Mɔnda ŋa 14 - Bibeli do fee

¹ Abo ilu bisi í ya mua kpasɛ̃ gbugbã, amma abo nnyɛi í ya kpa kpasɛ̃i do awɔɛ.

² Inɛ iyi daaɛ í sĩa, í mà bɛɛrɛi Aɔ̃ Lafɛ̃ɛi. Amma inɛ iyi wa ce laalɔ í ya donda Aɔ̃ Lafɛ̃ɛi.

³ Ide ku fɔi nnyɛii í ya jɔ̀ a cãa golo, amma idei ilu bisi í ya faabaɛi.

⁴ Hai si gbugbãi kɛtɛ ku logoo ŋai amaajɛ nkpɔ nkpɔ wa naa, amma bii kɛtɛ ŋau a kù wa, suu í ya gbe ngbɛi.

⁵ Woo jɛ sɛɛda ilu naanɛ ci ya sɔ ibo. Woo jɛ sɛɛda ilu ibo ci ya fɔ ntɔ.

⁶ Woo yaako inɛ í ya dɛdɛ bisi amma ci ya baa, amma kumà ku ba í faalaa ilu laakai.

⁷ Sa hai bi nnyɛi domi i kaa ba kumà kãma siɛ.

⁸ Bisii ilu laakaii í jɛ ku mà yaasei kpãaɛ, amma nnyɛi í ya nyɔi na nnyɛi ku jɛɛ.

⁹ Nnyɛi ŋa a ci ya saalu idei dulum du ŋa ku teese, amma Ilaaɔ̃ í bi inɛ dee dee ŋa.

¹⁰ Inɔ didɔ̃ do inɔ kufɔ iyi í wa si idɔi amanɛ, lafɛ̃ɛ nŋu akãi í mà ndɛɛ. Inɛ mmu kãma kaa yɔkɔ ku kpɔ̃ɔ do nŋu.

¹¹ Kpasɛ̃i inɛ laalɔ ŋa á na ku cuku, amma ti inɛ jiida ŋa á maa wɛɛi do ajɔ fei, ku la ku maa kɔ̃ɔsi.

¹² Amanɛ í ya wɛɛ si iyi kpãai nŋu kpãa jiidai, amma bi ikui í ya na ku bɔòɛ.

¹³ Anyi á yɔkɔ ku singa inɔ kufɔ, nɔ inɔ didɔ̃ mɔ á yɔkɔ ku kpa iri do inɔ kufɔ.

¹⁴ Ilu daa sãmi á yɛ ndɛɛ, bɛɛbɛ mɔi inɛ jiida á ba ribai jiida ku ceɛ.

¹⁵ Inɛ iyi kù nɛ kumà í ya dasi iyi à sɔ̃ɔ fei naanɛi, amma ilu bisi í ya ce laakaii si isɛɛnɛɛ.

¹⁶ Ilu bisi í ya ce njoi laalɔi nɔ ku saa, amma nnyɛi í ya maa kaaba araɛi nɔ í ya nɛ saasa.

¹⁷ Ilu idɔɔkɔ̃ í ya ce idei awɔ anyii, nɔ inɛ iyi wa bi laalɔ ku ce í ya na ku to araɛ do mbɛɛtɛi.

¹⁸ Tubui nnyɛi ŋai idei awɔ anyi ku ce, amma kumài í ya jɛ ribai ilu laakai ŋa.

¹⁹ Inɛ laalɔ ŋa aa na a gulɛ si wajui inɛ jiida ŋa, ilu inɔ kukã ŋa mɔ anu koofai inɛ dee dee ŋa.

²⁰ Inɛ kãma ci ya bi ilu are, hee do kpaasiɛ ŋa fei à ya toa anyii, amma ilu amani í ya nɛ kpaasi ŋai bututu.

²¹ Inɛ iyi í donda kpaasi í ce dulum nii, amma ilu inɔ didɔ̃i inɛ iyi í nɛ araarei ilu are ŋa.

²² Woo lasabuò laalɔ ku ce ŋa a ci ya to waju, amma inɛ ŋa iyi à waa lasabuò jiida ku ce Ilaaɔ̃ á ce nŋa didɔ̃ nɔ ku nyisi ŋa kubi.

²³ Icɛ fei í ya nɛ kubasii, amma ide nkpɔ kù nɛ kaa are.

²⁴ Amanii í ya jɛ ribai ilu laakai ŋa, amma nnyɛi ŋa a ci ya jɔ̀ idei awɔ anyi ku ce nŋa.

²⁵ Sɛɛda ilu naanɛ í ya faaba hunde nkpɔ, amma woo sɔ ibo í ya dasi inɛ ŋa kurarai.

²⁶ Inɛ iyi í mà bɛɛrɛi Aɔ̃ Lafɛ̃ɛ í nɛ bi ku lɔkɔsi iyi í nɛ gbugbã mbɛ, nɔ Ilaaɔ̃ á maa degbe amaɛ ŋa.

²⁷ Bɛɛrɛi Aɔ̃ Lafɛ̃ɛ ku mài í jɛ icui kuwɛɛ, nɔ nŋui í ya sinda inɛ hai si kpãai iku.

²⁸ Bɛɛrɛi ilaalui í jɛ zamaa nkpɔ nkpɔ ku nɛɛ, amma ilaalu iyi kù nɛ zamaa á na ku ce nfe.

²⁹ Inɛ iyi idɔɛ ci ya saasa ku kɔ̃ í nɛ laakai mbɛ nla nla, amma ilu ara gbãa í ya fitaò nnyɛiɛ bantumai.

³⁰ Laakai ku sũi idɔ í ya jɔ̀ ara ku maa nɛ baanii, amma kɔdɛɛ í yɛi bɛi bɔ̃ɔ iyi wa ŋɔ kũkũɛ ŋa.

³¹ Inɛ iyi wa wahala ilu are kù mà bɛɛrɛi inɛ iyi í takaɛi, inɛ iyi wa ce araareɛ í mà bɛɛrɛi inɛ iyi í takaɛui.

³² Wahala í ya kɛkɛɛ inɛ laalɔ ŋa, amma inɛ jiida ŋa à ya maa leekĩi dim dim baa si iku.

³³ Bisi í wa si idɔi ilu laakai, amma a kaa yɔkɔ a yɔɔ bi nnyɛi.

³⁴ Dee dee ku ce á jɔ̀ ilɛ ku nɛ bɛɛrɛ, amma dulum ku ce, anyɔi ilɛui.

³⁵ Woo ce icɛ ilu bisi í ya jɔ̀ ilaalu ku wɛɛò inɔ didɔ̃, amma idɔɔkɔ̃ɛ í ya wa si inɛ iyi wa dasiɛ anyɔ.