Mɔnda ŋa 1 - Bibeli do fee

¹ Mɔnda ŋa iyi Salomɔɔ amai Davidi ilaalui Izirɛliu í kpa wee.

Mii iyi tiau wa lele

² Mɔnda ŋau aa jɔ̀ amanɛ ku ba bisi do ikɔ, nɔ aa jɔ̀ ku gbɔ yaasei idei woo nɛ kumà ŋa.

³ Aa jɔ̀ inɛ ku ba ikɔ do yaase jiida, nɔ ku ce mii iyi í sĩa do iyi í jɛ dee dee do iyi í tɛ.

⁴ Aa ya mua inɛ ŋa iyi a kù nɛ laakai ŋa laakai, nɔ a jɔ̀ awaasũ ŋa a ba kumà do ide si bii aa maa lasabu si.

⁵ Ilu bisi ku sotĩ ku gbɔ mɔnda ŋau, nɔ ku kɔ̃ɔsi kumà iyi í nɛ, nɔ ilu laakai ku mà bɛi á ce isɛɛnɛɛ.

⁶ Aa ya jɔ̀ amanɛ ku mà yaasei mɔnda gɔ do idei ilu bisi ŋa.

⁷ Bii ì bi i nɛ kumà, jɔ̀ i mà bɛɛrɛi Aɔ̃ Lafɛ̃ɛ titã. Nnyɛi ŋa aŋa akãi à ya ce atafii si bisi do ikɔ iyi à waa na ŋa.

À waa kɔ awaasũ ŋa

⁸ Amam, jɔ̀ i ya gbɔ ikɔi baaɛ, nɔ i maà ya fũsi idei iyeɛ awɔ

⁹ domi á jɔ̀ daaɛ ku sĩa. Á yɛɛi bɛi fula jiida si iriɛ walakɔ bɛi sabai wura si kɔ̃ɔɛ.

¹⁰ Amam, bii ilu dulum ŋa à waa bi a lɛlɛɛ, maà jɛ.

¹¹ Bii à ni, too wa wa kaa manji ka kpa inɛ ŋa. Ka koo kaa daa inɛ ŋa kpãa baa bii a kù ce taale kãma gɔ.

¹² Ka bata ŋa ka ce nfe nŋa njaawɛ anu akã. Ka si ŋa mam mam.

¹³ Do yaase bɛɛbɛ aa ka ba amani jiida dimi ikã ikã baa yooma fei ka kɔ̃ò ile nwa ŋa.

¹⁴ Awɔ mɔ aa ba ikpɛ̃ɛ, bɔgɔ akãi aa ka nɛ awa fei.

¹⁵ Amam, maà na i too ŋa. Sinda i jɔ̀ nŋa kpãa nŋa,

¹⁶ domi laalɔi à sɛi à waa bɔ ku ce, nɔ à waa saasa a koo a kpa inɛ.

¹⁷ Bii ì koo ì waa lea yɛi iyi wa cɔɛ taa, icɛ ngbɛi.

¹⁸ Amma inɛ ŋau, ara nŋai à waa lea taau, nɔ aŋa taka nŋai aa sinda a dasi.

¹⁹ Mii iyi á ba inɛ baa yooma iyi wa dɛ amani do ile mbɛ. Inɛ ŋa iyi à na ara nŋa sii í ya kpa.

Bisi wa sɔ̃ inɛ ŋa í ni a ce laakai

²⁰ Bisi wa ba inɛ ŋa ku fɔ si kpãa ŋa, wa dɔ̃ anu si bantuma ŋa.

²¹ Wa fɔ ide hee lele tengi bii inɛ ŋa à kpɔ, wa cã kɛsɛɛdɛ bi andɛ koofai ilu wa ni,

²² hee waati yoomai aa jɔ̀ icɛi nnyɛi ku ce nŋɛu ŋa. Iŋɛ woo yaako inɛ ŋa, hee waati yoomai aa jɔ̀ inɛ ŋa ku yaako ŋa. Iŋɛ hai nɛ kumà ŋa mɔ, hee waati yoomai aa leekĩò kumà ku cé ŋa.

²³ I sotĩ i gbɔ kai iyi ǹ wa n dɔ̃ nŋɛ, nɔ n da nŋɛ si hundem n má nŋɛ inya do ikɔ ŋa.

²⁴ Amma ǹ kpe ŋɛ nɔ ì kɔ̀ ku jɛ ŋa, ǹ to nŋɛ awɔ nɔ inɛ kãma kù ce laakaiɛ mɔm.

²⁵ Ì kɔ̀si ikɔm fei ŋa, nɔ i kù bi ku gbɔ kai iyi ǹ dɔ̃ nŋɛ.

²⁶ Na nŋu, amu mɔ an nyaanyi ŋɛi waati iyi laalɔ á naa si ŋɛ. An yaako ŋɛi waati iyi zigiidau á to wa si ŋɛ.

²⁷ Waati bɛɛbɛ zigiidau á naa si ŋɛi bɛi fufui ijĩ, nɔ laalɔu mɔ á naa si ŋɛi bɛi fufu dabii, nɔ inɔ kufɔ do wahala á caa si ŋɛ.

²⁸ Waati nŋui aa kpem ŋa, nɔ n ka n jɛ nŋɛ. Aa dɛdɛm ŋa amma i kaa yɛm ŋa.

²⁹ An ce bɛɛbɛi si na iyi í jɔ̀ ì cé kumà ŋa, nɔ i kù dɛdɛ i mà bɛɛrɛi Aɔ̃ Lafɛ̃ɛ ŋa.

³⁰ I kɔ̀si ikɔm ŋa nɔ i ce atafii si kai iyi ǹ dɔ̃ nŋɛ.

³¹ Aa ba ribai mii iyi ì gbɛ̃ ŋa, nɔ ribai ikɔ nŋɛ ŋai aa jɛ ŋa.

³² Hai mà ŋa iyi à kɔ̀ ku gbɔ idei bisi, aa kui, nɔ nnyɛi ŋa iyi a kù ce njoi ijuukpã, aa nyɔi.

³³ Amma inɛ iyi wa de sim itĩ á wɛɛò laakai ku sũ nɔ zigiɛ kaa maa daò laalɔ kãma gɔ.