Mɔnda ŋa 15 - Bibeli do fee

¹ Ide ku jɛ do kurɔ í ya tũ idɔi, amma ide ku fɔ do gbugbã í ya dede idɔɔkɔ̃i.

² Idei ilu laakai ŋa í ya jɔ̀ inɛ ŋa a bi kumài, amma ide hai nɛ yaasei nnyɛi ŋa à ya maa fɔ.

³ Aɔ̃ Lafɛ̃ɛ wa cɔ mii fei, wa yɛ inɛ jiida ŋa nɔ wa yɛ inɛ laalɔ ŋa.

⁴ Ide didɔ̃ í yɛi bɛi jĩi ndii kuwɛɛ, amma ide laalɔ í ya mɛɛ inɛi.

⁵ Nnyɛi nŋu akãi í ya kɔ̀si ikɔi baaɛ, ilu laakai í ya gbɔ kugbagba si.

⁶ Amani nla nlai í ya wa inɔ kpasɛ̃i inɛ dee dee, amma amanii ilu inɔ kukã í ya naaò bitandi ŋa wai.

⁷ Ilu bisi ŋa à ya kɔ inɛ si kumài, amma idɔi nnyɛi ŋa kù jɛ bɛɛbɛ.

⁸ Aɔ̃ Lafɛ̃ɛ í cé kuweei inɛ laalɔ ŋa, amma í ya gba kutɔɔi inɛ dee dee ŋai do inɔ didɔ̃.

⁹ Aɔ̃ Lafɛ̃ɛ í cé kucei inɛ laalɔ ŋa, amma í bi inɛ iyi wa dɛ mii iyi í jɛ dee dee.

¹⁰ Inɛ iyi í jɔ̀ kpãa jiida fei ijuukpã nla nla wa degbeɛ. Inɛ iyi kù bi a gbagba siɛ á ku.

¹¹ Aɔ̃ Lafɛ̃ɛ, nŋu iyi í mà mii iyi wa ce bi kuwai iku ŋa, aa fɔ idei idɔi amanɛ má?

¹² Woo yaako inɛ ci ya bi a sɔ̃ɔ kuraraɛ, na ŋɔi í ce ci ya bee ikɔi ilu laakai ŋa.

¹³ Inɔ didɔ̃ í ya jɔ̀ wajui amanɛ ku sĩai, amma inɔ kufɔ í ya jɔ̀ amanɛ ku kua gbugbãi.

¹⁴ Ilu laakai í ya maa dɛdɛ kumài waati kãma fei, amma nnyɛi ŋa à ya maa wai si icɛi nnyɛi nŋa ŋa.

¹⁵ Ajɔ kãma ci ya dɔ̃a ilu inɔ kufɔ si, amma waati kãma fei jingaui bi ilu inɔ didɔ̃.

¹⁶ Í sĩa i nɛ nyankuti i maa màò bɛɛrɛi Aɔ̃ Lafɛ̃ɛ do iyi aa jɛ ilu amani nɔ i maa wɛɛò zigiida.

¹⁷ Á sĩa a naɛ ifɔ́ i jɛ tengi bii kubi í wa, do iyi aa ceɛ sɔnda do iŋai kɛtɛ ku nɛ ikpo tengi bii kucé í wa.

¹⁸ Ilu idɔɔkɔ̃ í ya dede ijai, amma ilu temua í ya kpa ijai.

¹⁹ Kpãai ilu ika í ya nɛ agũ ŋai, amma ti inɛ dee dee ŋa í ya maa sĩai.

²⁰ Ama ilu laakai í ya jɔ̀ inɔi baaɛ ku maa dɔ̃i, amma nnyɛi í ya donda iyeɛi.

²¹ Nnyɛi í ya nɛ inɔ didɔ̃ si ide hai nɛ yaase ku ceɛi, amma ilu laakai isɛɛnɛ jiidai í ya ce.

²² Icɛ ŋa iyi inɛ í dasi idɔ nŋu ku ce, icɛ ŋau ci ya ce bii kù nɛ woo kɔ, amma inɛ iyi í nɛ woo kɔ ŋa, icɛɛ í ya cei.

²³ Inɛ iyi í mà ide jiida ku jɛ í ya nɛ inɔ didɔ̃. Ntɔ ntɔ ide ku fɔ si waati iyi í jɔ í sĩa.

²⁴ Ilu laakai í ya mu kpãai kuwɛɛi nɔ ku jɔ̀ kpãa iyi wa bɔ iku.

²⁵ Aɔ̃ Lafɛ̃ɛi í ya kɛkɛ ilei ilu faau, amma í ya kɔ̃ɔa ti jaaɔ̃ si gbugbãi.

²⁶ Aɔ̃ Lafɛ̃ɛ í cé lasabu laalɔ ŋa, amma í bi ide didɔ̃ iyi í maaju.

²⁷ Inɛ iyi wa bi nŋu ku jɛ ilu amani do kpãa laalɔ á fa laalɔ wa si kpasɛ̃ɛ, amma inɛ iyi ci ya jɛ a raa á ba hunde sisɔ.

²⁸ Inɛ dee dee í ya lasabui titã ku bɛi ku fɔ ide, amma ide sãmii inɛ laalɔ ŋa à ya saasa a maa fɔ.

²⁹ Aɔ̃ Lafɛ̃ɛ í ya jĩò inɛ laalɔ ŋa, amma í ya maa gbɔ kutɔɔi inɛ dee dee ŋa.

³⁰ Bii ì cɔ inɛ gɔ do kubi á nɛ inɔ didɔ̃. Bii ì sɔ̃ inɛ gɔ laabaau jiida ì ya muaa gbugbãi.

³¹ Inɛ iyi í jɛsi kugbagba iyi á faabaɛ á wa si inɔi ilu bisi ŋa.

³² Inɛ iyi kù bi a fɔ siɛ ide í donda araɛi, amma inɛ iyi í ya gbɔ kai á jɛ ilu laakai.

³³ Bɛɛrɛi Aɔ̃ Lafɛ̃ɛ ku mài, á kɔɛ si bisi. Bii ì bi i ba bɛɛrɛ, í gbe i kaye araɛ. Bii ì bi i nɛ bɛɛrɛ, jɔ̀ i kaye araɛ titã.