Piɛɛ 2, 2 - Bibeli do fee

Woo kɔ si cio ilu ibo ŋa

¹ Walii ilu ibo ŋa à wɛɛ wo si inɔi inɛ ŋau. Bɛɛbɛ mɔi woo kɔsi cio ilu ibo ŋa aa faata wa si anini nŋɛ. Aa naaò kukɔsi ibo wa do bisi, iyi á ce inɛ ŋa nfe, nɔ aa kɔ̀si Lafɛ̃ɛ iyi í ya ŋa. Bɛɛbɛi aa faa ara nŋa nfe ku ce anu akã.

² Inɛ nkpɔi á too daa laalɔ nŋa, nɔ na iri nŋa inɛ gɔ ŋa aa bu kpãai ntɔ.

³ Na binɛ nŋa aa jɛ ŋɛ takii do ide ŋa iyi aŋa taka nŋa à waa lasabu. Amma hai ku kpɛ woo kiiti nŋa í tã sɔɔlu ku kiiti nŋa. Nŋu mɔi á ce ŋa nfe nɔ kaa kpɛ mɔm.

⁴ Baa amaleka ŋa iyi à ce dulum wo, Ilaaɔ̃ kù jɔ̀ ŋa, amma í tale si ŋa si isa nla nla. Tengi bɛi à waa mu ŋa si ilu kuku hee ajɔi kiiti.

⁵ Ilaaɔ̃ kù nɔ kù jɔ̀ inɛi tako ŋau mɔ waati iyi í jɔ̀ ijĩ nlau í jɛ inɛi andunya ŋa iyi a kù mà bɛɛrɛɛ, amma í faaba Nowee, nŋu iyi í ce waazoi ide ntɔu do amanɛ mɛɛje gɔ ŋa.

⁶ Si anyiɛ í nyi í yɛ taalei inɛi Sodomu do Gomɔɔ ŋa mɔ má, nɔ í kpa ŋa do ina. Iyi bɛu bɛi á jɛa inɛ laalɔ ŋa iyi aa na a naa yaase.

^7-8 Amma í nya Lɔtu inɛ jiida iyi í wa si inɔi inɛ laalɔ ŋau. Í nyaai si na iyi í jɔ̀ í ya nɛ inɔ kufɔ na daa bututu nŋa, nɔ iju iyi wa má fei laalɔ iyi wa yɛ do iyi wa gbɔ wa bitandi idɔ dee deeɛ.

⁹ Bɛɛbɛ mɔi Aɔ̃ Lafɛ̃ɛ í mà bɛi á ce ku faaba inɛ ŋa iyi à mà bɛɛrɛɛ si wahala. Í nɔ í mà bɛi á mu inɛ laalɔ ŋa ku wahala ŋa si ajɔi kiiti.

¹⁰ Inɛ ŋa iyi à waa ce kubi nfe nfei ara nŋa nɔ à donda yiikoi Ilaaɔ̃, wahala nŋa á caa. Woo kɔsi cio ilu ibo ŋau à jɛ ilu faau ŋa do woo tɔɔ fufu ŋa iyi a kù waa ce njoi ilu amboei lele ŋa ku bu.

¹¹ Nɔ wee baa amaleka ŋau, aŋa iyi à re ŋa do gbugbã do yiiko ntɔ ntɔ, a kù waa yɛ taalei ilu amboei lele ŋau hee má jɛ a bu ŋa si wajui Aɔ̃ Lafɛ̃ɛ.

¹² Amma inɛ ŋau à ya maa bu mii iyi a kù mà. À yɛi bɛi mɛɛmui sako ŋa iyi a kù nɛ lasabu kãma, nɔ aa ce nfei bɛi mɛɛmui sako ŋau iyi à bí ku ba a mu ŋa a kpa ŋa.

¹³ Laalɔ iyi à cea inɛ ŋai aa sã nŋa. Inɔ didɔ̃ nŋa fei si inaabo ŋai í ya wa baa bii dasã nkpai. Baa waati iyi iŋɛò ŋa ì tɔtɔɔ ì waa jɛ ijɛi Lafɛ̃ɛ ajɔ ŋa, à ya maa ce daa laalɔ nŋai nɔ a maa nɛ si inɔ didɔ̃. Bii iŋɛò ŋa ì waa tɔtɔɔ, anyɔ nla nlai.

¹⁴ Iju nŋa fei si abo kaafe ŋai í ya wa, dulum ci ya to ŋa. À ya mu inɛ ŋa iyi a kù waa leekĩ dim dim do taa. Idɔ nŋa í nɛ dɔ̃ɔnɛi binɛ. Ilaaɔ̃ í ceekpe ŋa.

¹⁵ À jɔ̀ kpãa jiida nɔ à nyɔ. À too kpãai walii Balamu amai Beɔɔ, nŋu iyi í bi ribai laalɔ ku jɛ.

¹⁶ Amma Ilaaɔ̃ í fɔ siɛ ide na kuraraɛ. Ntɔi, Ilaaɔ̃ í jɔ̀ gbankɛlɛ iyi ci ya fɔ ide, í baa ide ku fɔ bɛi amanɛ nɔ í leekĩ ide hai nɛ yaasei waliiu.

¹⁷ Inɛ ŋau à yɛi bɛi isɔ̃ hai nɛ inyi walakɔ bɛi ijĩ iyi í dũ nɔ kaa wɔ si na iyi í jɔ̀ fufu wa taleɛ. Ilaaɔ̃ í ce nŋa sɔɔlui bi kuwa si ilu kuku nla nla.

¹⁸ À waa fɔ idei fufu ku tɔɔ iyi kù nɛ iri. À waa fa inɛ gɔ ŋa do binɛ ikã ikãi mii iyi lafɛ̃ɛ ŋa à nɛ si idɔ nŋa ŋa ku ba a mu ŋa do taa. Inɛ ŋau, do wahalai à ba à gbã wa hai bi inɛ ŋa iyi à wa si kurarau.

¹⁹ Inɛ ŋa iyi à ba à mu ŋau, à ya ce nŋa kuwãi ara ku nɛi, amma aŋa taka nŋa à jɛ arui daa ŋa iyi wa bɔò ŋa nfe ku ce, domi inɛ fei í jɛ arui mii iyi í kãmiaɛ.

²⁰ Ntɔi, inɛ ŋa iyi à jɔ̀ laalɔ ku cei andunya si na iyi í jɔ̀ à mà Lafɛ̃ɛ woo faaba nwa Jesu Kirisi, bii à nyi à jɔ̀ laalɔ ku ceu í mu ŋa má í kãmia ŋa isɛ gbeejisia, kuwɛɛi tako nŋa á tia do ti ankãanyiu.

²¹ Á tia nŋa bii í jɛ a kù mà kpãai ntɔ wo do iyi à màa tã nɔ à toa ikɔi idei Ilaaɔ̃ iyi à na ŋau anyi.

²² Mii iyi í ba ŋau bɛ wa nyisi iyi mɔndau ihɛ̃ í jɛ ntɔ. Mɔndau í ni, aja í nyi í koo wa fa ituɛ má. À ya ni má, kusɔɔ iyi à wɛ í nyi wa bimbili si pɔkɔdɔ má.