Piɛɛ 1, 5 - Bibeli do fee

Ka gbɔa inɛi Ilaaɔ̃ ŋa

¹ Nsɛi, si inɔ nŋɛ, inɛ ŋa iyi à jɛ inɛ ngboi igbɛi Ilaaɔ̃ ŋai ǹ wa n fãa. Amu mɔ inɛ ngboi bɛi aŋa mɔ, ǹ nɔ ǹ jɛ́ sɛɛdai ijuukpãi Kirisi nɔ ǹ nɛ ikpɛ̃ si amboe iyi á na ku naa.

² Ǹ wa n tɔɔ ŋɛ, i gbɔa inɛ ŋa iyi Ilaaɔ̃ í da nŋɛ si awɔ bɛi à ya gbɔa angudã ŋa, ku maà ti ku jɛ do tilasi walakɔ do binɛi fia, amma i na ara nŋɛ si icɛu do inɔ akã si bɛi Ilaaɔ̃ í bi.

³ I maà taa inɛ ŋa iyi à da nŋɛ si awɔ ŋau gbugbã, amma i nyisi ŋa kuce jiida iyi aa too si.

⁴ Nɔ waati iyi Kirisi á faata wa, nŋu iyi í jɛ inɛ ngboi woo degbe ŋau, aa gba riba ilu amboe iyi kusĩaɛ kaa tã ŋa.

⁵ Bɛɛbɛ mɔi, iŋɛ awaasũ ŋa, i sũa inɛ ngboi igbɛ ŋau iri ilɛ. Iŋɛ fei i jɔ̀ ara ku kaye ku jɛ nŋɛ bɛi ibɔ iyi à ya dasi, domi kukɔi idei Ilaaɔ̃ wa fɔ í ni, Ilaaɔ̃ kù wa anyii woo tɔɔ fufu ŋa, amma wa cea woo kaye ara ŋa didɔ̃.

⁶ Na nŋu, i kaye ara nŋɛ si awɔ gbugbãi Ilaaɔ̃, ku ba ku so ŋɛ lele si ajɔ iyi í dau.

⁷ I sɔ wahala nŋɛ fei bi tɛɛ, domi nŋui wa gbɔ nŋɛ.

⁸ I mu ara nŋɛ ŋa, i jɔ̀ hunde nŋɛ ku wɔ njoo, domi Seetam mbɛɛ nŋɛi, í dabii wa dɔ̃ anu bɛi muusu nla, wa dɛdɛ inɛ iyi á ŋɔ.

⁹ I kɔò ara nŋɛ si wajuɛ do naanɛ ku dasi nla nla domi ì mà ŋa kpaasi woo dasi Jesu naanɛ nŋɛ ŋa iyi à fangaa si andunya fei, ijuukpã dimi akãu bɛi à waa yɛ.

¹⁰ Amma bii ì yɛ ijuukpã si waati keeke ì tã ŋa, Ilaaɔ̃ ilu didɔ̃ fei, nŋu iyi í kpe ŋɛ ku ba i nɛ ikpɛ̃ si amboe hai nɛ kɔɔɛ na saabui anu akã nŋɛ do Kirisi, nŋu takaɛi á jɔ̀ i kɔ̃ dee dee ŋa. Nŋui á nɔ ku jɔ̀ i leekĩ dim dim ŋa, nɔ ku mu nŋɛ gbugbã, i maà tɛkɛɛ hai si ideɛ ŋa.

¹¹ Nŋui í nɛ gbugbã hee do ajɔ fei. Ami.

Fɔɔi ankãanyi

¹² Ǹ wa n kɔ nŋɛ ide keekeu ihɛ̃ wai do sobii Silasi kpaasi ilu naanɛ nwa. Ǹ bi n mu nŋɛ gbugbã nɔ n nyisi ŋɛ iyi ideu ihɛ̃ iyi ì waa leekĩ si dim dim ŋau, didɔ̃i Ilaaɔ̃i do ntɔ.

¹³ Igbɛi inɛi Jesu ŋa iyi í wa ilui Babilɔni, iyi Ilaaɔ̃ í cica bɛi iŋɛ mɔ, wa ce ŋɛ fɔɔ, bɛɛbɛ mɔi Maaku iyi wa jɛ bɛi amam si naanɛ ku dasi, wa ce ŋɛ fɔɔ.

¹⁴ I ce njɛ fɔɔ do kubi jiida ŋa. Laakai ku sũ ku wɛɛ do iŋɛ iyi ì jɛ ti Kirisi fei ŋa.