Piɛɛ 1, 3 - Bibeli do fee

Abo do mɔkɔ

¹ Bɛɛbɛ mɔi iŋɛ inaabo ŋa, i sũa mɔkɔ nŋɛ ŋa iri ilɛ, hee baa bii í jɛ gɔgɔ nŋa ŋa a kù dasi idei Ilaaɔ̃ naanɛ, daa nŋɛ ku jɔ̀ a dasi naanɛ. Waati bɛɛbɛ i kù nɛ bukaatai ide ku fɔ má ŋa,

² domi aa yɛ kuwɛɛ nŋɛ í má, nɔ ì mà bɛɛrɛ nŋa ŋa.

³ I maà dɛdɛ i jɛ abo kusĩa ŋa do mii ndii ara, bɛi iri ku ba, do sabai wura ŋa, do nyau kusĩa ŋa.

⁴ Amma i jɔ̀ kusĩa nŋɛ ku jɛ si idɔ nŋɛ, kusĩa iyi ci ya tã. Nŋui í jɛ daa didɔ̃ do idɔ ku buba. Iyi bɛi í jɛ mii ilu bɛɛrɛ jiida si wajui Ilaaɔ̃.

⁵ Inaaboi tako ŋa iyi bɛi í jɛ booda nŋa aŋa iyi à mà bɛɛrɛi Ilaaɔ̃ nɔ à dasiɛ naanɛ nɔ à ya sũa mɔkɔ nŋa ŋa iri ilɛ.

⁶ Bɛɛbɛi Sara í ce, í ya maa jirima Aburahamu, nɔ wa kpoo lafɛ̃ɛɛ. Nsɛi, bii ì waa ce jiida ŋa nɔ i kù waa ce njoi nkãma, iŋɛ mɔ ì jɛ bɛi ama inaaboɛ ŋa.

⁷ Iŋɛ inɛmɔkɔ ŋa mɔ, si kuwɛɛ nŋɛ do abo nŋɛ ŋa, i ye gigi iyi a kù to ŋɛò gbugbã. I jɔ̀ i mà bɛɛrɛ nŋa ŋa, domi Ilaaɔ̃ á mua aŋa mɔ kuwɛɛ iŋɛò ŋa ajɔ. I ya maa ce bɛɛbɛ ku ba nkãma ku maà ganji ŋɛ si kutɔɔ nŋɛ.

Ijuukpã na jiida ku ce

⁸ Si anyii fei ndɛɛ i jɔ̀ iŋɛ fei i nɛ lasabu akã do kubi akã ŋa. I bi njɛ bɛi nyaanze akã ŋa, i ce araarei njɛ do ara ku kaye ŋa.

⁹ I maà ya sãa inɛ laalɔɛ, walakɔ arabu ŋa iyi í buɛ. Í sĩa mɔm i ya jɛaa do kuwee, domi Ilaaɔ̃ í kpe ŋɛi ku ba i ba kuwee ŋa.

¹⁰ Si bɛi kukɔi idei Ilaaɔ̃ wa fɔ í ni, inɛ iyi í bi ku ce kuwɛɛ jiida nɔ ku nɛ inɔ didɔ̃ ajɔ fei, ku jɔ̀ laalɔ ku fɔ nɔ ku nɔ gɛlɛɛ si ibo ku sɔ.

¹¹ Í sĩa ku saa laalɔ nɔ ku ce jiida, í sĩa ku maa dɛ laakai ku sũ waati kãma fei,

¹² domi Lafɛ̃ɛ wa degbe inɛ dee dee ŋa nɔ wa gbɔ kutɔɔ nŋa. Amma í fũsi woo ce laalɔ ŋa awɔ.

¹³ Yooi á ce nŋɛ laalɔ bii ì hanya ì waa ce jiida ŋa.

¹⁴ Baa bii ì waa ba ijuukpã ŋa na dee dee ku jɛ nŋɛ, i nɛ inɔ didɔ̃ ŋa. I maà ce njoi amanɛ ŋa, nɔ i maà ya biti ŋa.

¹⁵ Amma i jɔ̀ Kirisi ku jɛ Lafɛ̃ɛ si idɔ nŋɛ. I tã sɔɔlu waati kãma fei i jɛa inɛ ŋa iyi à waa bee yaasei kpãa ku cɔ nŋɛ.

¹⁶ Amma i jɛ nŋa do ide didɔ̃ do bɛɛrɛ. I jɔ̀ idɔ nŋɛ ku maa má ku ba bii à waa má ŋɛ ide si isɛɛnɛ jiida nŋɛ iyi wa naa hai bi Kirisi, anyɔ ku mu ŋa si ideu.

¹⁷ Bii í jɛ do idɔɔbii Ilaaɔ̃i à waa kpãɛ iju na jiida iyi ì waa ce, iyi bɛ í sĩa do iyi aa maa kpãɛ iju na laalɔ.

¹⁸ Gbakã akãi Kirisi í ku na dulum. Nŋu iyi í jɛ inɛ dee dee, í ku na inɛ laalɔ ŋa, ku ba ku bɔò wa bi Ilaaɔ̃. Waati iyi à kpaa, araɛ í ku amma hundeɛ í wɛɛ.

¹⁹ Do hundeɛui í koo í waazoa iku ŋa iyi à waa mu bɛi inɛi piisɔ̃ɔ ŋa,

²⁰ inɛ ŋa iyi a kù tako a kù waa jirima Ilaaɔ̃ si waati iyi í temuaò ŋa hee Nowee í koo í ceò akɔi inyiu í tã. Inɛ ŋa iyi à lɔ si akɔi inyiu a kù kpɔ, a kù re aŋa mɛɛjɔ, nɔ à ba faaba hai si inɔ inyi nlau.

²¹ Inyiu, í yɛi bɛi inyi ku dasi. Kù jɛ a ni wa nya riisii ara, amma wa nyisi iyi inɛ wa tɔɔ Ilaaɔ̃ ku jɔ̀ idɔi nŋu ku maà yɛ taalei nŋu. Inyi ku dasiui í faaba ŋɛ na saabui kujĩi Jesu Kirisi hai si balɛ,

²² nŋu iyi í bɔ lele nɔ wa buba si awɔ njɛi Ilaaɔ̃. Bɛi amaleka ŋa do ilu yiikoi lele ŋa do ilu gbugbã ŋa à waa sũaa iri ilɛ.