Piɛɛ 1, 4 - Bibeli do fee

Kuwɛɛ iyi í kpaasi

¹ Kirisi í ba ijuukpã si araɛ. Na nŋu, i mà ŋa iyi iŋɛ mɔ aa ba ijuukpã nɔ í sĩa i yɔkɔ temua ŋa, domi inɛ iyi í temuaò ijuukpã si araɛ, dulum kaa kãmiaɛ má,

² nɔ waati iyi í gbe si kuwɛɛi andunyaɛ ku jɛ si idɔɔbii Ilaaɔ̃, ku maà ti ku jɛ do kɔdɛɛ nfe nfei ara.

³ Ntɔ ntɔ, tako wo ì ce bɛi hai dasi Jesu naanɛ ŋa à ya bi, amma í to bɛɛbɛ. Ì tako ì ce mii iyi í dɔ̃a ara nŋɛ si ŋa, do binɛ, do atɛ̃ ku mɔ do zamaa, do atɛ̃ ku kpa inɛ, do jingau hai nɛ yaase, do iwɛ̃ ku tɔɔ.

⁴ Nsɛi à biti si bɛi i kù waa ba ŋa daa bututu ŋau ku ce má ŋa, nɔ à waa bu ŋɛ.

⁵ Amma aa na a koo a sisi daa nŋa bi Ilaaɔ̃, nŋu iyi í tã sɔɔlu ku kiiti ilu hunde do iku ŋa.

⁶ Na nŋu mɔm nii í jɔ̀ à tako à sisia inɛ ŋa laabaau jiidau wo ku ba baa do iyi à ku nsɛi na kiitii Ilaaɔ̃ iyi í tosi inɛ fei, hunde nŋa ku maa wɛɛ bɛi Ilaaɔ̃ takaɛ í wɛɛ.

Inɛ ŋa iyi à waa ce icɛ do amuai Ilaaɔ̃ dee dee

⁷ Kɔɔi mii fei í maai wa. Na nŋu, i mu ara nŋɛ do laakai, nɔ i jɔ̀ hunde nŋɛ ku wɔ njoo ku ba i yɔkɔ i ce kutɔɔ ŋa.

⁸ Iyi í re fei ndɛɛ, nŋui í jɛ i ce kookaai i bi njɛ ŋa, domi kubi í ya bii kurara nkpɔ.

⁹ I ya yaaɛ njɛ ŋa do inɔ akã, kugbagba ku maà wa si.

¹⁰ Inɛ baa yooma nŋɛ fei í ba amua hai bi Ilaaɔ̃. Na nŋu, i ceò amua ikã ikãi Ilaaɔ̃u icɛ ŋa i maa sobiò njɛ bɛi woo ce icɛ ilu naanɛ ŋa.

¹¹ Inɛ iyi wa waazo, ku fɔ idei Ilaaɔ̃. Inɛ mɔ iyi wa cea inɛ gɔ icɛ ku coo do gbugbã iyi Ilaaɔ̃ í muaa ku ba si mii fei amboei ku jɛ ti Ilaaɔ̃ do saabui Jesu Kirisi, nŋu iyi í nɛ amboe do gbugbã hee do ajɔ fei. Ami.

Temuai inɛi Kirisi* ŋa si ijuukpã

¹² Iŋɛ baakɔɔm ŋa, i maà biti do ijuukpã iyi wa naa si ŋɛ bɛi ina ku cɔò laakai nŋɛ. I maà ti i dooɛ mii ikã.

¹³ Amma i jɔ̀ inɔ nŋɛ ku dɔ̃ bii ì waa ba ikpɛ̃ si wahalai Kirisi ŋa, ku ba i nɛ inɔ didɔ̃ nla nla ŋa si ajɔ iyi á nyisi amboeɛ.

¹⁴ Iŋɛ ilu inɔ didɔ̃ ŋai bii à waa bu ŋɛ na irii Kirisi, domi Hundei Ilaaɔ̃ ilu amboe, í wa si ŋɛ.

¹⁵ Inɛ kãma nŋɛ ku maà jɔ̀ ku yɛ ijuukpã na inɛ ku kpa, walakɔ na ile, walakɔ na laalɔ ku ce, walakɔ na wɔbia ku gũ.

¹⁶ Amma inɛ iyi wa wahala si na iyi í jɔ̀ í jɛ inɛi Kirisi, ku maà jɔ̀ anyɔ ku muu, amma í sĩa ku saabu Ilaaɔ̃ si na iyi í jɔ̀ wa so irii Kirisiu.

¹⁷ Waati í to kiitiu ku sinti. Inɛi Ilaaɔ̃ ŋai aa sinti ku kiiti. To, bii í sinti hai bi tu wa, bɛirei iri ku kpaɛ á yɛ bi inɛ ŋa iyi à kɔ̀ ku dasi laabaau jiidai Ilaaɔ̃ naanɛ.

¹⁸ Kukɔi idei Ilaaɔ̃ wa fɔ í ni, bii faabai inɛ dee dee ŋa í gaabu, bɛirei ti ilu dulum ŋa do inɛ ŋa iyi a kù mà bɛɛrɛi Ilaaɔ̃ á yɛ.

¹⁹ Na nŋu, inɛ ŋa iyi à waa yɛ ijuukpã si idɔɔbii Ilaaɔ̃, í sĩa a teese a maa ce jiidaɛ nɔ a leekĩ do woo taka nŋa iyi í jɛ ilu naanɛ.