Piɛɛ 2, 3 - Bibeli do fee

Lafɛ̃ɛ á nyi wa si bɛi í ce kuwãɛ

¹ Iŋɛ baakɔɔm ŋa, tia minjisiam wee iyi ǹ kɔ nŋɛ. Si tia sinteu do minjisiau fei ǹ wa n dɛ n jĩ lasabu jiida nŋɛ do kukɔsi ŋa iyi ǹ wa n ye ŋɛ gigi.

² Ǹ bi i ye gigii ide iyi walii kumá ŋau à fɔ wo, do woodai Lafɛ̃ɛ woo faaba iyi woo bɛ nŋɛ ŋa à sisi nŋɛ.

³ Sinte, ǹ bi i mà ŋa iyi si waatii ankãanyi inɛ gɔ ŋa aa na a maa nɛ si idɔɔbi nŋa. Nɔ aa yaako ŋɛ

⁴ a maa ni, Kirisi í ce kuwã í ni nŋu á nyi wa, mà iboi. To, iwoi í wa. Kù waa nyi wa má, domi hai waati iyi bala nwa ŋa à ku, mii fei í wɛɛi bɛi hai sintei andunya ku taka.

⁵ Amma mii akãi inɛ ŋau à gbɛjɛ na kance. Mii iyi à gbɛjɛ wee. Waati iyi Ilaaɔ̃ í taka lele do ilɛ, í taka ŋai do idei gɛlɛɛ. Do ide ku fɔɛi í nyaò ilɛ hai si inɔ inyi nɔ í fɛɛfɛɛ do inyi.

⁶ Nɔ si anyiɛ, do ide ku fɔɛui í kpaò irii andunyai tako si waati iyi í jɔ̀ inyi í jɛ mii fei.

⁷ Lele do ilɛ iyi í wɛɛ nsɛi, do ide akãu bɛi Ilaaɔ̃ á kpa ŋaò, amma bɛbɛi do inai á jɛ. Wa mu ŋai titã hee koo toò ajɔ iyi á kiiti inɛ ŋa iyi a kù mà bɛɛrɛɛ nɔ ku ce nfe nŋa.

⁸ Amma iŋɛ baakɔɔm ŋa, i maà jɔ̀ i gbɛjɛ mii akãu ihɛ̃ ŋa, iyi ajɔ akã í yɛa Lafɛ̃ɛi bɛi adɔ̃ dubu, nɔ adɔ̃ dubu í yɛaai bɛi ajɔ akã.

⁹ Aɔ̃ Lafɛ̃ɛ ci ya jɔ̀ idei kuwãɛ iyi í jilɛu ku kpɛ ideu ku kɔ̃ò si bɛi inɛ gɔ ŋa à waa tamaa. Amma wa temua nŋɛi, domi kù bi baa inɛ akã ku ce nfe. Í bi mɔm ku jɛ inɛ fei ku kpaasi idɔ.

¹⁰ Do nŋu fei, ajɔi Lafɛ̃ɛ á naai bɛi ile. Si ajɔ nŋui, lele á kpa iri do iba nla nla. Mii iyi í wa bɛ fei á yɔ si ina nɔ ilɛ do mii iyi í wa si fei á kpa iri.

¹¹ Na nŋu, si bɛi mii ŋau fei á ce nfe bɛɛbɛ, i jɔ̀ i mà sãa sãa ŋa zaka bɛi í sĩa isɛɛnɛ nŋɛ ku maa má nɔ i mà bɛɛrɛi Ilaaɔ̃ ŋa.

¹² Nɔ i maa degbe ajɔu ŋa i maa ce kookaai ku ba ku naa ńya ńya. Si ajɔ nŋui ina á ce nfei lele, nɔ mii iyi í wa si fei ku yɔ do inya gbãa nla nlai inau.

¹³ Amma Ilaaɔ̃ í ce kuwã nŋu ku ce lele do ilɛ fei titɔ̃ bii dee dee ku jɛ á wa. Nŋui à waa degbe.

¹⁴ Na saabu nŋu, iŋɛ baakɔɔm ŋa, si bɛi ì waa degbe ajɔu, i ce kookaai Lafɛ̃ɛ ku na ku ba ŋɛ si laakai ku sũ, riisi do kurara ku maà wa si ŋɛ.

¹⁵ I doo temuai Lafɛ̃ɛ nwa bɛi kpãai faaba nŋɛ, si bɛi Pɔlu baakɔɔ nwa í kɔ nŋɛ do bisi iyi Ilaaɔ̃ í muaa.

¹⁶ Ideu ihɛ̃i í kɔ si tia iyi í kɔ fei tengi bii wa fɔ idei mii ŋau ihɛ̃. Si tiaɛ ŋau bii gɔ ŋa í wɛɛ iyi í gaabu ku gbɔ, nɔ hai mà ŋa iyi a kù waa leekĩ si naanɛ ku dasi dim dim à ya maa bɛjɛ yaasei ideui, si bɛi à ya maa ce do kukɔi idei Ilaaɔ̃ si inya mmu gɔ ŋa. Bɛɛbɛi à waa faa ara nŋa nfe ku ce.

¹⁷ Amma iŋɛ baakɔɔm ŋa, ì mà ideu tã ŋa. Na nŋu, i ce laakai ara nŋɛ ku ba kurarai inɛ ŋa iyi a kù mà bɛɛrɛi Ilaaɔ̃ ku maà jɔ̀ i yaa hai si kpãa jiida iyi ì waa leekĩ si dim dim ŋa.

¹⁸ Amma didɔ̃i Lafɛ̃ɛ woo faaba nwa Jesu Kirisi ku maa kɔ̃ɔsi si ŋɛ, nɔ kumà iyi ì nɛ si gãmɛɛ ŋa ku kɔ̃ɔsi ku maa koo. Nŋui í jɛ ilu amboe hai nsɛi hee do ajɔ fei. Ami.