋa à ya maa lasabui si mii ŋa iyi a kaa ba.

²⁵ Ama nnyɛi í ya fɔ inɔi baaɛi, nɔ ku jɔ̀ idɔi iyeɛ ku kɔ̃.

²⁶ Kù sĩa a jɔ̀ hai nɛ taale ku sã ngɔgɔ. Bɛɛbɛ mɔi kù sĩa a cã inɛ dee dee ŋa.

²⁷ Inɛ iyi í nɛ kumà ci ya fɔ ide nkpɔ. Nɔ inɛ iyi í nɔ araɛ ilu laakaii.

²⁸ Baa nnyɛi, bii wa coko, aa ni ilu bisii. Bii kù waa fɔ ide, aa tamaa ilu laakaii.