Mɔnda ŋa 10 - Bibeli do fee

Mɔnda ikã ikã ŋa si kuwɛɛi amanɛ

¹ Mɔndai Salomɔɔ ŋa wee. Ama ilu bisi í ya tũ inɔi baaɛi, amma ama nnyɛi í ya fɔ inɔi iyeɛi.

² Amani ŋa iyi inɛ í ba do kpãa laalɔ ci ya nɛ aranfãani, amma dee dee ku jɛ í ya nya inɛi hai andɛi iku.

³ Aɔ̃ Lafɛ̃ɛ ci ya jɔ̀ ari ku kpa inɛ dee dee, amma í ya kɔ̀a ilu inɔ kukã mii iyi wa lelei.

⁴ Inɛ iyi wa ce icɛ do kuulinti, wa faa araɛ are wai. Amma inɛ iyi í nɛ himma í ya ce fiai.

⁵ Inɛ iyi wa tɔtɔɔ amaajɛ sukui amaajɛ ku da ilu bisii, amma inɛ iyi wa sĩ njoo sukui amaajɛ ku da á yɛ anyɔ.

⁶ Inɛ dee dee ŋa à ya ba kuwee ŋa, amma ide laalɔi í ya wa si gɛlɛi ilu inɔ kukã ŋa.

⁷ À ya ye gigii inɛ dee deei a maa saabuɛò, amma à ya gbɛjɛ idei inɛ laalɔ ŋai hee do iri nŋa ŋa.

⁸ Ilu laakai í ya jɔ̀ à nyisiɛ kpãai. Amma nnyɛi ilu ide nkpɔ í ya ce nfei araɛ.

⁹ Inɛ iyi wa jɛ kuwɛɛ dee dee á maa wɛɛi si laakaiɛ. Amma inɛ iyi wa ce laalɔ si asii, kuceɛ á na ku fita gbugbãa.

¹⁰ Inɛ iyi wa singaa kpaasi ŋa ntɔ wa wahala ŋai, amma inɛ iyi wa sɔ̃ ŋa ntɔ ku ba ku baaò ŋa wa si kpãa wa naa nŋa laakai ku sũ wai.

¹¹ Idei inɛ dee deei í jɛ icui kuwɛɛ. Amma idei ilu inɔ kukã, laalɔi í ya bi.

¹² Njɛ ku céi í ya naaò ija ŋa wa, amma kubi í ya bii kurara feii.

¹³ Ilu laakai í ya fɔ idei do bisi, amma nnyɛi kù nɛ iwɔ, í gbe golo.

¹⁴ Ilu bisi ŋa kumài í ya jɛ kosĩa nŋa. Amma idei nnyɛi ŋa í ya naaò asɔɔ wai gbãa gbãa.

¹⁵ Amani í ya maa degbe ilu fiai bɛi ilu ku nɛ gbugbã, amma ilu are í wa andɛi nfe ku ce.

¹⁶ Ribai inɛ dee deei í jɛ kuwɛɛ. Riba iyi inɛ laalɔ í ya ba, dulum nii í ya ceò.

¹⁷ Inɛ iyi wa gbɔ kai í ya maa bɔ wajui si kuwɛɛ, amma inɛ iyi ci ya gbɔɔ í ya nyɔi.

¹⁸ Inɛ iyi í cé kpaasi nɔ wa singaa ilu muafitii. Bɛɛbɛ mɔi inɛ iyi wa sɔ irii inɛ ŋa í ce nnyɛii.

¹⁹ Ilu ide nkpɔ kaa kua taale, amma ilu laakai í ya nɔ gɛlɛɛi.

²⁰ Idei inɛ dee dee í nɛ bɛɛrɛ bɛi isɔ fũfũ, amma lasabui inɛ laalɔ ci ya nɛ aranfãani kãma.

²¹ Idei inɛ dee dee í ya bukaataa inɛ nkpɔ, amma nnyɛi ŋa à ya kui si na iyi í jɔ̀ à kua laakai.

²² Kuweei Aɔ̃ Lafɛ̃ɛi í ya jɔ̀ amanɛ ku ba amani. Kookaaii amanɛ ci ya kɔ̃ɔsi nkãma.

²³ Nnyɛi í ya nɛ inɔ didɔ̃ si laalɔ ku ce. Bɛɛbɛ mɔi inɔ didɔ̃i ilu bisi fei í wai si laakai ku nɛ.

²⁴ Njoi mii iyi inɛ laalɔ ŋa à waa cei í ya ba ŋa. Mii iyi inɛ dee dee ŋa à bii à ya ba.

²⁵ Bii wahala í dede bɛi fufu dabii, í ya gbangaa inɛ laalɔ ŋai, amma inɛ dee dee ŋa à ya maa leekĩ dim dim hee do ajɔ fei.

²⁶ Bɛi inyi ikã í ya cea inyí do bɛi cua í ya cea iju bɛɛbɛ mɔi ilu ika í ya cea lafɛ̃ɛɛ.

²⁷ Hundei inɛ ŋa iyi à mà bɛɛrɛi Aɔ̃ Lafɛ̃ɛ í ya sɔi, amma ilu dulum ŋa à ya kui si gbugbã.

²⁸ Kɔkɔɔi kpãa ku cɔi inɛ dee dee ŋai í jɛ inɔ didɔ̃, amma inɛ laalɔ ŋa a kaa ba mii iyi à waa cɔ kpãaɛ.

²⁹ Aɔ̃ Lafɛ̃ɛ í ya maa degbe inɛ dee dee ŋa iyi à waa too kpãaɛ, amma í ya ce nfei inɛ laalɔ ŋa iyi a kù waa tooɛ.

³⁰ Nkãma kù wɛɛ iyi á kɛkɛ inɛ dee dee ŋa, amma aa nya inɛ laalɔ ŋai hai si ilɛu ihɛ̃.

³¹ Idei inɛ dee dee í ya na inɛ bisii, amma aa bù amɛi ilu ibo.

³² Inɛ dee dee í ya fɔ idei do kurɔ, amma ide sãmii í ya wa si gɛlɛi inɛ laalɔ.