Mɔnda ŋa 16 - Bibeli do fee

Ye gigii Aɔ̃ Lafɛ̃ɛ waati kãma fei si kuwɛɛɛ

¹ Amanɛ ŋa à ya dasi idɔ aŋa a ce mii nkpɔ nkpɔ, amma iri ku kpaɛi fei ndɛɛ wa naai hai bi Aɔ̃ Lafɛ̃ɛ.

² Amanɛ í ya tamaa si mii iyi nŋu wa ce fei í sĩai, amma Aɔ̃ Lafɛ̃ɛ njɛi í mà idɔɛ.

³ So icɛɛ ŋa i daa Aɔ̃ Lafɛ̃ɛ si awɔ, fei ndɛɛ á ce.

⁴ Mii iyi Aɔ̃ Lafɛ̃ɛ í ce fei í nɛ mii iyi wa lelei. Nɔ í ce baa inɛ laalɔi na ajɔi wahala.

⁵ Aɔ̃ Lafɛ̃ɛ í cé lasabui ilu faau, à nɔ à mà kãm kãm iyi aa ba ijuukpã.

⁶ Si jiida ku jɛ do si ntɔi à ya kpaò idei kurara, nɔ bɛɛrɛi Aɔ̃ Lafɛ̃ɛ ku mài í ya jɔ̀ amanɛ ku saa laalɔ.

⁷ Bii Aɔ̃ Lafɛ̃ɛ í saabu si kucei inɛ gɔ í ya jɔ̀ baa lafɛ̃ɛ do mbɛɛɛ ŋa a dɔ̃i.

⁸ Á sĩa i ba amani keeke do yaase jiida, do iyi aa ce mii iyi kù sĩa i baò amani nkpɔ nkpɔ.

⁹ Amanɛi í ya jilɛ mii iyi á ce, amma Aɔ̃ Lafɛ̃ɛi í ya coo.

Idei ilaalu ŋa

¹⁰ Idei ilaalu í ya nɛ gbugbãi bɛi idei Ilaaɔ̃. Na nŋu kiitiɛ ci ya jɛ do awɔ anyi.

¹¹ Aɔ̃ Lafɛ̃ɛ í bi gũa do kiloo ŋa iyi à jɛ dee dee. Nŋui í jilɛ kuwoi mii baa yooma fei.

¹² Ilaalu í ya cé kucei woo ce laalɔ ŋa, domi si dee dee ku jɛi gbugbãi bommaɛ í wa.

¹³ Ilaalu í ya bi inɛ ŋa iyi à waa fɔ ide dee dee, do inɛ ŋa iyi à waa fɔ ide iyi í tɛ.

¹⁴ Idɔɔkɔ̃i ilaalu í ya jɔ̀ ku kpa amanɛ, amma ilu laakaii í ya ce kookaai ku lɛlɛɛ.

¹⁵ Bii wajui ilaalu wa sĩa í ya jɔ̀ amanɛ ku ba kuwɛɛ, nɔ didɔ̃ɛ í ya yɛi bɛi ijĩi jɛadɔ̃.

Kuwɛɛ do ara ku mu si gãmɛi kpaasi ŋa

¹⁶ Bii amanɛ í nɛ laakai, í sĩa í re ku nɛ wura, nɔ bii í nɛ bisi, í sĩa í re ku nɛ isɔ fũfũ.

¹⁷ Inɛ jiida ŋa à ya saa laalɔi. Inɛ iyi wa wɔ njoo si kuceɛ wa faaba hundeɛi.

¹⁸ Faau í ya kɛkɛ amanɛi, ara ku so mɔ í ya naaò nfe ku ce wai.

¹⁹ Á sĩa i nɛ idɔi ara ku kaye nɔ i maa wa inɔi ilu are ŋa do iyi aa koo i maa ba ilu faau ŋa amani ku kpɛ̃.

²⁰ Woo lasabu si mii ŋa í ya ba inɔ didɔ̃. Ilu inɔ didɔ̃i inɛ iyi í dasi Aɔ̃ Lafɛ̃ɛ naanɛ.

²¹ Inɛ iyi í ya lasabu do laakaii aa ni í nɛ bisi. Ide iyi à fɔ do kubi í ya kãmia inɛ ŋa.

²² Laakaii í jɛ icui kuwɛɛi amanɛ. Nɔ nnyɛi ku cei nnyɛi á kpãa iju.

²³ Inɛ ŋa iyi à nɛ laakai à ya fɔ ide do bisi, nɔ ide nŋau ku kãmia inɛ ŋa.

²⁴ Ide didɔ̃ í yɛi bɛi nyikɔ̃. Í dɔ̃ nɔ í ya kɔ̃ɔa ara si gbugbã.

²⁵ Amanɛ í ya wɛɛ si iyi kpãai nŋu kpãa jiidai, amma bi ikui í ya na ku bɔòɛ.

²⁶ Arii í ya tale si amanɛ icɛ ku ce. Bii kù jɛ na ariu kaa ce icɛ.

²⁷ Inɛ nfe ide sãmii í ya maa lasabu ku ce, nɔ ide ku fɔɛ í ya yɛi bɛi ina.

²⁸ Inɛ laalɔ í ya bí ijai, woo sisi ide mɔ í ya fɛ kpaasi ŋai.

²⁹ Inɛ laalɔ í ya lɛlɛ kpaasiɛi ku dasiɛ kpãa laalɔ.

³⁰ Inɛ iyi wa lasabu nŋu ku ce laalɔ baa bii kù coo titã, í yɛ bɛi í coo mbɛ tã.

³¹ Ntoi iri fũfũ bɛɛrɛ nla nlai bi inɛ iyi í baa. Kuwɛɛ iyi í sĩai í ya jɔ̀ inɛ ku baa.

³² Inɛ iyi idɔɛ ci ya saasa ku kɔ̃ í sĩa í re woo ja igũ ilu wɔɔkɔ. Á sĩa i kãmia araɛ do iyi aa kãmia ilu.

³³ Amanɛ ŋa à ya sɔ acĩ kpasai a ceò kubee, amma mii iyi á na ku ce fei í wa awɔi Aɔ̃ Lafɛ̃ɛ.