Piɛɛ 1, 2 - Bibeli do fee

Kuta ilu hunde

¹ Na nŋu, i jɔ̀ laalɔ baa yooma fei ŋa, hai ibo ku sɔ, do muafiti, do igu, do irii inɛ ku sɔ.

² Si bɛi ama kpɔtɔɔ í ya bi àmɔ, iŋɛ mɔ í sĩa i bi àmɔ iyi í má iyi í jɛ idei Ilaaɔ̃. Hundei Ilaaɔ̃i wa mu nŋɛ amɔu ku ba i la si kpãai faabau ŋa,

³ si bɛi ì yɛ bɛi jiida ku jɛi Aɔ̃ Lafɛ̃ɛ í la í to ŋa.

⁴ I sɛkɛɛ si Lafɛ̃ɛ wa, nŋu iyi í jɛ kuta ilu hunde iyi inɛ ŋa à kɔ̀si, amma Ilaaɔ̃ í cicaɛ si na iyi í jɔ̀ í nɛ bɛɛrɛ bi tɛɛ.

⁵ Iŋɛ mɔ, i naa wa bɛi kuta ilu hunde a ceò ŋɛ icɛ a maò ile bi kuwai Hundei Ilaaɔ̃. Bɛi aa jɛ woo wee ŋa iyi à má iyi Hundei Ilaaɔ̃ á jɔ̀ a cea Ilaaɔ̃ kuwee ŋa iyi á dɔ̃aa si do saabui Jesu Kirisi.

⁶ Í sĩa i ce bɛɛbɛ ŋa si na iyi í jɔ̀ si kukɔi idei Ilaaɔ̃ à ni, Ilaaɔ̃ í ni, ǹ cica kuta ilu bɛɛrɛ ǹ jilɔɔ ilui Siɔ̃ɔ bɛi kuta ku nɛ gbugbãi icui ile. Inɛ iyi í dasiɛ naanɛ, kaa yɛ anyɔ.

⁷ Kutau, í nɛ bɛɛrɛ bi iŋɛ woo dasi Jesu naanɛ ŋa, amma hai dasi naanɛ ŋa à kɔ̀siɛ. Do nŋu fei, kukɔi idei Ilaaɔ̃ í ni, kuta iyi woo ma ŋa à kɔ̀si nŋui í na í jɛ kuta gbugbãi icui ile.

⁸ Nɔ à ni má, kutau ihɛ̃i í ya jɔ̀ inɛ ŋa a koosɛ. Nŋui í ya maa kɛkɛ ŋa. À ya koosɛi si na iyi í jɔ̀ à kɔ̀ ku dasi ideu naanɛ. Nɔ nŋu bɛi Ilaaɔ̃ í jilɛ nŋa.

⁹ Amma iŋɛi ì jɛ dimi iyi Ilaaɔ̃ í cica, nɔ iŋɛi ì jɛ woo weei ilaalu ŋa, ì jɛ dimi iyi í má ŋa iyi Ilaaɔ̃ í ya ku ba i fɔ jiida ku jɛɛ, nŋu iyi í kpe ŋɛ hai si ilu kuku ì naa ì lɔ si inya kumá ilu bɛɛrɛɛ.

¹⁰ Tako wo i kù jɛ dimi ŋa iyi inɛ gɔ í mà, amma nsɛi ì jɛ inɛi Ilaaɔ̃ ŋa. Tako wo araarei Ilaaɔ̃ kù wa si nŋɛ, amma nsɛi ì ba í ce araare nŋɛ.

Kuwɛɛi woo dasi naanɛ

¹¹ Iŋɛ baakɔɔm ŋa, ǹ wa n tɔɔ ŋɛi, iŋɛ iyi ì yɛ bɛi inɛ njoo ŋa si andunyau ihɛ̃, i jɔ̀ i nɔ ara nŋɛ do binɛi ara iyi í ya maa ce igũ do hunde nŋɛ.

¹² I jɔ̀ i nɛ daa jiida ŋa si inɔi hai dasi Jesu naanɛ ŋa, domi baa bii à waa kpe ŋɛ inɛ laalɔ ŋa, aa yɛ icɛ jiida nŋɛ nɔ a saabu Ilaaɔ̃ si ajɔ iyi á kiiti inɛ fei.

¹³ I jirima ilu iri fei ŋa na irii Lafɛ̃ɛ, hai ilaalu nla nŋu iyi í re do gbugbã,

¹⁴ hee ku koo si ilaalui ilu ŋa, inɛ ŋa iyi í bɛ wa ku ba a kpã woo ce laalɔ ŋa iju, nɔ a saabu woo ce jiida ŋa.

¹⁵ Do ntɔ, iyi Ilaaɔ̃ í bi, nŋui í jɛ icɛ jiida nŋɛ ku dĩ gɛlɛi hai mà ngɔgɔ ŋa si ide hai nɛ yaase nŋa.

¹⁶ Í sĩa i ya maa nɛ bɛi inɛ ŋa iyi à nɛ ara nŋa, amma i maà ti i jɔ̀ ara ku nɛ nŋɛ ku yɛ bɛi acɔ iyi wa bii laalɔ. I jɛ kuwɛɛ nŋɛ bɛi woo ce icɛi Ilaaɔ̃ ŋa.

¹⁷ I jirima inɛ fei ŋa, i bi kpaasi woo dasi Jesu naanɛ nŋɛ ŋa, i mà bɛɛrɛi Ilaaɔ̃, nɔ i jirima ilaalu nlau ŋa.

Mii iyi wahalai Kirisi* wa nyisi

¹⁸ Iŋɛ amaacɛ ŋa, i sũa lafɛ̃ɛ nŋɛ ŋa iri ilɛ i jirima ŋa ntɔ ntɔ, kù jɛ inɛ jiida do amanɛ kurɔ aŋa akãi aa ya cea ŋa, amma hee do inɛ kugaabu ŋa feii.

¹⁹ Do ntɔ, bii à waa kpã ŋɛ iju nfe nfe, í sĩa i yɔkɔ temua ŋa na irii Ilaaɔ̃.

²⁰ Bii ì yɔkɔ temuai goloi kuraraɛ i kù nɛ saabu kãma. Amma bii ì ba ijuukpã na jiida iyi ì waa ce ŋa nɔ ì temua, mii jiidai si wajui Ilaaɔ̃.

²¹ Na ideu bɛi Ilaaɔ̃ í kpe ŋɛ domi Kirisi takaɛ í ba ijuukpã na iri nŋɛ nɔ wa nyisi ŋɛ yaase jiida ku ba i too tuubaɛ ŋa.

²² Kù ce dulum, a kù nɔ a kù gbɔ ibo si gɛlɛɛ ajɔ kãma.

²³ Iyi à buu, kù sã nŋa arabu. Iyi à kpãa iju, kù ceekpe ŋa, amma í leekĩ do Ilaaɔ̃ iyi í ya kiiti dee dee.

²⁴ Kirisi takaɛ í so dulum du wa si araɛ si jĩi ku gaauu ku ba ka jɛ bɛi iku si wajui dulum, nɔ ka ce kuwɛɛ nwa dee dee. Do saabui kumɛɛɛ ŋai à baò iri.

²⁵ Tako wo ì yɛ ŋai bɛi angudã ŋa iyi à nyɔ, amma nsɛi ì nyi wa bi woo degbeu ŋa, nŋu iyi wa degbe ŋɛ.