Mɔnda ŋa 13 - Bibeli do fee

¹ Ama ilu laakai í ya gbɔ ikɔi baaɛi, amma woo yaako inɛ ci ya gbɔ kai.

² Jiida ku fɔ á jɔ̀ inɛ ku ba mii jiida, amma idei ijai woo zamba inɛ ŋa à ya bi.

³ Inɛ iyi wa nɔ gɛlɛɛ í ya faaba araɛi, amma ilu ide nkpɔ wa bɔ ku ce nfei araɛi.

⁴ Ilu ika í ya bi mii nkpɔ amma ci ya ba nkãma, amma ilu himma í ya ba mii iyi í bi feii.

⁵ Inɛ dee dee kù bi ibo, amma inɛ laalɔ, yaako do anyɔi í jɛ titɛɛ.

⁶ Daa jiidai inɛ dee dee í ya bii anyiɛi, amma inɔ kukãi í ya ce nfei ilu dulum.

⁷ Inɛ gɔ ŋa à waa ce ara nŋa ilu amani, a kù bɛi a kù nɛò nkãma. Amma inɛ gɔ ŋa à waa ce ara nŋa ilu are, nɔ à nɛ amani nkpɔ nkpɔ.

⁸ Do fiai ilu amani í ya yaò hundeɛ, amma inɛ kãma ci ya bɔ laalɔ ku ce bi ilu are.

⁹ Kuwɛɛi inɛ dee dee ŋa í yɛi bɛi inya kumá iyi wa naaò inɔ didɔ̃ wa, amma kuwɛɛi inɛ laalɔ ŋa í yɛi bɛi fitila iyi wa ku.

¹⁰ Ara ku so lele í ya naaò ija wai, amma inɛ ŋa iyi à ya gbɔ ikɔ, aŋai à jɛ ilu bisi ŋa.

¹¹ Amani iyi inɛ gɔ í ba faala í ya tãi gbãa gbãa, amma amani iyi í ba kekee kekee í ya maa kɔ̃ɔsii.

¹² Kpãai ngɔgɔ ku cɔ iyi kù waa ce, inɔ kufɔi, amma kpãa ku cɔ iyi í kɔ̃ inɔ didɔ̃ nla nlai.

¹³ Inɛ iyi ci ya saalu ikɔ á ba wahala, amma inɛ iyi wa jirima wooda á ba ribaɛ.

¹⁴ Ikɔi ilu laakai í ya jɔ̀ inɛ ku ba kuwɛɛ, í ya nya inɛ hai si andɛi iku.

¹⁵ Inɛ ŋa à ya saabu ilu laakai ŋa, amma kpãai woo zamba inɛ ŋa í gaabu.

¹⁶ Ilu laakai í ya lasabui do kumàɛ ku bɛi ku ce ngɔgɔ, amma hai nɛ yaase ŋa à ya fitaò nnyɛi nŋa gbugbãai.

¹⁷ Woo bɛ hai nɛ naanɛ í ya dasi araɛ wahalai, amma woo bɛ ilu naanɛ í ya naaò inɔ didɔ̃ wai.

¹⁸ Are do anyɔi í ya jɛ ti inɛ iyi ci ya gba ikɔ, amma inɛ iyi í ya gbɔ kugbagbasii í ya ba bɛɛrɛ.

¹⁹ Mii iyi amanɛ í bi, bii í ce, í ya jɔ̀ ku nɛ inɔ didɔ̃. Nnyɛi ŋa a ci ya bi laalɔ nŋa ku jɔ̀.

²⁰ Inɛ iyi í ya wa bi ilu bisi ŋa, á jɛ ilu bisii, amma inɛ iyi wa too nnyɛi ŋa á dasi ide laalɔ.

²¹ Laalɔi í ya maa too ilu dulum ŋa, amma inɔ didɔ̃i í ya jɛ ribai inɛ dee dee ŋa.

²² Inɛ jiida í ya jɔ̀a amaɛ do tɔkuɛ ŋa tubu, amma amanii ilu dulum, ti inɛ dee dee ŋai á na ku jɛ.

²³ Á yɔkɔ ku jɛ ikoi ilu are í ce amaajɛ jiida, amma inɛ laalɔ ŋa aa taa gbugbã a ko ndu ŋa.

²⁴ Inɛ iyi ci ya kpã amaɛ iju kù buui, inɛ iyi í buu í ya kpãa ijui do njuma.

²⁵ Inɛ dee dee í ya jɛi nɔ ku yo, amma arii í ya jɛ ti inɛ laalɔ ŋa.